Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Bir badaviy Madina ko‘chalariga kelib, shahardagi eng saxiy inson kim ekanini so‘radi. Odamlar: "Husayn ibn Aliy", deyishdi. Badaviy Husayn roziyallohu anhuni masjidda namoz o‘qiyotganida topdi. Husayn roziyallohu anhuning namoz o‘qib bo‘lishini kutib, ikki tomonga salom berishi bilan dardini tushuntirib: "Sizga ishongan odam pushaymon bo‘lmaydi, deyishdi", dedi. Husayn roziyallohu anxu darhol o‘rnidan turib, uyiga qarab ketdi, badaviy ham uning orqasidan ergashdi.
U uyiga yetib kelib, xizmatkori Kanbardan: "Hijoz mulkidan biror narsa qolganmi?" deb so‘radi. Kanbar: "Ha, to‘rt ming dinor qolgan", dedi. Husayn roziyalloxu anxu: "O‘sha pulni olib kel, bu molga bizdan ham munosibroq odam keldi", dedi. Oradan ko‘p vaqt o‘tmay, Husayn roziyallohu anhu qo‘lida to‘rt ming dinor bilan qaytib keldi va uni badaviyga berib, agar oz bo‘lsa, uni kechirishini so‘radi. Bo‘lgan voqeadan hayron bo‘lgan badaviy dinorlarni qo‘liga oldiyu, yig‘lab:
"Bir kun kelib, shunday mard odamning yer bag‘riga ketishi nadomat bo‘lmaydimi?" dedi. Keyin quyidagi she’rni o‘qidi:
O‘lurmi shijoat, o‘lurmi mardlik?!
Yer ostida qolurmi yoki saxiylik?!
Yerga ko‘milurmi yo odamiylik?!
Mardlik odamlarning yo‘lin yoritur!
Mardlik tunni aylar xuddi kunduzdek.
«Millioner sahobalar» kitobidan
1. Duo qilish. Bu kun qilingan duolar eng afzal duodir.
Solihlardan biri aytadi: "Allohga qasam! Arafa kuni biror duo qilsam, bir yil o‘tmasidan turib uni xuddi yorishgan tong kabi amalga oshganini ko‘rdim".
O‘tgan solihlar ehtiyojlari uchun qiladigan duolarini arafa kuniga saqlab qo‘yishar edi. Qanchadan qancha orzu-umidlar va duolar arafa kunida ijobat qilingan.
2. Ushbu duoni ko‘p qilish. Nabiy sollallohu alayhi vasallam: “Duolarning yaxshisi arafa kunidagi, men va mendan oldingi nabiylarning “Laa ilaha illallohu vahdahu laa shariyka lahu, lahul mulku va lahul hamdu va huva ’ala kulli shayin qodiyr”, deb aytgan duosidir”, dedilar.
3. Allohdan do‘zaxdan panoh so‘rash. Bu kundan ko‘ra do‘zaxdan ko‘p ozod bo‘ladigan kun yo‘q. Nabiy sollallohu alayhi vasallam aytdilar: “Arafa kuni, Alloh bandalarni do‘zaxdan ko‘p ozod qilganchalik boshqa biror kun yo‘q!”.
4. Takbiri tashriq aytish. Bu kunning bomdod namozidan boshlab takbir aytiladi. “Allohu akbar! Allohu akbar! Allohu akbar! Laa ilaha illallohu vallohu akbar! Allohu akbar va lillaahil hamd”.
5. Ro‘za tutish. Bu kun tutilgan ro‘za ikki yillik gunohlarga kafforot bo‘ladi. Rasululloh sollallohu alayhi vasallam: “Arafa kunining ro‘zasi undan oldingi va undan keyingi yillardagi gunohlarga kafforot bo‘ladi deb Allohdan umid qilaman”, dedilar (Imom Muslim rivoyati).
Arafa kuningiz muborak bo‘lsin. Alloh taolo sizni bu kunning fazilatlaridan to‘liq bahramand etsin.
Davron NURMUHAMMAD