Islom hamkorlik tashkilotining Ta’lim, fan va madaniyat masalalari bo‘yicha Xalqaro  Islom tashkiloti (ISESCO) shu yilning 1-2 noyabr kunlari Turkiyaning Istambul shahrida Islom madaniyati, san’ati va tarixi bo‘yicha xalqaro tadqiqotlar markazi – (IRCICA) bilan hamkorlikda Islom olamida mavjud bo‘lgan tarixiy va madaniy obidalarni muhofaza etish bo‘yicha xalqaro simpoziumni o‘tkazadi.

Mazkur simpoziumni o‘tkazishdan Islom olamidagi tarixiy va madaniy obidalarni asrashni rivojlantirish, ularni ayrim davlatlarda sodir bo‘layotgan beqaror vaziyatlar tufayli talafotlar yetishi kabi holatlarga uchrashining oldini olish bo‘yicha zarur chora-tadbirlar ko‘rilishi maqsad qilingan.

Xalqaro simpozium ishtirokchilari xavfu xatarga duch kelayotgan madaniy obidalarni muhofaza etish borasidagi xalqaro va mintaqaviy muassasalar va tashkilotlarning rolini faollashtirish to‘g‘risida ham o‘zaro suhbatlar olib borishadi.

Simpozium yakunida “Islom olamida madaniy obidalarni asrashga doir Istambul bayonnomasi” qabul qilinadi va unda obidalarni asrashga doir tavsiyanomalar ishlab chiqiladi. Mazkur simpozium ishida (ISESCO) tashkiloti nomidan vakil sifatida tashkilotning madaniyat ishlari boshqarmasidagi yetakchi mutaxassisi Doktor Muhammad Yunus “Xalqaro (ISESCO) Islom tashkilotining Islom olamida madaniy obidalarni muhofaza etishdagi tashabbuslari va qarashlari” mavzusidagi ma’ruzasi bilan ishtirok etadi.   

Xalqaro aloqalar bo‘limi xodimi

Ilyosxon AHMЕDOV tayyorladi.