Kecha, 21 noyabr kuni ziyorat turizmini tashkil etish bo‘yicha qilinayotgan ishlarni jadallashlatirish maqsadida, Din ishlari bo‘yicha qo‘mita, O‘zbekiston musulmonlari idorasi, Islom sivilizatsiyasi markazi, Toshkent islom universiteti mas’ul xodimlari va yurtimizdagi eng yetakchi sayyohlik firmalari vakillari ishtirokida ishchi yig‘ilish bo‘lib o‘tdi.

Din ishlari bo‘yicha qo‘mita raisi O.Yusupov yig‘ilishni ochib, Prezidentimiz Sh.Mirziyoyev shu yil 9-10 noyabr kunlari Samarqand viloyatiga tashrifi davomida ziyorat turizmini keng yo‘lga qo‘yish bo‘yicha chora-tadbirlar ishlab chiqish yuzasidan mutasaddi tashkilotlarga topshiriqlar berilganini ta’kidladi. Shuningdek, Samarqand va Buxoro viloyatlariga ziyorat turizmi bo‘yicha xorijiy turistlarni jalb etish, shu jumladan, Turkiya, Malayziya, Indoneziya va boshqa Islom dini ko‘p tarqalgan davlatlar bilan ishlash bo‘yicha ishchi guruhlarini shakllantirib, chora-tadbirlar rejasini tuzish ishlari boshlanganini bildirdi. O.Yusupov so‘zida davom etib chet-el mamlakatlarida Samarqand va Buxoro viloyatlarining turizm salohiyatini, shu jumladan, Samarqand viloyatidagi Imom Buxoriy, Buxoro viloyatidagi Bahouddin Naqshband ziyoratgohlariga ziyoratini tashkil etishni targ‘ib qilish dasturini ishlab chiqish muhimligini batafsil izohladi.

Yig‘ilishda “Azia tour” sayyohlik firmasi mutaxassisi Akmal Qosimov so‘z olib, ziyorat turizmini tashkil etishda yurtimizdagi “Silsilai aliya” (12 ta avliyo qadamjosi) tarkibidagi ziyoratgohlarga alohida e’tibor qaratish, Malayziya, Indoneziya davlatlariga “Umra-plyus” xizmatini taklif etish, xorijlik din peshvolari ishtirokida seminarlar, konferensiyalar tashkil etish, islom institutlari o‘rtasida hamkorlikni rivojlantirish, nufuzli islom tashkilotlarining grand tanlovlarida qatnashish kabi takliflarni berdi.

Shuningdek, so‘zga chiqqan notiqlar Din ishlari bo‘yicha qo‘mita, O‘zbekiston musulmonlari idorasi, Toshkent islom universiteti, Islom sivilizatsiyasi markazi, Muqaddas qadamjolarni saqlash va obod etish xayriya jamg‘armasi va “O‘zbekturizm” ziyorat turizmini amalga oshirishda hamkorlik qilish bo‘yicha memorandum imzolash taklifini taqdim etishdi.

Bundan tashqari O‘zbekiston Respublikasidagi muqaddas qadamjolarga ziyorat turizm yo‘nalishidagi sayyohlarni jalb qilish bo‘yicha reklama tadbirlarini tashkil etish uchun tarqatma materiallar, bukletlar, bannerlar, ma’lumotnoma kitobchalari va slaydlar tayyorlash, xorijdagi diniy ulamolar bilan ziyorat turizm yo‘nalishida yaqindan hamkorlik qilish uchun bu borada tajribasi bo‘lgan mahalliy ulamolarni jalb etish, chiqish va kirish vizalarini qisqa muddatda rasmiylashtirish choralarini ko‘rish bo‘yicha fikr-mulohazalar bildirildi.

O‘zbekiston musulmonlari idorasi

Matbuot xizmati