Savol: Ehromdagi kishi badaniga atir surtsa, jinoyat bo‘lishini bilamiz. Kiyimiga tegsa ham shunday bo‘ladimi?
Javob: Bismillahir Rohmanir Rohiym. Ehromdagi shaxsning kiyimiga xushbo‘ylik tegib, shu zahoti yuvib yoki ishqalab yo‘q qilib yuborsa, hech qanday jarima vojib bo‘lmaydi. Agar xushbo‘y holatda bir kun tursa, jonliq so‘yadi. Bir kunga yetmasdan yechgan, almashtirgan yoki yuvib tashlagan bo‘lsa, yarim so’ (2 kg atrofida) bug‘doy yoki uning pulini sadaqa qiladi. “Irshodus soriy” kitobida bunday deyiladi:
وإن أصاب الطيب ثوبه فحكه أي أزاله بالحك أو غسله فلا شيء عليه وإن كثر وإن مكث أي دام عليه أي علي ثوبه يوما فعليه دم وإلا فصدقة
“Agar (ehromdagi shaxsning) kiyimiga xushbo‘ylik tegsa va uni ishqab tashlab yoki yuvish orqali yo‘q qilsa, xushbo‘ylik ko‘p bo‘lsa ham, biror jarima vojib bo‘lmaydi. Agar xushbo‘ylik kiyimida bir kun davomida tursa, jonliq so‘yish vojib bo‘ladi. Bir kunga yetmagan bo‘lsa, sadaqa vojib bo‘ladi”.
Shuni bilish lozimki, bu ehromga kirgandan boshlab, sochini olib, ehromdan chiqqunicha bo‘lgan vaqt oralig‘iga tegishli. Ehromda bo‘lmagan vaqtlarda badani va kiyimiga xushbo‘ylik surtishining zarari yo‘q. Vallohu a’lam.
O‘zbekiston musulmonlari idorasi
Fatvo markazi.
Bugun, Zulhijjaning 8-kuni mehmonxonadan tashkiliy guruh boshchiligida avtobuslarda talbiya aytib, Minoga yetib kelgan bo‘lg‘usi hojilarimiz: "Allohim bu Minodir. Sen do‘stlaringga ato etgan ehsonlaringdan menga ham in’om et!”, deb duolar qilishdi.
Mino maydonida O‘zbekiston hojilari uchun alohida joy ajratilgan. Bu yerda hojilarimiz bemolol ibodat qilishlari uchun sharoit hozirlangan. Shuningdek, tamaddi qilishlari uchun turli xil taomlar, choy, suv kabi ichimliklar chodirlarga olib kelib ulashilmoqda.
Nabiy alayhissalom sunnatlariga muvofiq, bugun Minoda tarviya kuni peshin, asr, shom, xufton namozlari o‘qiladi. Ayni paytda o‘zbekistonlik ziyoratchilar Mino vodiysida erta tongdan to kun botgunga qadar ulamolarning suhbatlaridan bahramand bo‘lib, toatu ibodat va duoyu iltijolar bilan o‘tkazishmoqda.
Alloh taolo barcha hojilar qatorida, yurtimiz hojilarining ham duo va ibodatlarini qabul aylasin.
O‘zbekiston musulmonlari idorasi
Matbuot xizmati