Bismillahir Rohmanir Rohiym
Hayot tarzingizni hech kimga oshkor qilmang.
Sizga hasad qilishi mumkin, kimki uyingizga ko‘p marta kirib, unda nimalar borligini bilgan bo‘lsa.
Hech kim sizni uyingizni o‘mara olmaydi, faqat uyingizga kirib, undagi ma’lumotga ega bo‘lgan kishigina o‘g‘rilay oladi.
Hech kim sizning rejalaringizni barbod qila olmaydi, faqat siz unga sirlaringizni oshkor qilgan kimsagina barbod qila oladi.
Siringiz asiringiz, uni oshkor qildingizmi, bas siz o‘zingiz uning asiriga aylanasiz.
Kimdir sizga hasad qilib nojo‘ya maslahat berish orqali ham sizni rejangizni barbod qilishga harakat qilishi mumkin.
Hech kim oilangizga fitna qila olmaydi, faqat uyingizga ko‘p kirib yurgan odamgina bu ishni qila oladi.
Nuqsonlaringizni ham faqat yaqin tanish odamlaringizgina bilishadi.
Har kimning eng yaqin kishisi bor. Lekin har qanday holatda ham siringizni saqlang. O‘zingiz saqlashga qodir bo‘lmagan narsani, boshqalar saqlashini kutmang.
Men bu yerda odamlar bilan aloqani uzish kerak demoqchi emasman. Yo‘q, balki hamma narsada chegaralarni belgilab olish kerakligini aytmoqchiman va bu chegaralardan o‘tmaslik kerak. Hayotingizni hech kimga oshkor qilmang, chunki odamlar qachon o‘zgaradi, bilmaysiz.
Bir vaqtlar qalbingizga va ruhingizga eng yaqin bo‘lgan odamlar keyinchalik siz eng ko‘p qo‘rqadigan odamlarga aylanib qolishlari mumkin. Chunki siz ularga qachonlardir o‘zingizni, sirlaringizni va nuqsonlaringizni ishonib topshirgansiz.
Siringiz sizning asiringiz bo‘lsin. Uyingiz sirli bo‘lsin va oilangiz bilan aralashish uchun hech kimga ruxsat bermang, qanchalik yaqin qarindosh bo‘lmasin. Uyingiz sirlarini hech kimga aytmang. Agar muvaffaqiyatingizga ishonchingiz komil bo‘lsa, hech kimdan maslahat so‘ramang.
Xursandchilik qalbingizga kirganida ega bo‘lgan narsalaringizni tarqatib yubormang, g‘azab paytida esa o‘zingizning ega bo‘lgan narsalaringizdan voz kechib yubormang. G‘azab paytida tilingizni tiying, quvonch paytida esa saxiyligingizni nazorat qiling. Uzoqni o‘ylang va yaqindagiga o‘ralashib qolmang.
Shunchaki maslahat.
Diyorimizga ulug‘ ayyom kirib kelmoqda. Qutlug‘ Iydul Azho vatandoshlarimizni xayru saxovat, mehr-oqibat sari chorlaydi. Bu bayram chin ma’noda odamiylik ayyomi. Insonlarga mehr, o‘ksik ko‘ngillarga shodlik ulashish fursati.
Qalblari himmat va karam ne’matidan bobahra xalqimiz bu muazzam kunlarni boy bermaslik uchun fursatni g‘animat biladilar va savobdan bahramand bo‘lib qolishga harakat qiladilar.
Dinimiz ko‘rsatmalari, shariat hukmlarini ustivor tutgan qodir vatandoshlarimiz qurbonliklar qilib, Haqni rozi qilishga, haqdorlar ko‘nglini olishga intiladilar. Yaratganning rahmati yog‘ilib turgan damlarda duolar mustajob bo‘ladi. Alloh taolo o‘zining kalomida “Parvardigoringiz uchungina namoz o‘qing va qurbonlik qiling”, - deb marhamat qiladi.
Bu borada sarvari koinot sayyidimiz ibratlari o‘rinli. Oila a’zolarimizni yo‘qlash, qo‘shnilar holidan xabar olishda, miskinlarni sevintirish-u, xastalar ahvolidan ogoh bo‘lishda ularning hadisi muboraklari bizga nurli yo‘l, deymiz.
Amallar ko‘p. Ularga beriladigan savoblarning darajasi amalga qarab belgilanadi. Eng savobi ko‘p amal bu farz hisoblansa, boshqalarga yaxshilik ulashish undan keyingi o‘rinda turadigan ulug‘ ibodatdir!
Payg‘ambarimiz sollallohu alayhi vasallam muborak hadislarida boshqalarga qilinadigan yaxshilikni farzdan keyingi o‘rinda turishini bayon qilib shunday dedilar: “Farzlarni ado qilishdan keyingi o‘rinda turadigan Allohga eng suyukli bo‘lgan amal bu musulmoning qalbiga xursandchilikni kiritishdir”.
Shuning uchun Shayx Abdulloh Hoshim rahmatullohi alayh qozilikdan kelgan maoshning teng yarmiga shirinlik sotib olib, o‘zlari bilan olib yurar va har doim uchratgan bolaga shirinlikdan berib, uni xursand qilar edilar.
Ulug‘ kunlarda turibmiz. Har damni g‘animat bilishlik, bir birimizga saxovatda ibrat bo‘lishimiz savobli amallar ekanini his qilmog‘imiz lozim. Bu kunda isrofgarchilikdan xoli dasturxonlar yozish, borimizni boshqalar bilan bo‘lishishga intilishimiz darkor. Xayrni, yaxshilikni gunohga almashtirib qo‘ymaslik uchun ham uyg‘oq ko‘ngil bo‘lish talab etiladi.
Bugun muazzam kunlar og‘ushidamiz, dedik. Vatandoshlarimiz ulug‘ safarlarni ixtiyor etganlar. Ayni fursatlarda hojilarimiz Mino, Arofat vodiylarida, Muzdalifada – duolar qabul bo‘ladigan makonlarda, zamonlarda ibodatlar qilib, elu yurtga tinchlik, osoyishtalik so‘ramoqdalar. Bu duolar barakotidan diyorimiz ahliga qancha yaxshiliklar yetishadi, inshaalloh. Ibodatlar huzurini totgan odamlarning qalbi salim, ehsonu, muruvvatda peshqadam bo‘lishlari bu eng katta yaxshilik aslida. Hojilarimiz safar odoblarini tushunib, ulug‘ dargohlardan nasibador bo‘lib qaytadilar. Diyorimizga qaytganlaridan so‘ng esa yoshlarimiz ma’naviyatiga kamarbasta bo‘ladigan, Haq va haqiqat yo‘lida sidqidil xizmat qiladigan xolis Haq xizmatchilariga aylanadilar, degan umidimiz bor. Bunday ulug‘ ziyoratlar insonni qaysi yoshda bo‘lmasin, ezguliklarga xayrixox qiladi. O‘zgalar qalbini tushunishga, vatan va xalq manfaati yo‘lida sa’y-harakatga chorlaydi.
Bu kunlarning Yaratgan dargohidagi o‘rni musharraf. Hayit kechalarida duolar qabul bo‘ladi. Qurbonlik go‘shtlaridan nasibador oilalarga xursandchilik kiradi. Bu ehsonlar ortida ham mehr-oqibat, o‘zaro bag‘rikenglik maqsadi mujassam. Biz bu makonda yasharkanmiz, turli millatlar vakillari yagona O‘zbekistonning fuqarolarimiz. O‘zaro tenglik, adolat hukm surgan yurtda birodarlik, yaxshi qo‘shnichilik an’analarini qadrlab yashamoqdamiz. Mahallalarda hamkorlik bilan obodlik sari yo‘l ochilyapti. Vatanimiz kundan- kunga farovon, xalqimiz turmushi chiroyli bo‘lib boryapti. Bu ne’matlarga shukrona qilish, to‘g‘ri yo‘lda sobitqadam bo‘lish ma’rifatimiz, ma’naviyatimiz kamolidan darak beradi.
Xalqimizga saodat va sano ayyomi – Qurbon hayiti muborak bo‘lsin! Barchamizni Yaratgan xayru xursandchiliklar ustida bardavom qilsin. Vatanimiz tinch, yurtdoshlarimizning oilalari farovon bo‘lsin.
Xolmurod MAMAJONOV,
Farg‘ona shahar “Ummul quro” masjidi imom-xatibi