Bismillahir Rohmanir Rohiym
Doktor Atsushi Kamal Okuda Tokiodagi Keyo universitetida siyosiy tizimlardan dars beradi. Doktor Okuda Qur’oni karimning bir oyati sababli Islomni qabul qildi. Musulmon bo‘lguniga qadar o‘z hayoti haqida bunday dedi: “Islomdan oldin hayotim juda tartibsiz edi. Musulmon bo‘lganimdan keyin yaratilishimizning asl haqiqatini angladim. Alloh taolo meni hidoyatiga boshlagani hayotimdagi eng baxtli kundir”.
Doktor Atsushi Kamal hayot haqiqatini izlab ko‘plab dinlarni o‘rgandi, lekin ular uning savollariga javob bera olmas, bundan uning hafsalasi pir bo‘lardi.
Kunlarning birida bir musulmon olimning maqolasini o‘qib qoladi. Maqoladagi insoniyatning kelib chiqishi haqidagi oyatlar Okudaning e’tibori tortadi, chunki u hech qachon bunga o‘xshash ma’lumotlarni o‘qimagan edi. Doktor Atsushi Kamal Okudaning Islomni qabul qilishiga ushbu oyat sabab bo‘lgandi: “Batahqiq, Biz insonni quruq loydan, o‘zgartirilgan qora balchiqdan yaratdik” (Hijr surasi, 26-oyat).
Doktor Okuda Islom tenglikni targ‘ib qiluvchi din ekanini tushunib yetadi. Islom dinini yaxshiroq o‘rganadi va nihoyat Islomni qabul qiladi.
Bugungi kunda doktor Atsushi Yaponiyada Islom dinini yoyishga xizmat qilmoqda. Islomni qabul qilish Alloh taoloning eng ulug‘ ne’mati ekanini hamisha ta’kidlab keladi. Doktor Okuda: “Alloh taolo menga Islomni berdi va buni boshqalar bilan baham ko‘rishni o‘zimning burchim deb bilaman” deya ko‘p bora takrorlaydi va ushbu oyatni eslatadi: “Albatta, bu Mening to‘g‘ri yo‘limdir. Bas, unga ergashing. Va boshqa yo‘llarga ergashmang. Bas, sizni Uning yo‘lidan adashtirmasinlar. Mana shu sizga qilgan amrki, shoyad, taqvo qilsangiz” (An’om surasi, 153-oyat).
Davron NURMUHAMMAD
O‘qilishi: Shahidallohu annahu laa ilaha illa huva val malaaikatu va ulul ilmi qooiman bilqisti laa ilaha illa huval ’aziyzul hakiym.
Ma’nosi: "Alloh adolat ila turib, albatta, Undan o‘zga iloh yo‘qligiga shohidlik berdi. Farishtalar va ilm egalari ham guvohlik berdilar. Undan o‘zga iloh yo‘q. U aziz va hakim Zotdir" (Oli Imron surasi, 18-oyat).
Rasululloh sollallohu alayhi vasallam dedilar: "Kim ushbu oyatni o‘qib, oxirida "Allohdan boshqa iloh yo‘q ekanligiga men ham guvohman" desa, Alloh taolo ushbu oyatning harflari adadicha farishtalarni qiyomat kunigacha o‘sha kishining haqqiga istig‘for ayttirib qo‘yadi".
U zot alayhissalom boshqa hadisda bunday deganlar: "Kim uyquga yotishidan oldin ushbu oyatni o‘qisa, Alloh taolo yetmish mingta farishtani yaratadi va ular qiyomat kunigacha o‘sha kishining haqqiga istig‘for aytib turadilar".
Abu G‘olib aytadilar: "Men Kufaga tijorat qilish uchun borganimda A’mashga qo‘shni bo‘lib turdim. Shunda u kishini har kecha ushbu oyatni takror va takror o‘qigani va undan keyin: "Men ham Alloh guvohlik bergan narsaga guvohman, men ushbu guvohligimni Allohga omonat qilib topshiraman. Qiyomat kunida Alloh taolo menga omonatimni qaytargay" deganlarini eshitar edim.
Shunda u kishidan buning sababini so‘raganimda, aytgan edilar: "Abu Voil menga Ibn Mas’uddan rivoyat qilib aytgan, Rasululloh sollallohu alayhi vasallam bunday deganlar: "Kim ushbu oyatni o‘qib, oxirida ushbu kalimalarni aytsa, qiyomat kunida Alloh taolo unga xitob qilib bunday deydi: "Bandam menga bergan va’dangda turding, ya’ni tavhidda, Men ham O‘z va’damda turaman. Ey, maloikalarim! Jannatning hamma eshiklarini ochinglar, bu bandam xohlagan eshigidan kirsin", deydi".