Yurtimizdagi barcha masjidlarda kecha, 18 yanvar kuni Qozog‘istonning Aqto‘be viloyatida ro‘y bergan halokat qurbonlarining haqlariga juma namozlaridan so‘ng duolar qilishib, Alloh taoloning rahmatini so‘rashmoqda. 

Shuningdek, ijtimoiy tarmoqlarda ham ko‘plab o‘zbekistonliklar Qur’on tilovat qilishib, marhumlar haqqiga savoblarini bag‘ishlash bo‘yicha hamdardlik loyihasini ommalashtirmoqdalar. 

Qayd etish joiz, halokat sodir bo‘lgan kunning o‘zida O‘zbekiston Respublikasi Prezidenti Shavkat Mirziyoyev halok bo‘lganlarning oila a’zolari va yaqinlariga hamdardlik bildirgan edi. 

Toshkent islom instituti o‘qituvchi va talabalari ham 21 marta Qur’oni karimni xatm qilishib, bugungi juma namozida savobini halokat qurbonlariga bag‘ishladilar. Bu haqda “Islaminstitut.uz” sayti xabar berdi. 

Avval xabar berganimizdek, ayni paytda yurtimiz bo‘ylab davom etayotgan Qur’oni karim musobaqasi tashkilotchilari va ishtirokchilari 18 yanvar kuni Samarqand viloyatining Pastdarg‘om va Payariq tumanlarida bo‘lib o‘tgan ko‘rik-tanlovdagi tilovatlarni marhumlar haqqiga bag‘ishlagan edilar. 

O‘MI Matbuot xizmati