Bismillahir Rohmanir Rohiym
Cavol: Hayzdagi ayol sajda oyatini eshitsa, sajda qiladimi?
Javob: Uzrli ayol sajda oyatini eshitsa, sajda qilmaydi. Agar sajda qilsa, gunohkor bo‘ladi. Hayzli yoki nifosdagi ayol namoz o‘qishga buyurilmagani uchun unga tilovat sajdasini qilish vojib emas. Lekin junub kimsaning hukmi boshqacha: erkakmi, ayolmi — junub holatida sajda oyatini eshitsa, tilovat sajdasi ularga vojib bo‘ladi. Poklanganidan keyin bu sajdani ado etishi kerak. Bu haqda Imom Saraxsiy bunday deydilar:
وليس على الحائض سجدة قرأت أو سمعت" لأن السجدة ركن من الصلاة والحائض لا تلزمها الصلاة مع تقرر السبب وهو شهود الوقت فلا يلزمها السجدة أيضا بخلاف الجنب فإنه تلزمه الصلاة بسبب الوقت.
“Hayzdagi ayol sajda oyatini o‘qigani yoki eshitgani sababli sajda qilishi vojib bo‘lmaydi. Chunki sajda – namozning bir rukni (farzi). Hayzdagi ayolga garchi namozning sababi – vaqti kirsada namoz o‘qishi lozim bo‘lmaydi. Shu kabi sajdai tilovat qilishi ham lozim emas, lekin junub shaxsga vojib bo‘ladi. Chunki junub kishi namoz vaqti bo‘lganda (g‘usl qilib) namoz o‘qishi lozimdir” (“Al-Mabsut”). Vallohu a’lam.
O‘zbekiston musulmonlari idorasi
Fatvo markazi.
#xabar #haj2025
Bugun kechqurun 15 ming o‘zbekistonlik ziyoratchilar Makkai mukarramadagi mehmonxonalardan haj ibodatining asosiy amallarini bajarish uchun Mino vodiysiga yo‘l oladilar.
Aytish joizki, bugungi kungacha O‘zbekiston ishchi guruhi vakillari tomonidan ziyoratchilarimiz ulug‘ ibodatni bekamu ko‘st ado etishlari uchun Mino, Arofat va Muzdalifa vodiylarida barcha shart-sharoitlar to‘liq tayyor holatga keltirilgan.
Ayni maqsadda ishchi guruhi va shifokorlarning ma’lum a’zolari mazkur muborak vodiylarda bir muddat oldin borib, ziyoratchilarimizni kutib olishga shay bo‘lib turibdilar.
Xususan, bu yil, O‘zbekiston tomonining talabiga muvofiq, Arafot hududidagi chodirlar yopiq tarzda barpo etildi. Ularning atrofi issiq o‘tkazmaydigan panellar bilan o‘ralgan, sovutish tizimi o‘rnatilgan, gilam va to‘shaklar solingan. Bu hozirgi yoz kunlarida ziyoratchilarga qo‘shimcha qulaylik yaratadi.
Shuningdek, barcha sharoitlarga ega tibbiyot markazlari, 3 mahal issiq ovqat va 24 soat davomida choy va salqin ichimliklar bilan ta’minlash yo‘lga qo‘yiladi. Arafotda Muzdalifada foydalanish uchun hojilarga maxsus to‘shak va soyabonlar tarqatish rejalashtirilgan.
Ayni paytgacha soha rahbarlari tomonidan ishchi guruhi a’zolari, ellikboshilar va shifokorlar jamoasiga haj jarayonlarini namunali boshqarish, belgilangan tartiblarga rioya etish va shar’iy masalalar haqida batafsil tushuntirildi.
O‘zbekiston musulmonlari idorasi
Matbuot xizmati