Sayt test holatida ishlamoqda!
13 Iyun, 2025   |   17 Zulhijja, 1446

Toshkent shahri
Tong
03:04
Quyosh
04:49
Peshin
12:28
Asr
17:38
Shom
20:00
Xufton
21:38
Bismillah
13 Iyun, 2025, 17 Zulhijja, 1446

50 yillik namozimizni qaytadan o‘qiymiz

27.09.2024   9199   2 min.
50 yillik namozimizni qaytadan o‘qiymiz

Bismillahir Rohmanir Rohiym

Rivoyat qilishlaricha, Abu Yusuf rahimahullohga Hotamul Asom degan zot masjidda zuhddan ma’ruza qilayotgan emish degan xabar keldi. Shunda u kishi shogirdlariga: qani borib eshitaylikchi, nimalar haqida gapirayotgan ekan, deb masjidga bordilar va Hotamul Asomga: “Ey yigit, menga namoz haqida gapirib ber”, dedilar.

Hotamul Asom: “Namozning odoblari haqida aytib beraymi yoki uning kayfiyati haqida so‘rayapsizmi?” dedi.

Abu Yusuf uning bu gapidan taajjubga tushdilar va ichlarida: “Biz undan bitta narsani so‘rasak, u ikkita narsani aytmoqchi”, dedilar. “Mayli bizga namozning odoblari haqida aytib beraqol”, dedilar.

Hotamul Asom so‘z boshladi: “Namozning odoblari budir: Yaratganning amriga itoat etib o‘rindan turmoqlik, savob umidida namozgohga bormoqlik, niyat ila namozga kirmoqlik, Allohni ulug‘lab takbir aytmoqlik, tartil bilan qiroat qilmoqlik, xushu’ ila ruku’ qilmoq, xuzu’ ila sajdaga yiqilmoq, ixlos bilan tashahhud aytmoq, rahmat tilab salom bermoq”, dedi.

Abu Yusuf rahimahulloh: “Endi namozning kayfiyati haqida gapirib ber”, dedilar.

Hotamul Asom so‘z boshladi: “Ka’bani ikki qoshingiz orasiga olasiz, mezonni ko‘z o‘ngingizga keltirasiz, sirot ko‘prigini oyog‘ingiz ostiga, o‘ng yoningizga jannatni, chap yoningizga do‘zaxni keltirasiz, ortingizda esa, o‘lim farishtasi poylab yuribdi. Ana shundan keyin namozingiz qabul bo‘ldimi yoki rad etildimi, shuni o‘ylaysiz”, dedi.

Abu Yusuf so‘radilar: “Sen qachondan beri namozni shunday kayfiyatda o‘qiysan?”.

Hotamul Asom: “Yigirma yildan beri shunday namoz o‘qiyman”, deb javob berdi.

Shundan keyin Abu Yusuf rahimahulloh shogirdlari tomon o‘girilib: “Yuringlar, borib ellik yillik namozimizni qaytadan qazo qilib o‘qib olamiz”, dedilar.

Homidjon domla ISHMATBЕKOV

Boshqa maqolalar
Maqolalar

Mazhabga ergashish dinimiz talabi

13.06.2025   714   3 min.
Mazhabga ergashish dinimiz talabi

“Mazhab” so‘zi arabchada “yo‘l”, “yo‘nalish”, shar’iy istilohda esa “diniy masala bo‘yicha muayyan mujtahid olimning fatvo chiqarish yo‘li” ma’nolarini bildiradi.

Mashhur alloma Ibn Rajab (1335-1393 m.y.): “Ko‘plab mazhablar orasidan faqat to‘rttasining saqlanib qolgani asrlar davomida insonlarni turli ziddiyatlar va ixtiloflardan himoya etishda asos bo‘lgan”, deb yozgan (“To‘rt mazhabdan boshqaga ergashganga raddiya” kitobi).

Ulamolar mazhablarga ergashish Payg‘ambar sollallohu alayhi va sallamning quyidagi hadisiga amal qilishdir, deb ta’kidlaydilar: “Agar ixtilofni ko‘rsangiz, o‘zingizga ko‘pchilik tomonini lozim tuting” (Imom Moja, 3950-hadis).

Mazhablardagi bitta masalaga nisbatan turlicha yondashishlik islom shariatida musulmonlar uchun keng imkoniyatlar mavjudligidan dalolat beradi. Mazhablarda u yoki bu masala islom ahkomlari, muayyan jamiyat, xalq yoki millatning urf-odatlari, qadriyatlari hamda ijtimoiy munosabatlarning mazmunini ham hisobga olgan holda, eng ma’qul shaklda hal qilingan.

Islom ulamolari shar’iy hukmni va uning dalilini bilmaydigan musulmon odam (muqallid)mujtahid olimga taqlid qilishi zarurligini ta’kidlaydilar. Bunga Qur’ondagi ushbu oyatni dalil sifatida keltirish mumkin: “Agar bilmasangiz zikr ahllaridan so‘rang” (Nahl surasi, 43-oyat).

Mazhablarda Qur’on, sunnat, ijmo va qiyosdan dalil sifatida foydalanishning o‘ziga xos qoidalari, usul va tamoyillariga asoslangan muayyan tizim mavjud. Masalalar tizimli ravishda hal bo‘lgan. Mazhabsizlarda esa hech qanday ijtihod usul va qoidalari yo‘q bo‘lib, “Qur’on va Sunnatga murojaat qilamiz” qabilidagi dalilsiz da’vo bilan hukmlar berilmoqda. Maqsadiga, ra’yiga va nafsiga to‘g‘ri kelgan dalillarni olib, qolganlarini tashlash esa yomon oqibatlarni keltirib chiqarmoqda.

Bemazhablar omma musulmonlar ichida ko‘plab noto‘g‘ri talqin qilingan aqidaviy va fiqhiy masalalarni tarqatmoqdalar. Vaholanki, bu masalalar Ahli sunna olimlari tomonidan allaqachon hal qilingan.

Mazhabsizlar tarafdorlarining ayrim iddaolaridan ularning da’volari asossiz ekaniga ishonch hosil qilish mumkin:

– bemazhablar “Qur’on bitta va Payg‘ambar bitta bo‘lsa, to‘rt mazhab orasida fiqhiy ixtiloflar bor, haq bitta emasmi?” deydilar.

Mazhablar bir manba – Qur’on va sunnatga asoslanadi. Mazhablarning biriga ergashgan kishi Qur’on va sunnatga ergashgan bo‘ladi.

– Mazhabsizlik tarafdorlari “Imom Buxoriy bemazhab bo‘lgan”, deb dalil qiladi. Vaholanki, Imom Buxoriy yashagan davrda u kishiga o‘xshash ilmi ijtihod darajasiga yetgan, o‘zi ijtihod qilganlar ko‘p bo‘lgan. Hamma ulamolar ilmi mujtahidlikka yetgan odam, o‘zi ijtihod qiladi, deganlar. Hozir esa o‘sha davrdagi kabi mujtahidlar yo‘q ekanini hisobga olmaydilar.

Aksincha, Qur’on va sunnatdan har kim o‘zboshimcha yangi hukm chiqarish, fitna qo‘zg‘ash kabi islomda qat’iyan man qilingan xatti-harakatlarga sabab bo‘lmoqda. Shu nuqtayi nazardan, marhum Shayx Muhammad Said Ramazon Butiy qayd etganidek: “Mazhabsizlik islom shariatiga tahdid soladigan xatarli bid’atdir”.

Ming afsuslar bo‘lsinki, mana shunday yetuk olimlar bir mazhabni mahkam ushlab, to‘g‘riligini e’tirof qilib turgan bir paytda ba’zi yurtdoshlarimiz hali dastlabki ilmiy ko‘nikmalarni hosil qilmagan bo‘lsalarda: “Men Qur’on va hadisdan o‘zim hukm olaman” deb, da’vo qilib, turli ixtiloflarni keltirib chiqarmoqdalar. Ba’zida o‘zlari adashgani yetmagandek, o‘zgalarni ham yo‘ldan urmoqdalar.

Alloh taolo hammamizni O‘z hidoyatida sobit qilsin.

G‘ulomov FATHULLOH,

Al-Hudaybiya jome’ masjidi imom noibi

MAQOLA