Har yili dunyoning turli mamlakatlarida an’anaviy tarzda o‘tkazilib kelinayotgan xalqaro Qur’oni karim musobaqalarida  diyorimizdan  yetishib chiqayotgan iqtidorli qorilarimiz yurtimiz vakili sifatida qatnashib kelmoqda.   Yaqinda shu yilning 7-11 oktyabr kunlari Qur’oni karimni yoddan o‘qish va tafsir qilish bo‘yicha Saudiya Arabistoni Podshohligining Makkai mukarrama shahrida o‘tkazilgan 39-Xalqaro Qur’oni karim musobaqasi bo‘lib o‘tdi.  Unda ikki nafar vakilimiz – Toshkent islom instituti bitiruvchisi  Saydullo qori Tohirov va  “Ko‘kaldosh” islom bilim yurti talabasi Abdulbasir qori Kamolov ishtirok etib qaytishdi.

Mazkur musobaqada dunyodagi 70 dan ortiq davlatdan yetuk Qur’on hofizlari ishtirok etib, ular orasida vakillarimiz Qur’oni  karimning to‘liq 30 porasini va 15 porasini tajvid qoidasi bilan yoddan o‘qib berish yo‘nalishida qatnashdi.

Musobaqa quyidagi 4 yo‘nalishda o‘tkazildi:

1. Qur’on karimni tajvid qoidasi bilan to‘liq yoddan o‘qib berishi bilan birga Qur’oni karimdagi oyati karimalarning tafsirini bilish.
2. Qur’on karimning 30 porasini tajvid qoidasi bilan yoddan o‘qib berish.
3. Qur’on karimning 15 porasini tajvid qoidasi bilan yoddan o‘qib berish.
4. Qur’on karimning 5 porasini tajvid qoidasi bilan yoddan o‘qib berish.

Ushbu yo‘nalishlardagi yuqori uch o‘rinni qo‘lga kiritgan qorilarga sovrinli mukofotlar topshirildi. Qorilarimiz o‘z yo‘nalishida g‘olib o‘rinlardan keyingi kuchli o‘ntalikdan o‘rin egallashdi.

Vakillarimizga musobaqadagi ishtiroki to‘g‘risida tashakkurnoma yorlig‘i taqdim etildi.  Ular Saudiya Arabistoni safari davomida Makkai mukarramada umra ibodatini ado etishdi. Musobaqa tashkiliy hay’ati  tomonidan Makkai mukarrama va Madinai munavvara shaharlaridagi muqaddas qadamjolarga ishtirokchilar uchun ziyorat uyushtirildi.

Xalqaro aloqalar bo‘limi

18.10.2017 yil