O‘zbekiston delegatsiyasi xalqaro forumda muvaffaqiyatli qatnashdi
Shu yil 20-21 sentyabr kunlari O‘zbekiston musulmonlari idorasi raisi o‘rinbosari, Toshkent islom instituti rektori, professor Muhammadolim Muhammadsiddiqov Moskva shahrida bo‘lib o‘tgan “Tinchlik yo‘li: Muloqot birgalikda uyg‘un yashashinng asosi sifatida” XX Xalqaro musulmonlar forumida ishtirok etdi.
Xalqaro forumda dunyoning 30 dan ortiq mamlakatidan kelgan taniqli ulamolar, mashhur muftiylar, professor-olimlar, jamoat va din arboblari hamda xalqaro tashkilotlar rahbarlari ishtirok etdi.
Forumda jahon hamjamiyatining e’tiborini zamonaviy tahdidlar, dinlararo murosasizlikka qaratib, dunyo hamjamiyatini tinchlik-osoyishtalikni qaror toptirishga chaqirildi. Shuningdek, bugungi tahlikali davrda diniy ulamolarning samarali ta’sir mexanizimini shakllantirishga urg‘u berildi.
So‘zga chiqqan notiqlar musulmonlar birdamligi, davlat va din munosabatlari, konfessiyalararo muloqotni rivojlantirish, diniy bag‘rikenglik, zo‘ravonlik va terrorizmga qarshi birgalikda kurashish kabi mavzularda chiqishlar qildi. Xususan, Muhammadolim Muhammadsiddiqov mavzu doirasida muhim ma’ruza bilan ishtirok etdi.
Safar davomida O‘zbekiston musulmonlari idorasi raisi o‘rinbosari Muhammadolim Muhammadsiddiqov Moskva shahridagi Imom al-Buxoriy nomidagi musulmonlar mahalliy diniy tashkiloti rahbari Umid Mamataliyev bilan muloqot o‘tkazildi.
Muloqotda mazkur mamlakatda vaqtincha yashab mehnat qilayotgan vatandoshlar faoliyati, yashash tarzi, muammolari haqida suhbat qilindi. Jumladan, vatandoshlarimizning diniy e’tiqodini to‘g‘ri yo‘lga solish, mazhabsizlikni oldini olish kabi masalalarda olib borilayotgan ishlar haqida so‘z yuritildi.
Shuningdek, vatandoshlar uchun O‘zbekistondan imom-domlalarni jalb qilgan holda o‘quvlarni tashkil etish, ularga ta’lim berishda yurtimizda nashr etilgan diniy adabiyotlarni olib kelish masalalari muhokama etildi.
O‘zbekiston musulmonlari idorasi
Matbuot xizmati
Pol Kapur: «Bu yerda tarixni nafaqat ko‘rasiz, balki uni his qilasiz»
AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur O‘zbekistondagi Islom sivilizatsiyasi markaziga tashrif buyurdi, xabar bermoqda iccu.uz.
Islom sivilizatsiyasining ko‘p asrlik tarixi, uning ilm-fan, madaniyat va ma’rifat taraqqiyotiga qo‘shgan ulkan hissasi O‘zbekistondagi Islom sivilizatsiyasi markazi ekspozitsiyalarida yaxlit va ta’sirchan tarzda namoyon etilgan. Tashrif davomida Samir Pol Kapur islomgacha bo‘lgan davr sivilizatsiyalaridan tortib, Yangi O‘zbekiston davriga qadar bo‘lgan tarixiy jarayonlarni aks ettiruvchi galereyalar, buyuk allomalarning ilmiy-ma’rifiy merosi, noyob qo‘lyozmalar, muqaddas yodgorliklar hamda zamonaviy raqamli texnologiyalar asosida yaratilgan interaktiv ekspozitsiyalar bilan yaqindan tanishdi.
Mehmon ekspozitsiyalarning mazmunan izchilligi va tarixiy jarayonlarni bir-biri bilan uzviy bog‘liq holda namoyon etish usuliga alohida e’tibor qaratdi. Uning qayd etishicha, bu yerda muzey eksponatlari orqali o‘tmish haqida ma’lumot olish bilan cheklanib qolmay, tarixiy davrlar ruhini his qilish, ular o‘rtasidagi bog‘liqlikni anglash imkoni ham mavjud.
Samir Pol Kapur o‘z taassurotlarini quyidagicha ifodaladi:
«Bu muhtasham maskan. Islom tarixi va madaniyatining asrlar davomidagi taraqqiyoti bilan yaqindan tanishish men uchun unutilmas tajriba bo‘ldi. Bu yerda tarixni shunchaki kitob sahifalari orqali emas, balki o‘z ko‘zingiz bilan ko‘rasiz, uni his qilasiz va go‘yo o‘sha davrlarning ichida bo‘lasiz. Shu bois ushbu noyob maskanni barpo etishga hissa qo‘shgan barcha insonlarga samimiy minnatdorchilik bildiraman.
Yoshlarga ham bu yerga kelishni albatta tavsiya qilaman. Chunki bu maskan nafaqat tarixni o‘rganish, balki o‘tmish bilan kelajak o‘rtasidagi uzviy bog‘liqlikni anglash imkonini beradi. Men uchun eng esda qolarli lahzalardan biri Qur’oni karimga bag‘ishlangan golografik namoyish bo‘ldi. U menda katta taassurot va hayajon uyg‘otdi.
Menimcha, bu dargoh islom sivilizatsiyasining jahon tamadduniga qo‘shgan ulkan hissasini butun dunyoga namoyon etishga xizmat qiladi. Shuning uchun har bir inson bu yerga tashrif buyurib, ana shu boy va bebaho meros bilan shaxsan tanishishi lozim».
Pol Kapurning fikricha, Markazning ahamiyati uning tarixiy merosni namoyon etish bilangina cheklanmaydi. Ushbu maskan yosh avlod uchun o‘tmish saboqlarini anglash, ilm-fan va ma’rifatning sivilizatsiya taraqqiyotidagi o‘rnini his etish, milliy va umuminsoniy qadriyatlarga hurmat ruhini shakllantirish uchun ham muhim ma’naviy-ma’rifiy maydon vazifasini o‘taydi.
Tashrif yakunida AQSH Davlat kotibining Janubiy va Markaziy Osiyo ishlari bo‘yicha yordamchisi Samir Pol Kapur Islom sivilizatsiyasi markazidan olgan taassurotlari yuksak ekanini qayd etib, ushbu maskan boy tarixiy merosni zamonaviy muzey texnologiyalari va ta’sirchan taqdimot usullari orqali jahon jamoatchiligiga yetkazishda muhim ahamiyat kasb etishini ta’kidladi.
O‘zbekiston musulmonlari idorasi Matbuot xizmati