(Respublika imom-xatiblarining“Ijtimoiy-ma’naviy
muhitni sog‘lomlashtirish” anjumani sharafiga)
Bu vatanda sharafdadir barcha inson,
Adolatdir har bir ishda oliy mezon,
Egilsa bosh, qilich kesmas – bizga ayon,
Yer yuzida timsoli yo‘q nodir el bu,
Adashganni kechirmoqqa qodir el bu!
Amir Temur so‘zlarini tumor qilgan,
Kechirimlik odatini shior qilgan,
Haqqoniylik tamoyilin hamkor qilgan-
Yer yuzida timsoli yo‘q nodir el bu,
Adashganni kechirmoqqa qodir el bu!
Bag‘rikengdir, bag‘ri gulu rayhon diyor,
Har bir qonun inson uchun bunda dastyor,
Amnistiya akti erur ezgu qaror,
Yer yuzida timsoli yo‘q nodir el bu,
Adashganni kechirmoqqa qodir el bu!
Davlatimiz rahbaridan bu tashabbus,
Sog‘lom muhit ichra hayot sursa ulus,
Gunohkorlar uzrin aytur qilib afsus,
Yer yuzida timsoli yo‘q nodir el bu,
Adashganni kechirmoqqa qodir el bu!
Har bir farzand yurti uchun sodiq o‘g‘lon,
Vatanfurush nomin olmoq qanday yomon,
Ota kabi talabchan-u mehri ummon,
Yer yuzida timsoli yo‘q nodir el bu,
Adashganni kechirmoqqa qodir el bu!
Sog‘lom fikr, teran nigoh, ezgu g‘oya,
Mustaqillik kelajakka zo‘r sarmoya,
Chin insonga sololmagay shubha soya,
Yer yuzida timsoli yo‘q nodir el bu,
Adashganni kechirmoqqa qodir el bu!
Qancha-qancha adashganlar bo‘lib shodon,
Qadam tashlar bugun sog‘lom hayot tomon,
Ular boshin rag‘bat ila silar har on,
Yer yuzida timsoli yo‘q nodir el bu,
Adashganni kechirmoqqa qodir el bu!
Imom-xatib, ulamolar bir tanu jon,
Targ‘ibotu tashviqotda ilg‘or chaqqon,
Anjumanning bosh mavzusi bu jarayon,
Yer yuzida timsoli yo‘q nodir el bu,
Adashganni kechirmoqqa qodir el bu!
Ziyolilar ommasidir bugun yakdil,
Muloqotda ochiladi har qulfi dil,
Qonun, vijdon amriga esh bo‘lgan oqil,
Yer yuzida timsoli yo‘q nodir el bu,
Adashganni kechirmoqqa qodir el bu!
Bilib-bilmay adashganlar bildi bugun,
Yot oqimlar kasofatdir dunyo uchun,
Sarf etishar ezgulikka endi kuchin,
Yer yuzida timsoli yo‘q nodir el bu,
Adashganni kechirmoqqa qodir el bu!
Ijtimoiy ham ma’naviy muhit sog‘lom,
Bunyodkorlik, hurfikrlik ezgu maqom,
Bobomeros hikmatlardan so‘ylab kalom,
Yer yuzida timsoli yo‘q nodir el bu,
Adashganni kechirmoqqa qodir el bu!
Yoshligidan zuryodimiz bo‘lsin ogoh,
Uni yo‘ldan ozdirmasin turfa gumroh,
Ammo, avf bor – g‘o‘rlik sabab qilsa gunoh,
Yer yuzida timsoli yo‘q nodir el bu,
Adashganni kechirmoqqa qodir el bu!
Shu vatandir panohimiz, ona zamin,
Bizdan farzdir asli poklash rux olamin,
Kerak bo‘lsa tutib mehrin jon malhamin,
Yer yuzida timsoli yo‘q nodir el bu,
Adashganni kechirmoqqa qodir el bu!
Kichik xato qilsa - kechmoq kattadan farz,
To‘g‘ri yo‘lga qaytmoqlik ham saboq, bir dars,
Boshin egib adashganlar qilganda arz,
Yer yuzida timsoli yo‘q nodir el bu,
Adashganni kechirmoqqa qodir el bu!
Taraqqiyot sari qadam bu anjuman,
Ibratlarga to‘la olam bu anjuman,
Ko‘ngillarni yoritgan sham’ bu anjuman,
Yer yuzida timsoli yo‘q nodir el bu,
Adashganni kechirmoqqa qodir el bu!
O‘zbekiston – osoyishta –tiniq osmon,
Istiqloldan yashnayotgan so‘lim bo‘ston,
Mas’ul erur vatan uchun har tirik jon,
Yer yuzida timsoli yo‘q nodir el bu,
Adashganni kechirmoqqa qodir el bu!
Abdulahad anjumanda shodu xurram,
Yosh avlodga yorqin kamol tilar har dam,
Taraqqiyot, savob yo‘ldan tashlar qadam,
Yer yuzida timsoli yo‘q nodir el bu,
Adashganni kechirmoqqa qodir el bu!
2017 yil.
Abdulahad qori SHAHRIXONIY,
Bo‘z tumani bosh imom-xatibi.
Oila – inson hayotidagi ma’naviy suyanch, ijtimoiy tartib, nasl davomiyligini ta’minlovchi qo‘rg‘on va mehr-muhabbat maskanidir.
Alloh taolo Qur’oni karimda marhamat qiladi: “Uning alomatlaridan (yana biri) – sizlar (nafsni qondirish jihatidan) taskin topishingiz uchun o‘zlaringizdan juftlar yaratgani va o‘rtangizda inoqlik va mehribonlik paydo qilganidir. Albatta, bunda tafakkur qiladigan kishilar uchun alomatlar bordir” (Rum surasi, 21-oyat).
Bu oyat oila qurishning ilohiy hikmatga ega ekanini, er-xotin munosabatida muhabbat va mehr-shafqat asosiy omil bo‘lishini anglatadi.
Islom nikohni faqat shaxsiy xohish emas, balki ma’naviy, axloqiy va ijtimoiy majburiyat sifatida qabul qilgan. Rasululloh sollallohu alayhi va sallam: “Nikoh mening sunnatimdir. Kim sunnatimdan yuz o‘girsa, mendan emas”, deganlar (Muttafaqun alayh).
Bu hadisga ko‘ra, nikoh musulmon hayotidagi ibodat hisoblanadi. Uning asosiy maqsadlari nafsni halol yo‘l bilan qondirish, nasliy poklik, farzand tarbiyasi va jamiyat barqarorligini ta’minlashdir.
Islomda er va xotinning vazifalari bir-birini to‘ldiruvchi xususiyatga ega. Alloh taolo erkakni mas’uliyatli rahbar, ayolni esa oila mustahkamligini ta’minlovchi qilib yaratgan: “Erkaklar xotinlar ustidan (oila boshlig‘i sifatida doimiy) qoim turuvchilardir. Sabab – Alloh ularning ayrimlari (erkaklar)ni ayrimlari (ayollar)dan (ba’zi xususiyatlarda) ortiq qilgani va (erkaklar o‘z oilasiga) o‘z mol-mulklaridan sarf qilib turishlaridir” (Niso surasi, 34-oyat).
Erkak ayoldan ba’zi xususiyatlarda ortiq qilib yaratilganida bir necha hikmatlar bor. Mufassir ulamolar, jumladan, quyidagi shar’iy nuqtayi nazardan erkaklarga xos xususiyatlarni qayd etishgan: payg‘ambarlik, jismoniy kuch-quvvat, oila nafaqasiga mas’ullik, aqlu idrok, xotira va tafakkurning ziyodaligi, imom-xatiblik, muazzinlik, jamoat bilan namoz o‘qish, juma namozining vojib bo‘lishi, tashriq takbirini aytish, janglarda qatnashish, to‘liq guvohlik, taloq berish huquqiga ega bo‘lish, oilaning unga nisbat berilishi, namoz va ro‘zani uzrsiz ado etish kabilar.
Shu jihatlarni hisobga olib, ayol kishi eriga nisbatan itoatli, hamiyatli va iffatli bo‘lib, oila totuvligi yo‘lida doimiy harakatda bo‘lishi juda matlub ishdir.
Rasuli akram sollallohu alayhi va sallam: “Sizlarning eng yaxshilaringiz o‘z ahliga yaxshilik qiluvchilaringizdir”, deganlar (Imom Termiziy rivoyati).
Erkak oila boshlig‘i sifatida adolatli, g‘amxo‘r va mehribon bo‘lishi kerak. U o‘z ayoli va farzandlarining ehtiyojlarini ta’minlab, ularni to‘g‘ri yo‘lga boshlashi lozim.
Xotinning vazifalari – oilada sog‘lom muhit yaratish, erga itoat va uning sha’nini asrash. U oila tinchligi va farovonligi uchun intilishi, eriga vafodor bo‘lib, farzandlar tarbiyasida fidoyilik ko‘rsatishi lozim.
Qur’oni karimda bunday marhamat qilinadi: “Ular sizlarning libosingiz, sizlar ularga libossiz” (Baqara surasi, 187-oyat).
Bu oyat nikohdagi juftlarning bir-biriga muhtojligi va ular o‘rtasidagi yaqinlikni ta’riflaydi.
Nikoh faqatgina ikki insonning emas, balki oilalar va jamiyatning ham mas’uliyatidir. Ko‘p hollarda ota-onalar, qarindoshlar va jamiyatning qo‘llab-quvvatlashi nikohning mustahkamligida muhim ahamiyat kasb etadi.
Bugungi kunda ko‘pchilik oilaviy muammolar uchinchi tomonlarning (qaynona-qaynota, yaqinlar, do‘stlar) chuqur va nomunosib aralashuvi oqibatida kelib chiqmoqda. Har bir inson o‘ziga tegishli chegarani bilishi zarur.
Ali ibn Abu Tolib roziyallohu anhudan rivoyat qilinadi. Rasululloh sollallohu alayhi va sallam: “Odamlarning arazlashganlarini yarashtirib qo‘yish nafl namoz o‘qishdan va nafl ro‘za tutishdan ko‘ra savobliroqdir”, deganlar (Imom Tabaroniy rivoyati).
Ota-onalar, qarindoshlar – yoshlar hayotiga rahbar sifatida kerakli maslahat beradilar, ammo ularning shaxsiy munosabatlariga befarq yoki ortiqcha aralashish – oilaviy muhitni buzishi, o‘rtadagi muhabbatni so‘ndirishi mumkin.
Ko‘pincha oilada ota-ona va farzandlar, oilaning boshqa a’zolari orasida ham turli kelishmovchilik bo‘lib turadi. Arzimagan sabab-bahonalar bilan tinch xonadonlar mojarolar maskaniga aylanadi. Bir-biriga yaqin, qadrdon, qarindoshlar o‘rtasida mehr-oqibat ko‘tariladi.
Kechira olish – go‘zal fazilat, dinimizda maqtalgan sifatlardan. Bir qarashda oniy yutqazishday ko‘ringan kechira olish katta mojarolarning oldini oladi, g‘alabani ta’minlaydi. “Er-xotinning urishi – doka ro‘molning qurishi” deganlariday, ikki oshufta qalbning arazi uzoqqa bormasligi kunday ravshan.
Sal ixtilof chiqdimi, bir tomon darrov murosa-kelishuv yo‘lini ko‘rishi kerak. Bir tomonning aql-idrok bilan ish tutishi shaytonning bo‘ynini sindirib, katta mojarolarning oldini oladi.
Joriy yilning birinchi choragida viloyat imom-xatiblari, otinoyilari 838 ta ana shunday nizomi oilani yarashtirishib, yoshlarning baxtli hayot kechirishiga sababchi bo‘ldilar.
Xulosa shuki, Islom oilaga yuksak maqom bergan, uni jamiyatning yuragi deb baholagan. Biz oyat va hadislar asosida shu muqaddas ne’matni asrash, mustahkamlash va yoshlarga to‘g‘ri yetkazish yo‘lida jiddiy harakat qilishimiz kerak.
Ubaydulloh ABDULLAYEV,
Farg‘ona viloyati bosh imom-xatibi