Qish mavsumida ko‘pchiligimiz, dorixonalardan immunitetimizni mustahkam qiluvchi, gripp, angina, bronxit va boshqa kasalliklardan himoya qiluvchi qimmatbaho “mo‘jizaviy” dorilarni sotib olamiz.
Biroq, biz o‘ylagandek mo‘jizaviy preparatlar hali yaratilmagan. Bundan tashqari, musulmon kishiga dorixonalardan bu turdagi vositalarni axtarishning hojati yo‘q, chunki Islom dini salomatlikni mustahkamlash va immunitetni kuchaytirish uchun asrlar davomida isbotlangan vositalarni taqdim etadi:
Tahorat
Tahorat musulmon kishiga nafaqat ibodat uchun, balki sog‘liq uchun ham zarurdir. Yurak qon tomir tizimi uchun tahoratning foydasi allaqachon isbotlangan, bundan tashqari, u refleksoterapiya usullarini ham o‘z ichiga oladi.
Iliq yoki yozda salqin suv bilan tahorat qilish tanani mukammal darajada mustahkamlaydi. Og‘iz va burunni muntazam yuvish infeksiyalarning rivojlanishiga to‘sqinlik qiladi. Umuman olganda, barchasi oson: tahorat qiling – sog‘lom bo‘lasiz!
Zanjabil (Imbir)
Bu o‘simlikning ildizi antibakterial, yallig‘lanishga qarshi, antimikrob, antiseptik, bakteritsid xususiyatlariga ega. Zanjabil juda foydali bo‘lib, S, V vitaminlariga boy, uning tarkibida tanadagi hujayralarni “davolash” va yangilab turish qobiliyatiga ega retinol moddasi mavjud. Zanjabil asal bilan iste’mol qilinganda u asalining foydali xususiyatlarini mukammal ravishda to‘ldiradi.
Asal
Asalning shifobaxsh qudrati Qur’oni karimda aytilganligini yaxshi bilamiz. Ushbu mahsulot immunitet tizimi uchun tengi yo‘q hisoblanadi. Qayd etish kerakki, inson qonining kimyoviy tarkibi va asal hayratlanarli darajada o‘xshaydi. Qonimizda 24 mikroelement mavjud bo‘lsa tabiiy asalda – 22 ta.
Shamollash bilan bog‘liq kasalliklarni oldini olishning ajoyib uslublaridan biri asalni yong‘oq bilan qorishtirib iste’mol qilishdir. Bunda har qanday yong‘oq turidan foydalanish mumkin. Asosiysi, aralashma ma’lum vaqt turishi lozim.
Qora sedana yog‘i
Tadqiqotlar shuni ko‘rsatadiki, qora sedana yog‘i oshqozon-ichak faoliyatini normallashtiradi, immunitet tizimini faollashtiradi, ko‘plab patogen bakteriyalarni yo‘q qiladi, qonda xolesterinni kamaytiradi va xoleretik ta’sir ko‘rsatadi.
Sedana yog‘idan profilaktik davolash hamda umumiy quvvatlantirish maqsadlarida foydalanish mumkin. Agar siz kun davomida hech bo‘lmaganda bir choy qoshiq sedana yog‘idan ichsangiz, sizda modda almashinuvi normallashadi va tanangizning himoya kuchi ortadi.
Hilba (Xelba)
Hilba urug‘i (Semena pajitnika) shamollash, isitma, virusli infektsiyalar oqibatlarini bartaraf etishga yordam beradi. O‘zining yumshoq xususiyatlaridan kelib chiqib, bu o‘simlik shamollashni davolashda yallig‘lanishga qarshi va balg‘am ko‘chirishda ishlatiladi.
Hilba shilimshiq pushti massalarni yumshatib, eritib, limfa tizimidan toksinlarni olib tashlashga yordam beradi. Shuning uchun bir osh qoshiq pajitnik urug‘ini yarim litr suvga solib bilan iste’mol qilish shamollashni davolashda ichimlik sifatida ishlatiladi. Bundan tashqari, vitaminlashning qo‘shimcha samarasini oshirish uchun ichimlikka, limon yoki klyukva sharbati qo‘shiladi.
Toshkent shahar vakilligi xodimi
Zoirjon SODIQOV
tayyorladi
Toshkent islom instituti jamoasi Buxoro va Samarqand viloyatlariga uch kunlik ilmiy safarga chiqishdi.
Muftiy hazratlari xayrixohligi va institut rektori tashabbusi bilan yo‘lga qo‘yilgan ilmiy safarning birinchi kunida Abdulxoliq G‘ijduvoniy, Sayyid Mir Kulol, Bahouddin Naqshband, Abu Hafs Kabir hamda Chor Bakr kabi tarixiy obidalar, muqaddas qadamjolar ziyorat qilindi. Ulamolar hayoti va faoliyati bilan yaqindan tanishildi. Mir Arab madrasasida ham talabalar bilan uchrashuv tashkil etildi.
An’anaga muvofiq, Muhammadrasul Abdullayev, Faxriddin Mamanosirov, Jahongir Ne’matov, Jahongir Ro‘ziyev va boshqa o‘qituvchilar ishtirokida talabalar Masjidi Kalonda Imom Buxoriyning buxorolik ustozlaridan rivoyat qilgan hadislarni o‘qishdi.
Imom Buxoriy mana shu masjidda minglab talabalarga "Sahihi Buxoriy"dan dars bergani tarixdan ma’lum. Aynan shu yerda tahsil olish bugungi talabalar uchun ilm barakasidan nasibador bo‘lishga umidvorlik bor.
Toshkent islom instituti jamoasining safari Samarqandda davom etdi. Ustoz va talabalar Hadis ilmi maktabida ham bo‘lishib, “Sahihul Buxoriy” kitobidan oxirgi hadislarni o‘qishdi. Shundan so‘ng 70 dan ortiq bitiruvchi kurs talabalariga “Sahihul Buxoriy” bo‘yicha ijoza shahodatnomalari topshirildi.
Qur’on xatmlari nihoyalanib, xalqimiz farovonligi va yurtimiz osoyishtaligini tilab duolar qilindi.
Ma’lumot uchun, Toshkent islom institutida diniy ta’limning “xatmi kutub” uslubi bo‘yicha hadis, fiqh, aqida, tafsir, faroiz, tasavvuf kabi fanlarga oid mo‘tabar kitoblar dars jarayonlari va to‘garaklarda to‘liq o‘qib tugatiladi. “Sahihul Buxoriy” kitobi 2 yil mobaynida “Hadis va islom tarixi fanlari” kafedrasi o‘qituvchilari ustozligida o‘qib xatm qilindi. “Sahihul Buxoriy” bo‘yicha ijoza shahodatnomalari har yili Buxoro va Samarqanddagi ilmiy safar yakunida topshiriladi.
O‘zbekiston musulmonlari idorasi
Matbuot xizmati