O‘zbekiston musulmonlari idorasi hamda Din ishlari bo‘yicha qo‘mita hamkorligida o‘tkazib kelinayotgan namunaviy-amaliy tadbirlarning navbatdagisi 4 fevral kuni Buxoro shahrida o‘tkazildi.
Tadbirlar O‘zbekiston musulmonlari idorasi raisi o‘rinbosarlari Zayniddin domla Eshonqulov va Obidjon domla Qodirov boshchiligida bo‘lib o‘tmoqda.
Dastlab, “Mir Arab” oliy madrasasida O‘zbekiston musulmonlari idorasi mutaxassislari, viloyat vakilligi xodimlari, shuningdek, “Haj-2024” hojilari va mahalla raislari ishtirokida yig‘ilish tashkil etildi.
Tadbir davomida ishchi guruh a’zolari hamda imom-xatiblar, shu bilan birga otinoyilar o‘zlariga biriktirilgan mahalla hududidan “Haj-2024” ziyoratchisini ma’naviy-ma’rifiy tadbirlarga jalb etishdi. Muammoli xonadonlarga kirilib, hol-ahvol so‘raldi. Imom-xatiblar 7 toifaga mansub 160 ta oilaga, otinoyilar 4 toifaga mansub 16 ta oilaga, umumiy hisobda 176 ta oilaga ma’naviy-ma’rifiy targ‘ibot hamda amaliy yordam qilindi.
***
O‘zbekiston musulmonlari idorasi rahbariyatining Buxoroga tashrifi doirasida muftiy o‘rinbosari Zayniddin domla Eshonqulov Mir Arab oliy madrasasi talabalari bilan ochiq muloqot o‘tkazdi. Unda talabalarga yaratilgan shart-sharoitlar borasida ham so‘z borib, yuksak darajada ekani va buning shukri faqat ilm olish bilan ado etilishi haqida so‘z ketdi.
***
Mir Arab oliy madrasasining ustoz va talabalari tomonidan chiqarilayotgan videochiqishlar sifatini yanada oshirish maqsadida ovoz yozish va tasvirga olish studiyasi zaruriy texnik jihozlar bilan ta’minlandi.
Zayniddin domla Eshonqulov madrasasidagi tasvirga olish xonasi bilan ham tanishib, mediamarkaz faoliyatiga xayr tilab duo qildi.
O‘zbekiston musulmonlari idorasi
Matbuot xizmati
Xabar qilganimizdek, O‘zbekiston Respublikasi Tashqi ishlar vaziri boshchiligidagi delegatsiya Iordaniya Hoshimiylar podshohligida bo‘lib qaytishdi.
Safar davomida Din ishlari bo‘yicha qo‘mita birinchi o‘rinbosari Davronbek Maxsudov, O‘zbekiston musulmonlari idorasi raisi o‘rinbosari Muhammadolim Muhammadsiddiqov Iordaniya Bosh muftiysi doktor Ahmad Ibrohim Hasan al-Hasanot bilan uchrashuv o‘tkazishdi. Unda bugungi global va tez o‘zgaruvchan dunyoda diniy sohada ham bir qator tezkor savollar paydo bo‘layotgani, dinni noto‘g‘ri tushungan shaxslar, mutaassib guruhlar tomonidan asossiz fatvolar tarqatilayotgani, shu bois musulmon olamidagi sog‘lom dunyoqarash sohiblari bo‘lgan olimlar o‘zaro hamkorlikda ishlashlari va dolzarb savollarga hamkorlikda javob berishlari kerakligi ta’kidlandi. Shundan kelib chiqib, ikki mamlakat fatvo markazlari o‘rtasida hamkorlik o‘rnatish va memorandum imzolash, kelajakda o‘zaro tajrbia almashish borasida kelishib olindi.
***
Vaqf, islom ishlari va muqaddas qadamjolar vaziri Muhammad Ahmad al-Xaloyila bilan bo‘lib o‘tgan uchrashuvda esa Din ishlari bo‘yicha qo‘mita va Vazirlik o‘rtasida hamkorolik o‘rnatish, ikki mamlakatdagi diniy soha xodimlarining malaka oshirish markazlari o‘rtasida rasmiy aloqalar o‘rnatish, Vaqf tajribasini o‘rganish, O‘zbekistonlik mutaxassislar uchun qisqa muddatli o‘quvlarni yo‘lga qo‘yish masalalari muhokama qilindi.
***
Shuningdek, tashrif asnosida 2004 yilda Qirol taklifi bilan tayyorlangan va e’lon qilingan «Ammon tashabbusi» xalqaro bayonoti ham o‘rganildi. Mazkur bayonot diniy bag‘rikenglikni mustahkamlash va mutaassiblikka qarshi kurashish kabi masalalarni o‘z ichiga qamrab olgan bo‘lib, hozirda u tarjima qilishga taqdim etildi.
***
Qirol Abdulloh II nomidagi Imomlar tayyorlash va malakasini oshirish markazi mudiri doktor Abdusattor Muhammad al-Quzo bilan uchrashildi. Qirol tashabbusi bilan 2007 yilda tashkil qilingan markazda mamlakatdagi 8.000 dan ortiq masjid uchun imom va muazzinlar tayyorlanadi va malakasi oshirib boriladi.
O‘zbekiston musulmonlari idorasi
Matbuot xizmati