15 fevral kuni Toshkent shahri, Shayxontohur tumanidagi xonadonda yong‘in sodir bo‘lishi oqibatida ushbu xonadonda yashab kelgan bir oilaning yetti nafar a’zosi hayotdan ko‘z yumgani haqiba xabar berilgandi.
Ma’lum bo‘lishicha, «Hilol» nashriyotida bir necha yillar davomida muharrir bo‘lib ishlagan, «Tafsiri Hilol», «Kifoya» kabi asarlarni tahrir qilgan Shahobiddin hoji Odilovning yaqinlari ham ushbu falokat tufayli halok bo‘lgan.
Shu munosabat bilan, O‘zbekiston musulmonlari idorasi raisi, muftiy Usmonxon Alimov hazratlarining hamdardliklarini yetkazish maqsadida, Diniy idora mas’ullari ushbu xonadonga bordilar.
Musibatzada xonadan egalariga chin ko‘ngildan ta’ziya izhor etib, muftiy hazratlarining hamdardliklari yetkazildi. Bunday og‘ir sinovlarni chinakam mo‘minlarga xos sabru matonat bilan qarshi olishlarida Yaratgan Robbimiz madadkor bo‘lishini tiladilar.
Qur’oni karim tilovat qilinib, marhumlar haqqiga bag‘ishlandi.
Alloh taolo ushbu marhumlarni O‘z rahmatiga olib, sabru jamil ato etsin.

O‘zbekiston musulmonlari idorasi Matbuot xizmati