“Hozirgi zamonda men o‘qigan kitoblarni o‘qigan biron odamni ko‘rmaganman”

Ushbu jumlalarni hijriy o‘ninchi asrda yashab o‘tgan mashhur olim Abul Mavohib Sha’roniy o‘zlarining "Latoiful minan" kitoblarida yozganlar. U Zot buni faxr uchun emas, balki Alloh taolo bergan ne’matlar qatorida zikr qilganlar. Imom Sha’roniy so‘zlarining davomida qariyb mingga yaqin kitoblarni nomini sanab o‘tib, o‘qigan kitoblari ichida eng asosiylari mana shular ekanini, hamma kitoblarning nomini birma-bir yozishi vaqt va kitobdan joyni egallashini aytadilar. Darvoqe’, ushbu olim mutolaa qilib chiqqan kitoblari orasida, birgina kitob qirq besh jildni tashkil qiluvchi tafsirga oid manbalar ham bor.  

Imom Sha’roniy o‘z davrining 50 dan ortiq eng mashhur shayx va olimlaridan ta’lim olgan. Alloh taolo ilmiga baraka berib, diniy fanlarga doir 300 dan ortiq kitoblar yozib qoldirgan.  

Xullas, tafsir, hadis, aqida, fiqh, usulul fiqh va boshqa diniy ilmlarda zamonasining eng bilimdoni bo‘lgan ushbu olim mazhabda Imom Shofe’iyga taqlid qilgan! Aqidada ahli sunna val jamoa — Imom Moturidiy va Imom Ash’ariy manhajida, tasavvufda esa Shoziliyya tariqatida bo‘lgan. 

Endi hozirgi kunimizda bir nechta hadisni o‘qib, uni o‘zicha tushunib olib “Men Qur’on va sunnatdan o‘zim hukm olaman” deydigan yoshlar insof qilsalar bo‘lardi...

Abdullatif Tursunov