Sayt test holatida ishlamoqda!
12 Iyun, 2025   |   16 Zulhijja, 1446

Toshkent shahri
Tong
03:04
Quyosh
04:49
Peshin
12:28
Asr
17:38
Shom
20:00
Xufton
21:38
Bismillah
12 Iyun, 2025, 16 Zulhijja, 1446

Tanlov qizg‘in davom etmoqda

08.11.2017   5525   2 min.
Tanlov qizg‘in davom etmoqda

Avvalroq, O‘zbekiston musulmonlar idorasining majlislar zalida “Yil imomi-2017” ko‘rik tanlovining Respublika bosqichi boshlangani haqida xabar bergan edik.

Tanlov ishtirokchilari raqamlar solingan konvertni olib, berilgan savollarni javob berishni boshlashdi. Imom-xatiblar qo‘yidagi ketma-ketlikda savollarga javob berishmoqda.

Toshkent viloyati Qibray tumani “Sa’dulla ota” jome masjidi imom-xatibi Mirhamidov Obidjon. 

Xorazm viloyati Gurlan tumani “Jayx Jaloliddin Gurgoniy bobo” jome masjidi imom-xatibi Qurbanbayev Muzaffar. 

Sirdaryo viloyati Yangiyer shahar “Abduqahhor xoji” jome masjidi imom-xatibi Aslanbayev Xurshid. 

Farg‘ona viloyati Oltiariq tumani “Oq masjid” jome masjidi imom-xatibi Isaqov Abdutolib. 

Toshkent shahri Shayxontohur tumani “Oqilon” jome masjidi imom-xatibi Isomiddin Axrorov. 

Namangan viloyati Namangan shahar “Shodibek” jome masjidi imom-xatibi Nuriddinov Muhammad. 

Samarqand viloyati Pastdarg‘om tumani “Oshiq ota” jome masjidi imom-xatibi Karimov Azimxon. 

Qashqadaryo viloyati Shahrisabz shahri “Yangi qishloq” jome masjidi imom-xatibi Jumayev Alisher. 

Andijon viloyati Qo‘rg‘ontepa tumani “Ramazon qori” jome masjidi imom-xatibi Davron Temirov. 

Buxoro viloyati Buxoro shahri “Volidai Abduazizxon” jome masjidi imom-xatibi Qudratov Zarif. 

Jizzax viloyati Sharof Rashidov tumani “Yakkaqayrag‘och” jome masjidi imom-xatibi Orolov Usmon. 

Navoiy viloyati Nurota tumani “Chil ustun” jome masjidi imom-xatibi Mo‘binov Jamoliddin. 

Qoraqalpog‘iston Respublikasi Qorauzak tumani “Idris eshon” jome masjidi imom-xatibi Idrisov Ozod. 

Surxondaryo viloyati Boysun tumani “Qadimiy Darband” jome masjidi imom-xatibi Alimov O‘rol. 

Mazkur imom-xatiblar quyidagi yo‘nalishlardagi savollarga javob berishmoqda: 

  1. Qur’oni karimdan 3 oyat tilovat qilish va uni tafsir qilish; 
  1. Ma’naviyat va ma’rifat yo‘nalishidagi savollar; 
  1. Diniy-ekstremistik oqimlar to‘g‘risida savollar; 
  1. Fiqhga oid savollar; 
  1. Islom tarixiga oid savollar; 
  1. “Internetdagi tahdidlardan himoya” kitobi asosidagi savollar; 
  1. OAVdagi chiqishlari va ma’rifiy tadbirlardagi ishtiroki. 

O‘z navbatida hakamlar ishtirokchilarining kasb-mahoratlari va bilim saviyalarini to‘la bilish maqsadida, qo‘shimcha savollar berishmoqda. 

Ishtirokchilarni qo‘llab-quvvatlab turing va bizni kuzatishda davom eting.

O'zbekiston yangiliklari
Boshqa maqolalar

O‘zbekiston xalqiga Qurbon hayiti tabrigi

09.06.2025   7319   4 min.
O‘zbekiston xalqiga Qurbon hayiti tabrigi

Muhtaram vatandoshlar!

Siz, azizlarni, barcha mo‘min-musulmon yurtdoshlarimizni, butun xalqimizni ulug‘ va mo‘tabar ayyom – Qurbon hayiti bilan chin qalbimdan samimiy muborakbod etib, o‘zimning yuksak hurmatim va ezgu tilaklarimni bildirishdan g‘oyat mamnunman.

Jamiki islom ummati uchun qadrli bo‘lgan ushbu shukuhli bayram – Iyd al-Adhoni el-yurtimiz bilan birgalikda tinch va osoyishta muhitda kutib olayotganimiz uchun, avvalo, mehribon va qudratli Alloh taologa behisob shukronalar aytamiz.

Hech shubhasiz, keyingi yillarda Yangi O‘zbekistonda ijtimoiy, xalqchil davlat barpo etish, uning ma’naviy asoslarini mustahkamlash va ta’sirchanligini oshirishda muqaddas islom dini, uning asosiy bayramlaridan biri bo‘lgan Qurbon hayiti ham muhim rol o‘ynamoqda.

Ayniqsa, bu bayramning insonparvarlik, ahillik, saxovat va olijanoblik kabi fazilatlari yurtimizda “Inson qadri uchun, inson baxti uchun” degan ezgu g‘oya asosida amalga oshirilayotgan keng ko‘lamli islohotlarga uyg‘un va hamohang bo‘lib, aholining ehtiyojmand qatlamlarini qo‘llab-quvvatlash, keksalar, yoshlar va xotin-qizlar haqida alohida g‘amxo‘rlik ko‘rsatish, kambag‘allikni qisqartirishga qaratilgan dasturlarimiz samarasini oshirishga xizmat qilayotganini alohida ta’kidlash o‘rinlidir.

Aziz do‘stlar!

Bugungi kunda mamlakatimizda turli millatlar va diniy konfessiyalar o‘rtasidagi hamjihatlikni mustahkamlash, vijdon erkinligini ta’minlash, diniy-ma’rifiy merosimizni asrab-avaylash, yosh avlodni milliy va umumbashariy qadriyatlar ruhida tarbiyalash bo‘yicha ulkan ishlar amalga oshirilmoqda.

Bu haqda so‘z yuritganda, islom dinining ezgu tamoyillarini chuqur o‘rganish, buyuk tariximiz va madaniyatimiz durdonalarini, mashhur allomalarimizning boy merosini to‘plash va keng targ‘ib etishga alohida e’tibor qaratilayotganini ta’kidlash lozim. Jumladan, ko‘hna Sharq mo‘jizasi – Samarqand shahri 2025 yilda islom madaniyati poytaxti, deb e’lon qilindi, ulug‘ vatandoshimiz Imom Moturidiyning 1155 yillik tavallud sanasi yurtimiz bo‘ylab keng nishonlanmoqda, Imom Buxoriy, Imom Moturidiy va Imom Termiziy xalqaro ilmiy-tadqiqot markazlari qatoriga, shu yil Buxoro shahrida o‘z faoliyatini boshlaydigan Bahouddin Naqshband ilmiy-tadqiqot markazi ham qo‘shildi.

Poytaxtimiz Toshkent shahrida bunyod etilayotgan Islom sivilizatsiyasi markazi ilmiy-ma’naviy yo‘nalishdagi ulkan va noyob loyiha sifatida el-yurtimiz va xalqaro jamoatchilikda katta qiziqish uyg‘otmoqda. Bu muazzam maskan ko‘p ming yillik qadimiy tariximiz, boy va betakror milliy madaniyatimizning yorqin  timsoli sifatida Yangi O‘zbekiston hayotidagi g‘oyat muhim voqeaga aylanadi, deb ishonaman.

Hurmatli yurtdoshlar!

Shu saodatli kunlarda 15 ming nafar vatandoshimiz muqaddas haj ziyoratini ado etmoqda. Ezgu duo va niyatlar ijobat bo‘ladigan mana shunday munavvar lahzalarda ularni ham Qurbon hayiti bilan samimiy qutlab, Yaratgandan yurtimizga sog‘-omon qaytib kelishlarini so‘raymiz.

Umid qilamizki, muhtaram hojilarimiz jamiyatimizda birdamlik, oila va mahallalarimizda mehr-oqibat muhitini yanada mustahkamlash, yoshlarimiz tarbiyasini kuchaytirish, ularni ilm-ma’rifatga, zamonaviy kasb-hunarlarni egallashga, Vatan himoyachisi bo‘lishga targ‘ib etish, muhtoj insonlarga ko‘mak berishda alohida ibrat va namuna ko‘rsatadilar.

Qalblarimiz quvonchga to‘lgan ushbu fayzli kunlarda xorijiy davlatlarda bo‘lib turgan vatandoshlarimizni ham bugungi ulug‘ ayyom bilan chin dildan qutlab, ularga sog‘lik-omonlik, baxt va omad tilaymiz.

Jahonning uzoq-yaqin o‘lkalaridagi musulmon ummatini ham qizg‘in tabriklab, ularning xalqlari va mamlakatlariga tinchlik, ravnaq va farovonlik tilab qolamiz.

Aziz va muhtaram vatandoshlar!

Hozirgi kunda dunyo naqadar murakkab va tahlikali bo‘lib borayotganini barchamiz ko‘rib turibmiz. Bunday keskin sharoitda yurtimizda tinchlik, o‘zaro hurmat va totuvlik muhitini saqlab, barcha soha va tarmoqlarda fidokorona mehnat qilib ko‘zlagan yuksak maqsadlarimizga yeta olamiz.

Albatta, o‘z tarixida ne-ne sinov va mashaqqatlardan munosib o‘tgan mard va olijanob xalqimiz bunga har tomonlama qodir.

Bu yo‘lda el-yurtimizga mansub mehr-oqibat, o‘zaro birlik va jipslik biz uchun beqiyos kuch-qudrat manbai bo‘lib xizmat qiladi, deb ishonaman.

Siz, azizlarni muqaddas Qurbon hayiti bilan yana bir bor chin dildan tabriklab, barchangizga tinchlik-xotirjamlik, sihat-salomatlik, xonadonlaringizga fayzu baraka tilayman.

Qutlug‘ ayyom barchamizga muborak bo‘lsin!

 

Shavkat Mirziyoyev,

O‘zbekiston Respublikasi Prezidenti