To‘y bazmidagi o‘ylar
To‘yxonaga oppoq liboslarda shahzodayu malika bo‘lib kelin bilan kuyov kirib kelishdi. Kelin salom qilish maqsadida bir oz egilar ekan, xijolatdan kattalarning nigohi yerga qadaldi. Atrofdan: “Juda ochiq kiyinibdi”, “Etagini uzun qilgandan ko‘ra yelkasiga tashlasa bo‘lar ekan”, degan dashnomlar quloqqa chalinardi.
Kelin-kuyov to‘rdagi o‘rindiqlarga borib o‘tirishdi. Kuyov kresloda yastanib o‘tirar ekan, xuddi “Mana ko‘rib qo‘yinglar, mening malikamni”, deyayotgandek edi. Jo‘ralar, hatto to‘yga kelgan aksar erkaklarning nigohi shohsupada malikalarday o‘tirgan (aslida malikalar sira ham bunday ochiq-sochiq kiyinishmaydi!) xushsurat kelinga qadalgan... Kelin yuzini ochib, bemalol o‘tirdi. Ammo men o‘ylar iztirobida qiynalardim... Axir harir parda ortidagi chehrani, bu nozik vujudni ko‘z-ko‘z qilish aslo mumkin emas.
To‘yni og‘riqli o‘ylar ila kuzataman. Ketma-ket kelgan taniqli xonandalar qo‘shiqlaridan davra yoshlar diskoteka zaliga aylandi-qoldi. Hatto kelin-kuyovni ham davraga olib chiqishdi. Hind seriallarida kuylanadigan qo‘shiqqa hamohang kelin-kuyov quchoqlashib valsga tushishdi. Bu manzarani qanday izohlash mumkin?! Hammaning nazari ikki yoshda. Atrofni o‘rab olgan yigitlarning qiy-chuvi... So‘ng kelin otasi bilan, keyin qaynotasi bilan ham raqsga tushdi... Qani sharqona odob-axloq, ibo-hayo?! Buni oddiy holatdek qabul qilayotganlarning oriyati, hamiyati qayerda qoldi?
Qizimizni turmushga uzatarkanmiz yoxud o‘g‘limizni uylantirarkanmiz, hayotining oila deb atalmish varag‘ini chiroyli odob-axloq, hayo-andisha bilan ochishida biz, kattalar to‘g‘ri saboq beraylik. Zero, millatimizning o‘ziga xos odobi, andishasi, mehr-muruvvati, iffati bor. Shuni aslo unutmaylik.
Munira ABUBAKIROVA,
O‘zbekiston musulmonlari idorasi xodimasi
Qashqadaryoda diniy ta’lim muassasalariga kirish imtihonlari bo‘lib o‘tmoqda
Bugun, 5 avgust kuni O‘zbekiston musulmonlari idorasi tasarrufidagi oliy va o‘rta maxsus diniy ta’lim muassasalariga kirish test sinovlari 3-hudud Qashqadaryo viloyatida o‘tkazilmoqda.
Imtihonlar Qashqadaryo viloyati, Qarshi shahridagi “Olimpiya va paralimpiya sport turlariga tayyorlash markazi”da bo‘lib o‘tmoqda.
Abituriyentlar uchun muhim eslatma va qoidalar:
– Abituriyent test sinovlariga shaxsni tasdiqlovchi hujjat (pasport yoki ID-karta) hamda imtihon ruxsatnomasi bilan kelishi talab etiladi. Mazkur hujjatlardan biri bo‘lmagan taqdirda abituriyent test sinovlariga kiritilmaydi.
– Abituriyentlardan imtihon ruxsatnomasida ko‘rsatilgan vaqtdan 30 daqiqa oldin imtihon hududiga yetib kelish so‘raladi. O‘z vaqtida kelmaganlar imtihonga qo‘yilmaydi.
– Test davomida mobil telefon, aqlli soat, quloqchin, kalkulyator, lug‘at, kitob, shpargalka hamda har qanday elektron va xotira qurilmalaridan foydalanish qat’iyan man etiladi.
– Boshqalardan ko‘chirish, yordam berish, suhbatlashish, xalaqit berish yoki imtihon platformasida boshqa abituriyentning kabinetiga kirishga urinish holatlari aniqlansa, abituriyent darhol chetlatiladi.
Manzil: Qarshi shahri, Mustaqillik shoh ko‘chasi 13-uy. Murojaat uchun: +998 99 717 0461
Ma’lumot o‘rnida, 3-hudud Qashqadaryo viloyatidan imtihon jarayonlarida 789 nafar abituriyent ishtirok etadi.
O‘zbekiston musulmonlari idorasi
Matbuot xizmati
