Alloh yarlaqagan o‘zbekni azal,
Istibdod avjiga chiqqan bir mahal,
Sizdek o‘g‘lon berdi, dono, bebadal,
Islom ota, abad qalbimizdasiz.
Teng huquqli, azim, mustaqil davlat,
Tezda kuchga to‘lib, quchdi saodat,
Siz tufayli baxtga yuz tutdi millat,
Islom ota, abad qalbimizdasiz.
Barham topdi bari zulmu xiyonat,
Qaddini tikladi, dinu diyonat,
Asriy duolarkim topdi ijobat,
Islom ota, abad qalbimizdasiz.
Har soha rivojda, e’tibor behad,
Ulug‘ ajdodlarga ko‘rsatib hurmat,
O‘zbekni olamga etdingiz ibrat,
Islom ota, abad qalbimizdasiz.
Qatag‘on qilingan beayb ajdod,
Siz sabab oqlandi, nomi barhayot,
Azizlarning ruhin shod aylagan zot,
Islom ota, abad qalbimizdasiz.
Imom Buxoriyning markazi a’lo,
Tadqiqot, ma’rifat ishi behamto,
Zakovatingizga tahsinda dunyo,
Islom ota, abad qalbimizdasiz.
Emin-erkin qilib Qur’on tilovat,
Bezovta yuraklar topdi halovat,
Tazyiqsiz qilinar toat-ibodat,
Islom ota, abad qalbimizdasiz.
Qilgan ishlaringiz ko‘lami cheksiz,
Ta’rif-tavsifiga kalomdir ojiz,
Xalq deb yongan siymo, niyati xolis,
Islom ota, abad qalbimizdasiz.
Iqtisod, siyosat, mafkura bari,
Bo‘ldingiz tinchlikning buyuk sarvari,
Millatlar totuvdir qondosh singari,
Islom ota, abad qalbimizdasiz.
Haj sari ochildi yo‘limiz ravon,
Masjid, ziyoratgoh obod, charog‘on,
Sizga duodadir har bitta inson,
Islom ota, abad qalbimizdasiz.
Temuriy soniysiz, sohibi davron,
Istiqlol yo‘lida ulug‘vor karvon,
O‘zbekiston nomi ellarda doston,
Islom ota, abad qalbimizdasiz.
Xalq ra’yi, istagi siz uchun dastur,
O‘zbekman deganning dilida g‘urur,
Mislsiz rahnamo, olovqalb, yovqur,
Islom ota, abad qalbimizdasiz.
Alloh dargohiga yuzlangan chog‘i,
Kuydirdi dillarni hajringiz dog‘i,
Ey ulug‘ millatning ko‘zu qarog‘i,
Islom ota, abad qalbimizdasiz.
Turkmanda, rusda ham siz uchun yodgor,
O‘zbek o‘g‘loniga hurmat iftixor,
Dunyoni lol etgan dono shahsuvor,
Islom ota, abad qalbimizdasiz.
Ortingizda qoldi, munosib izdosh,
Shavkatli rahnamo elga chin sirdosh,
Toki mahshargacha ruhingiz qo‘ldosh,
Islom ota, abad qalbimizdasiz.
Abdulahad kabi millionlab inson,
Yodlab ruhingizni shod etar chandon,
Tarix sahnasida milliy qahramon,
Islom ota, abad qalbimizdasiz.
Abdulahad qori Shahrixoniy,
Bo‘z tumani bosh imom-xatibi
MUSLIM.UZ
Bismillahir Rohmanir Rohiym
Alloh taologa bitmas-tuganmas hamdu sanolar, Payg‘ambarimizga mukammal va batamom salavotu durudlar bo‘lsin!
Qalbim sururi, ko‘zim quvonchi bo‘lgan aziz farzandim! Siz dunyoga kelganingizda mendanda baxtli inson yo‘q edi. Ilk bor mustaqil qadam bosganingiz, “dadajon” deb, erkalanganingiz, telefon qilib “dada uyga qachon kelasiz?” deganingiz kechagidek yodimda.
Ko‘z ochib yumguncha bir zumda ulg‘aydingiz... Maktabda tengqurlaringiz orasida tarbiyangiz bilan ajralib turardingiz.
Yoshligingizdan orzu qilgan Toshkent Islom institutining talabasi bo‘lish baxtiga erishsin deya kechalari onangizning yig‘lab qilgan duolari, “Allohim farzandimga manfaatli ilm bergin” deb qilgan iltijolarim ijobat bo‘lganini eshitganimda ko‘z yoshlarimni tiyolmagandim. Yuzlab qorako‘zlar ichidan talaba bo‘lish baxti sizga nasib bo‘lgani uchun Robbimga hamdlar aytdim.
Mana oradan 4 yil o‘tdi. Bugun bu fayzli va muborak dargohni tark etmoqdasiz.
Ey Farzandim! Bugun fursatdan foydalanib, Sizga kichik bir nasihatni qilmoqchiman. Unga umringizning oxirgi lahzalarigacha amal qilishingizga Alloh tavfiq berishini so‘rab qolaman.
Aziz dilbandim! Siz endigina 4 bahorni ko‘rgan bolakay edingiz. Jajji qo‘llaringizdan tutib sizni bog‘chaga olib ketardim. Shunda do‘kondagi mashina o‘yinchog‘ini ko‘rib qolib, olib bering deb rosa xarxasha qilgandingiz. Olib berishni juda istardimku, ammo afsuski oldimda shu kichkinagina o‘vinchoqni olib berishga ham pulim yo‘q edi....Jonimni so‘rashsa sizga berishga tayyorman bolam... o‘zimdan afzal inson bo‘lishingiz uchun bor imkoniyatimni ishga solib harakat qilaman. Ba’zan duoda o‘zimni unutsamda, sizni aslo unutmayman.
Oradan yillar o‘tib, Rasulimiz alayhissalomning sunnatlariga muvofiq nikoh to‘yingizni o‘tkazdik. Shu kuni sizni muborak etgani so‘zga chiqqanimda sizga mendan arazlab, hatto gaplashmay qo‘yishingizga sababchi o‘sha kichkina mashinani topshirganimda juda uyalib, yuzlaringiz qizarib ketgandi...
Jonim bolam, niyatim sizni uyaltirish emas... Sizga faqat yaxshiliklarni tilayman. Sizga butun umringiz va oxiratingiz uchun kerak bo‘ladigan muhim bir saboqni amaliy tarzda yetkazgim keldi, xolos...
Unutmangki, kunlar o‘tib Allohning huzuriga qaytarilasiz. Bir kun aniq Robbimizning oldida turamiz. Alloh taolo har birimizning qilgan amalimizni birma-bir hisob-kitob qiladi. Shunday kunda ummati Muhammad bo‘lgan siz dilbandim amallaringizning juda oz va kichkinaligi bilan butun xaloyiqning oldida uyalib qolmang! Buning uchun har bir amalingizni xolis Alloh taolo uchun qiling! Hech kimni g‘iybat qilmang, boshqalarga hasad qilmang!
Unutmangki, siz Alloh taoloning dinini yetkazishdagi omonatdorsiz. Ulug‘ zotlarga ilm beshigi bo‘lgan ma’hadning vakilisiz. Siz ularga so‘zsiz munosib bo‘lishingiz kerak. Zero, xalqimiz muborak Islom dinimizni – imom timsolida ko‘radi.
Bizni zalolatdan hidoyatga, zulmatdan yorug‘likka, jaholatdan ma’rifatga, baxtsizlikdan saodatga olib chiqqan, bu yo‘lda mollarini ham, jonlarini ham ayamagan, hamisha faqat biz bevafo ummatning g‘amida bo‘lgan sevikli Payg‘ambarimiz Muhammad Rasululloh sollallohu alayhi vasallam nimaga buyurgan bo‘lsalar shuni mahkam tuting, nimadan qaytargan bo‘lsalar undan tiyiling. Hadislarini yodlashga haris bo‘ling, hayotlari, sifatlari, xulqlari va yo‘llarini ko‘proq o‘rganing va ularga amal qiling.
Aslo erishgan yutug‘ingiz bilan cheklanib qolmang. Kimdir yoki nimadir uchun ilm olmang. Eng muhimi – ilm ibodat ekanini unutmang!
Qur’onni qo‘lingizdan qo‘ymang. Qur’onga muhabbatli bo‘ling!
Jigarporam, musofirchilik, ota-onadan uzoqda yurish, ularga bo‘lgan mehrni ham uzoqlashtirmasin. Unutmangki, biz sizni yaxshi ko‘ramiz, siz bizning hamisha qalbimizda, duolarimizdasiz.
Sizni ko‘rishimiz bolaligingizni, baxtli onlaringizni, quvonch bilan yugurib quchog‘imizga o‘zingizni otishingizni yodimizga soladi.
Siz kelmay qo‘ysangiz bizning yuraklar siqilib, sog‘inchdan va xavotirdan jam bo‘lmaydi.
Sizdan yagona iltimosimiz shuki, duolaringizda doimo eslab, Alloh taolodan bizga rahm-shafqat so‘rang. Qaniydi, Jannatda barcha ota-onalar qatorida turganimizda ismlarimiz bilan chaqirilib, “farzandingiz Qur’on yodlab, qilgan solih amallari uchun sizga mukofot – izzat toji kiydiriladi” deganini eshitsak edi... Bu bizning eng buyuk orzuimiz.
Alloh taolo barchamizni jannatda birga qilsin! Izzat tojini kiyadigan zotlardan qilsin! Omiyn.
Davron NURMUHAMMAD