Makkai mukarramadagi Masjidul Harom masjidi maxsus xavfsizlik xizmati vakili Samih Sulamining aytishicha, Zam-zam qudug‘iga tutashgan mintaqalardagi yangi obyektlarni ishga tushirish loyihasini boshlash va tavof maydonidagi kengaytirish ishlarini yakuniga yetkazish doirasida tavof maydonining katta bo‘lagi qisqartirildi. Natijada haj va umra xavfsizlik xizmati loyihani bajarish jarayonida tavof maydonida izdihomning oldini olish hamda ziyoratchilarning xavfsizligi va sog‘ligiga ahamiyat qaratish maqsadida bir qator zarur choralarni ko‘rib, reja tuzishdi. Ushbu rejaga ko‘ra, tavofga kirish yo‘li Podshoh Fahd eshigiga olib keluvchi yer osti yo‘llaridan eskalator vositasida Harami sharifga kirish yo‘li orqali amalga oshiriladi. Ziyoratchilar tavof maydonidan sa’y maydoniga Fath eshigidagi yo‘lak orqali o‘tishadi. Tavof maydonidan foydalanishga faqat umra ziyoratchilari uchun ruxsat beriladi. Hozirda yer qavati va birinchi qavatdagi tavof aylanasi maydonchasi umra ziyoratchilari uchun tayyorlab qo‘yildi.
Samih Sulami baytulloh ziyoratchilarini o‘z salomatliklarini muhofaza etishlari uchun xavfsizlik mas’ullari bilan hamkorlik qilishga va tegishli ko‘rsatmalarga rioya etishga chaqirdi.
Xalqaro aloqalar bo‘limi xodimi
Ilyos AHMЕDOV
tayyorladi
Ajdodlarimizning muqaddas xotirasini yod etib, ezgu ishlarini davom ettirish, safimizda yurgan keksalarni e’zozlash – odamiylikning oliy mezoni va xalqimizga xos azaliy qadriyat ekanligining dalolatidir.
9-may – Xotira va qadrlash kuni munosabati bilan muftiy Shayx Nuriddin Xoliqnazar hazratlarining tashabbuslari doirasida O‘zbekiston musulmonlari idorasi tizimida xizmat qilib, nafaqaga chiqqan bir guruh faxriylar holidan xabar olindi.
Ziyorat davomida Diniy idora tizimida uzoq yillar samarali mehnat qilgan, yoshlarga ibrat bo‘lgan ustozlar uylariga borilib, ularga ehtirom bildirildi. Hadyalar ulashildi.
Shu bilan birga, shayx Muhammad Sodiq Muhammad Yusuf, Abdurashid qori Bahromov, Usmonxon domla Alimov, Abdurazzoq hoji Yunusov, Anvar qori Tursunov kabi marhum ulug‘larimizning xonadonlariga borilib, oila ahllari holidan xabar olindi.
Shuningdek, bunday tadbirlar joylardagi vakilliklar tomonidan ham amalga oshirilib, hech kim e’tibordan chetda qolmadi. Bunday tadbirlar orqali Islom dinida o‘tganlar xotirasiga ehtirom, tiriklarni qadrlash, ustozlar o‘gitlaridan bahramand bo‘lish kabi xayrli an’analar bardavom bo‘ladi.
O‘zbekiston musulmonlari idorasi
Matbuot xizmati