18 noyabr – O‘zbekiston Respublikasi Davlat bayrog‘i qabul qilingan kun

O‘zbekiston Respublikasining Davlat bayrog‘i – faxru g‘ururimiz, jonajon Vatanimizning aziz timsollaridan biri.

Milliy bayrog‘imiz qabul qilingan sana bu yil o‘zgacha shukuh va tantana bilan nishonlanmoqda. Ta’lim maskanlari, mahallalar, harbiy qismlar, tashkilot va idoralarda O‘zbekiston Respublikasi Davlat bayrog‘i qabul qilinganining 33 yilligiga bag‘ishlangan tadbirlar, ma’rifiy anjumanlar, musobaqalar bo‘lib o‘tmoqda.

Jumladan, poytaxtimizdagi Amir Temur xiyoboni bo‘ylab Toshkent shahrida joylashgan kuch tuzilmalari kavaleriya bo‘linmalari ishtirokida “Otliq kavaleriya paradi“ bo‘lib o‘tdi.

Minglab yurtdoshlarimiz, poytaxtimiz mehmonlari, olovqalb yoshlar ana shu betakror tadbirning guvohi bo‘ldi.

Aytish kerakki, ezgu aksiya mamlakatimizda keyingi yillarda ma’naviy-ma’rifiy jabhalarda kechayotgan yangilanish jarayonlarini aks ettirishi bilan birga yoshlarni vatanparvarlik, yurtga sodiqlik, millatparvarlik, faol fuqarolik pozitsiyasiga ega bo‘lgan shaxs etib kamolga yetkazish borasidagi ezgu ishlarning yana bir o‘ziga xos namoyishi bo‘ldi, deyish mumkin.

...Harbiy orkestr sadolari yangraydi. Tillarang tusga kirgan kuz ma’rifiy tadbirga o‘zgacha ko‘rinish, fayz, shukuh bag‘ishlaydi. Yurt bayrog‘ini tutgan minglab alpkelbat harbiy suvoriylar jonajon O‘zbekistonimizning kuch-qudrati, tengsiz shijoati timsoliga aylangan.

Bunday qiziqarli, hayajonli, betakror lahzalarga guvoh bo‘lish maqsadida ko‘plab yurtdoshlarimiz Sohibqiron Amir Temur nomi bilan yuritiluvchi ko‘chalarning yo‘l yoqasida jamuljam bo‘ldi. Yurtdoshlarimiz betakror voqelikni suratga olishga oshiqadilar. Ushbu tadbir vatandoshlarimizga unutilmas lahzalar, o‘z yurtidan, davlat ramzlaridan, mo‘tabar O‘zbekistonimizdan faxrlanish tuyg‘ularini bag‘ishlagani aniq. Chindan ham bayrog‘imiz ta’rifiga so‘z ojiz. G‘oyat chiroyli, umidbaxsh.

Darhaqiqat, millat bayrog‘i – ona Vatan timsoli. U – ota yurt ramzi. Ko‘kda mag‘rur hilpiragan bayrog‘imizga boqib, mustaqillik, farovonlik tushunchalarining mohiyatini yanada chuqurroq anglaymiz!

Bayrog‘imiz bizni ezgu maqsadlar yo‘lida birlashtiradi. Yuksak va ulug‘ ishlarga ruhlantiradi! Shonli, asrlar qa’riga singib ketgan tariximizdan, bobolarimizning pokiza orzu-niyatlari, istiqlolimiz, hurriyatimiz, erk va ozodligimiz, mamlakatimizdagi yangilanish jarayonlaridan, ulkan marralar sari intilgan O‘zbekistonning nurli istiqbolidan so‘zlaydi.

18 noyabr – O‘zbekiston Respublikasi Davlat bayrog‘i qabul qilingan kun munosabati bilan butun yurtimiz bo‘ylab madaniy tadbirlar, aksiya va fleshmoblar o‘tkazilyapti. Respublika Ma’naviyat va ma’rifat markazi, O‘zbekiston mahallalari uyushmasi, Yoshlar ishlari agentligi, Mudofaa vazirligi va Milliy gvardiya hamkorligida o‘ziga xos loyiha amalga oshirilyapti. Rekord darajadagi 100 metrlik bayrog‘imiz yurtimiz bo‘ylab kezib, barchaga g‘urur-iftixor bag‘ishlamoqda. Xorazmdan Toshkent tomon yo‘lga chiqqan bayrog‘imiz jasur harbiylar, shijoatli yoshlar, vatanparvar yurtdoshlarimiz tomonidan dastlab Ichan-qal’adan, keyin Buxoroning Ark-qal’asidan, qadim va hamisha navqiron Samarqandning tarixiy ko‘chalaridan, ulug‘vor Jizzaxdan, vohayu vodiylardan olib o‘tilib, hademay azim poytaxtimizga yetib keladi.

Bayram kuni esa eng katta bayroqni poytaxtimizda ko‘rishingiz mumkin bo‘ladi.

Darhaqiqat, bayrog‘imiz nurli kelajagimiz, mo‘tabar diyorimiz, sha’nimiz, or-nomusimiz, tengsiz iftixorimiz ramzidir.

Nazokat Usmonova, O‘zA muxbiri