O‘zbekiston ziyorat turizmi salohiyati Malayziya aholisi o‘rtasida keng targ‘ib qilinmoqda
Joriy yilning 4-11 noyabr kunlari Malayziyaning Perlis shtati muftiysi, mamlakatimizning ziyorat turizmi bo‘yicha elchisi doktor Moxd Asri Zaynul Abidin boshchiligidagi delegatsiya O‘zbekistonda bo‘ldi. Bu haqda O‘zbekiston Jurnalistlar uyushmasi xabar berdi.
Safar O‘zbekiston turizm salohiyatini Malayziya va Janubiy-Sharqiy Osiyo mintaqasida keng targ‘ib qilish bo‘yicha qo‘shma media loyiha doirasida mamlakatimiz elchixonasi, O‘zbekiston musulmonlari idorasi, Turizm qo‘mitasi hamda mahalliy turkompaniya bilan hamkorlikda amalga oshirildi.
Bir hafta davom etgan safar chog‘ida Buxoro, Samarqand, Toshkent viloyatlarida va Toshkent shahrida O‘zbekiston ziyorat turizm salohiyati, madaniy merosi, islom dunyosiga oid ziyoratgohlari hamda o‘zbek xalqining an’analariga bag‘ishlangan turkum podkasdlar suratga olindi va ijtimoiy tarmoqlarda keng yoritildi.
Shuningdek, Malayziya delegatsiyasi Buxoro va Samarqand viloyatlari imom-xatiblari bilan uchrashuvlar o‘tkazdi. Malayziyalik diniy arbob ilk bor Buxorodagi Mir Arab madrasasida va Samarqanddagi "Ipak yo‘li" xalqaro turizm va madaniy meros universitetida ma’ruzalar o‘qidi.
Malayziyaliklar respublikaning tarixiy va zamonaviy sayyohlik markazlari, boy madaniyati, betakror arxitekturasi, shu jumladan Hazrati Imom majmuasi faoliyati, "Amirsoy" tog‘-chang‘i kurortidagi zamonaviy infratuzilmalar, "Usmon mus'hafi" Qur’oni karimning bugungi kungacha saqlanib qolgan eng qadimiy qo‘lyozmasi bilan yaqindan tanishish imkoniyatiga ega bo‘ldilar.
Safar doirasida doktor Moxd Asri Zaynul Abidinning O‘zbekistonning tarixiy obidalari fonida suratga olingan mamlakatimiz zaminida yashab o‘tgan ulamolarning islom dunyosi rivojida tutgan o‘rni haqidagi ma’ruzalari yurtimizdagi tabarruk qadamjolarga kelayotgan ziyoratchilar sonining oshishiga o‘z hissasini qo‘shadi.
O‘zbekiston musulmonlari idorasi
Matbuot xizmati
Malayziya telekanalida O‘zbekistonning ziyorat turizmi imkoniyatlari keng yoritildi
Malayziyaning “Berita RTM” telekanalida O‘zbekistonda ziyorat turizmi sohasida amalga oshirilayotgan islohotlarga bag‘ishlangan maxsus dastur namoyish etildi, deb xabar bermoqda “Dunyo” AA.
Mamlakatimiz mustaqilligining 35 yilligi arafasida efirga uzatilgan ushbu ko‘rsatuvda malayziyalik professorlar – Badrul Isa va Norfadilah Kamaruddin tomonidan ishlab chiqilgan “O‘zbekiston–Malayziya: kreativ turizm” nomli loyiha taqdim etildi.
Olimlar tashabbusi bilan yaratilgan mazkur loyiha mamlakatimizning Malayziyadagi elchixonasi, Turizm qo‘mitasi va Islom sivilizatsiyasi markazi hamkorligida amalga oshirildi.
Tashabbus O‘zbekistonning turizm imkoniyatlari haqida “Visual storytelling” formatida professional raqamli kontent yaratishni nazarda tutadi.
Loyihaga ko‘ra, 17–31 avgust kunlari Malayziya UiTM texnologiya universitetining professional fotograflari va dizaynerlaridan iborat ijodiy jamoa Toshkent, Samarqand, Buxoro va Xorazmda suratga olish ishlarini olib boradi.
Malayziyalik ijodkorlar yurtimiz haqida tayyorlagan foto va videomateriallar “Instagram”, “Facebook”, “TikTok”, “YouTube” kabi internet platformalarda joylashtirilishi rejalashtirilgan. Loyihada yurtimiz oliy o‘quv yurtlarining dizayn, san’at, turizm va mehmonxona biznesi yo‘nalishidagi talabalari ham ishtirok etadi. Bu akademik, turizm va ijodiy sohalarda tajriba almashishni tashkil etish imkonini beradi.
Dasturda fikr bildirgan Badrul Isa loyiha ASЕAN mamlakatlari va musulmon olamida O‘zbekistonni yanada kengroq tanitishga xizmat qilishini ta’kidladi. Uning fikricha, raqamli platformalar orqali mamlakatimiz tarixiy merosi, ziyorat turizmi va amalga oshirilayotgan so‘nggi o‘zgarishlari keng yoritiladi.
“Biz boy tarixiy meros, yuksak madaniyat va mehmondo‘st xalqqa ega bo‘lgan O‘zbekistonni ASЕAN mintaqasi aholisi tomonidan qayta kashf etilishini istaymiz”, – dedi professor.
Shuningdek, u O‘zbekiston xalqini mustaqillikning 35 yilligi bilan tabriklab, loyiha natijalari ushbu sanaga munosib sovg‘a bo‘lishini qayd etdi.
Ushbu tashabbus O‘zbekistonning ziyorat turizmini ommalashtirish va ASЕAN mamlakatlaridan ko‘proq sayyohlarni jalb qilishga xizmat qilishi kutilmoqda.
O‘zbekiston musulmonlari idorasi Matbuot xizmati
- «
- »