Abu Hurayra roziyallohu anhudan rivoyat qilinadi. Rasululloh sollallohu alayhi vasallam: “Subhonallohi valhamdu lillahi va laa ilaha illallohu vallohu akbar”, deyishim men uchun quyosh chiqib, nur sochganidan yaxshiroqdir, dedilar (Imom Muslim rivoyati).
Imom Buxoriy, Imom Muslim va Imom Termiziy rivoyat qilgan hadisi sharifda buni aytgan kishining gunohlari dengiz ko‘pigichalik bo‘lsa-da, kechirib yuborilishi aytiladi.
Abu Muso Ash’ariy roziyallohu anhudan rivoyat qilinadi. Rasululloh sollallohu alayhi vasallam menga: "Jannat xazinalaridan birini senga aytaymi?" dedilar. Men: "Ha, ayting, Yo Rasululloh sollallohu alayhi vasallam" dedim. Shunda u zot alayhissalom: "Laa havla va laa quvvata illa billahni ayt, u jannat xazinalaridandir", dedilar (Imom Buxoriy va Imom Muslim rivoyatlari).
Jobir roziyallohu anhudan rivoyat qilinadi. Rasululloh sollallohu alayhi vasallam: "Zikrlarning afzali Laa ilaha illallohdir", dedilar (Imom Termiziy rivoyati).
Juvayriya roziyallohu anhodan rivoyat qilinadi. Rasululloh sollallohu alayhi vasallam ertalab subh namozi paytida uning huzuridan chiqib ketdilar. U namoz o‘qiydigan xonasida edi. So‘ngra zuho namozini o‘qib bo‘lib qaytib kelsalar, Juvayriya roziyallohu anho hali ham o‘tirgan edi. Shunda Rasululloh sollallohu alayhi vasallam: “Chiqib ketganimdan beri shu holatda o‘tiribsanmi?” deb so‘radilar. Onamiz roziyallohu anho: “Ha”, deya javob berdi. Rasululloh sollallohu alayhi vasallam: Men sendan keyin to‘rtta kalimani uch martadan aytdim, agar ular tarozida o‘lchansa, sen bugun aytgan narsalardan og‘ir keladi. Ular: "Subhonallohi va bihamdihi ’adada xolqihi va rizo nafsihi va zinata ’arshihi va midada kalimatihi", dedilar (Imom Muslim rivoyati).
Ko‘p salavot aytish orqali Rasululloh sollallohu alayhi vasallamning shafoatlariga noil bo‘lish mumkin. Imom Ahmad ibn Hanbal va Imom ibn Mojalar rivoyat qilgan hadisda Omir ibn Robi’aning otalari quyidagilarni aytadilar: «Rasululloh sollallohu alayhi vasallamning: "Kim menga salavot aytsa, farishtalar unga ham menga aytgan salavotining barobarida salavot aytib turadilar. Banda salavotni xohlasa, oz aytsin, xohlasa ko‘p”, deganlarini eshitdim».
Anas ibn Molik roziyallohu anhudan rivoyat qilingan boshqa bir hadisda Rasululloh sollallohu alayhi vasallam: “Kim menga bir marta salavot aytsa, Alloh unga o‘n marta salavot aytadi va o‘nta xatosini o‘chiradi”, deganlar.
Umrimizning har bir daqiqasi qadrli. Daqiqalarnigina emas, soniyalarni ham o‘z foydamizga hal etishning juda oson yo‘li chin ixlosdadir
Davron NURMUHAMMAD
#xabar #haj2025
Shu kunlarda Makkai mukarramada haj amallarini ado etishga tayyorgarlik ko‘rayotgan ziyoratchilar uchun taniqli ulamolar, imom-domlalar bilan bir qatorda mutaxassis va otinoyilar tomonidan ham ma’rifiy suhbatlar uzviy davom ettirilmoqda.
Jumladan, O‘zbekiston musulmonlari idorasi Xotin-qizlar masalalari bo‘yicha bo‘lim xodimi Munira Abubakirova va Toshkent shahar Yangihayot tumani bosh imom-xatibining xotin-qizlar masalalari bo‘yicha yordamchisi Sijoat Sharipova yurtimizning har bir hududidan kelgan ayol ziyoratchilar ishtirokida suhbatlar o‘tkazmoqda.
Shuningdek, oliy toifali shifokor Muhabbat Saatova ham tibbiy maslahatlar bermoqda.
Ma’rifiy uchrashuvlarda muborak zaminda toat-ibodat, duoyu zikr va ziyorat bilan mashg‘ul bo‘lib turgan diyorimiz ayollariga haj ibodati ruknlari, fazilatlari va safarda ayollarga oid tibbiy masalalar ham atroflicha tushuntirilmoqda. Ularni qiziqtirgan savollarga javoblar berilmoqda.
O‘zbekiston musulmonlari idorasi
Matbuot xizmati