O‘zbekiston musulmonlari idorasi Toshkent viloyati vakilligi tomonidan “Xalq bilan muloqot va inson manfaatlari yili” dasturi doirasida hamda mamlakatimiz Bosh qomusining 25 yilligi va Mavlid oyi munosabati bilan reja asosida joylarda xalq bilan ochiq muloqot tashkil etib kelinmoqda.
Ana shunday tadbirlardan biri Toshkent viloyatining tog‘li hududlaridan biri Bo‘stonliq tumanida kuni kecha tashkil etildi. Bo‘stonliq tumani Tovoqsoy Iqtisodiyot kasb-hunar kollejida bo‘lib o‘tgan suhbatda mahalla ahli va faollari ishtirok etdi.
Viloyat bosh imom xatibi Xayrulloh Turmatov domla Islomda oilaga munosabat, ne’mat va baxt tushunchalari haqida so‘z yuritib, bugungi kunimizga shukrona qilish el-yurt ravnaqi, millat kelajagi va bunyodkorlik uchun harakat qilmog‘imiz lozimligini ta’kidladi. Jamiyatimizda oilaviy ajrimlar, huquqbuzarlik va jinoyatchilikning oldini olishda har bir fuqaro o‘zining burch va majburiyatlarini sidqidildan ado etishi muhim omil ekanini aytib o‘tdi.
Dildan bo‘lgan suhbat asnosida ishtirokchilar o‘zlarini qiziqtirgan savollarga javob oldilar va o‘z takliflarini bildirdilar, bu tarzdagi ochiq muloqotlar xalq uchun juda manfaatli bo‘lishini ta’kidlab, tashkilotchilarga o‘z minnatdorchiliklarini izhor qildilar.
Tadbir so‘ngida, an’anaga sodiq qolgan holda Toshkent viloyati vakilligi tomonidan mahallalarga ma’rifiy va tarbiyaviy kitoblar sovg‘a kilindi.
O‘MI Matbuot xizmati
O‘tgan solih zotlar jamoat bilan namoz o‘qiyolmay qolsalar, bir-birlariga ta’ziya izhor qilishar ekan. Shunday zotlardan biri Hotamul Asom aytadi: “Men jamoatga ulgurmay qoldim, shunda menga Abu Is'hoq Buxoriyning bir o‘zi ta’ziya bildirdi. Agarda o‘g‘lim o‘lib qolsa minglab odamlar ta’ziya izhor qilishadi. Buning sababi odamlar nazdida din musibati dunyo musibatlaridan ko‘ra arzimas sanalganidandir”.
Bugungi kunda oramizda qanchalab odamlar jamoat namozlarini o‘tkazib yuboradilar, jiddiy e’tibor qaratmaydilar. Ba’zida ish, g‘am-tashvishlarning ko‘pligini bahona qilamiz, to‘g‘rimi?! Yana ko‘plar tuni bilan uxlamasdan, bomdod namoziga yaqin uxlab qolishlari ham bor gap.
Rasululloh sollallohu alayhi vasallamning “Zimistonda masjidlar sari odim tashlovchilarga qiyomat kunidagi tamomiy nurning xushxabarini beringlar”[1] deganlarini nahot eshitmagansiz?!
Shayton sizning ustingizdan g‘alabaga erishib, namozda xotirjamligingizni ketkazishiga imkon bermang!
Omir ibn Abdulloh o‘lim to‘shagida yotganlarida azon ovozini eshitib: “Meni qo‘limdan tutinglar”, dedilar. Omir ibn Abdullohga “Axir siz betobsiz-ku”, deyishganida: “Allohning chaqirig‘ini eshitib turib, unga rioya qilmaymanmi”, dedilar. Keyin u kishini qo‘lidan ushlab turg‘izishdi. Masjidda imom bilan shom namozining bir rakatini o‘qidilar va jon taslim qildilar.
Yana bir misol: Sufyon ibn Uyayna azon aytilishidan ilgari namozga borishga ishtiyoqmand bo‘lganlar va doim: “Namozga azon aytilmagunicha masjidga kelib turmaydigan yomon qul bo‘lma. Chunki yomon qul chaqirmaguningcha kelmaydi”, der edilar.
Oisha roziyallohu anho onamiz aytadilar: “Rasululloh sollallohu alayhi vasallam bilan suhbatlashib o‘tirardik, u zot ham biz bilan gaplashib o‘tirardilar. Bordi-yu, namoz vaqti kirib qolsa, bir-birimizni tanimaganday bo‘lib olardik”[2].
Shukrki, oramizda masjidda birinchi safga joylashish uchun g‘ayrat qiluvchilar ko‘payib bormoqda. Nabiy alayhissalom: “Agarda odamlar azonda va birinchi safda nimalar borligini bilishsa edi, unga erishish uchun qur’a tashlashdan boshqa chora bo‘lmasa, albatta, qur’a tashlagan bo‘lardilar”, deganlar.
Said ibn Musayyab aytadi: “Men ellik yildan beri biror marta birinchi takbirni o‘tkazib yubormaganman. Ellik yildan buyon namozda birorta kishining boshining orqasiga qaragan emasman”.
Hasson Shamsiy Poshoning
“Jannat bo‘stonidagi oilaviy oqshomlar” nomli kitobidan
G‘iyosiddin Habibulloh, Ilhom Ohund, Abdulbosit Abdulvohid tarjimasi.
[1] Imom Termiziy va Imom Abu Dovud rivoyati.
[2] Mursal hadis. Iroqiyning “Ihyo”ga yozgan taxrijiga qarang (1, 205).