Sayt test holatida ishlamoqda!
25 Fevral, 2025   |   26 Sha`bon, 1446

Toshkent shahri
Tong
05:46
Quyosh
07:04
Peshin
12:41
Asr
16:25
Shom
18:12
Xufton
19:25
Bismillah
25 Fevral, 2025, 26 Sha`bon, 1446

Olim tarbiyalagan ona (2 qism)

19.02.2025   6763   3 min.
Olim tarbiyalagan ona (2 qism)

Ota-o‘g‘il bir-birlarini bag‘riga bosishdi, ko‘z yoshlari sel bo‘lib oqdi. Farrux ayoli bilan o‘tirib dildan suhbatlashdi va gap orasida: “Men berib ketgan o‘ttiz ming dinorni nima qildingiz?” – deya so‘radi. Shu payt azon ovozi yangradi. Farrux bomdod namozini o‘qish uchun Rasululloh sollallohu alayhi vasallamning masjidlari tomon otlandi. U yerdagi  katta olomon sabab tashqarida o‘qishga majbur bo‘ldi.

Namozdan so‘ng Farrux masjidga kirdi. Nabiy alayhissalomning qabrlariga yaqinlashib, u zotga salom berdi va ravzai mutahharaning oldida turib ancha vaqtgacha namoz o‘qidi. Farrux namozini tugatgach ketmoqchi bo‘lib turgan edi hamki, masjid hovlisida o‘tirgan katta jamoat uning e’tiborini tortdi va uni joyida to‘xtashga undadi. Odamlar unga biror katta ulamoni kutayotgandek ko‘rinardi. Farrux ham yaqinroqqa o‘tirdi, shayx va’z qila boshladi. U kishining gaplaridan qalblar larzaga keldi. Tolibi ilmlar shayxning aytgan gaplarini qoralab borishardi. Farrux shayxdan ajablandi. Shayx majlisni tugatib o‘rnidan turgach, odamlar ko‘rishib, ziyorat qilish uchun uning atrofini o‘rab olishdi.

Farrux o‘tirganlardan biriga yaqinlashib, pichirlagancha: “Bu shayx kim?” – deb so‘radi.

Savolni eshitgan kishi hayron holda qoshini chimirib: “Oramizda shayx kim ekanini bilmaydigan odam ham bor ekan-da, axir shayxning ismi har yerda dong taratgan, siz bu shaharlik emasga o‘xshaysiz”, dedi. Farrux: “Yo‘q, lekin men uzoq safarda edim, bugun kechasi qaytdim”, deya javob berdi.

Qarshisidagi odam tabassum ila bunday dedi: “Ha qadrdonim-a, bu zot tobe’inlarning ulug‘laridandir. U parhezkor muhaddis bo‘lib, ko‘rganingizdek, uning majlisiga Molik ibn Anas, Abu Hanifa, Yahyo ibn Sa’id, Sufyoni Savriy, Avzoiy, Lays ibn Sa’d va boshqalarni ham jamlay oladigan faqihlarning imomidir. U Farrux o‘g‘li Robiy’atur Raydir. Uning otasi ko‘p yillar ilgari urushga ketgan edi. Kecha tunda qaytib kelibdi. Odamlar aytishdi”, dedi.

U kishi gapini tugatmasidan Farrux hushini yo‘qotayozdi va shaxdam qadamlar bilan uyi tomon shoshdi. Qalbi bu buyuk olim uning o‘g‘li ekanligidan huzur va faxr tuyg‘ulari bilan limmo-lim edi. Ayolining oldiga kirdi va: “Azizam, jufti halolim, men ko‘rganlarim meni hayratda qoldirdi. O‘zidan boshqa iloh bo‘lmagan Zotga qasamki, agar dunyodagi barcha xazinalar tortilsa ham, bu ne’mat og‘ir keladi”, dedi.

Ayoli: “Xo‘sh, nima ekan u?” – dedi. “O‘g‘limiz Robiy’a ilmda yuksak martabaga erishibdi, hatto zamonaning katta ulamolari ham uning ilmidan bahramand bo‘lmoqda ekanlar”, dedi.

Ayol tabassum ila: “Alloh yo‘lida jangga otlanish oldidan bizga tashlab ketgan o‘ttiz ming dinoringizni nimalarga sarflaganimni angladingizmi?” dedi.

“Ha”, dedi Farrux. Ayol yana: “Dinorlarning barini farzandimiz tarbiyasi va kamoli uchun sarfladim. Ko‘rib turganingizdek shu darajaga yetdi”, dedi.

Farrux ko‘zlarida yosh ila: “Alloh xayringizni bersin, azizam! Baraka toping. Siz haqiqatan ham tahsinga sazovor mo‘mina ayolsiz...”, deya zavjasiga minnatdorchilik bildirdi.

 

Hasson Shamsiy Poshoning "Jannat bo‘stonidagi oilaviy oqshomlar" nomli kitobidan
G‘iyosiddin Habibulloh, Ilhom Ohund, Abdulbosit Abdulvohid tarjimasi.

Boshqa maqolalar

Rasululloh ﷺning Ramazon oyi kelishi haqida xushxabarlari

24.02.2025   2331   2 min.
Rasululloh ﷺning Ramazon oyi kelishi haqida xushxabarlari

Bismillahir Rohmanir Rohiym

Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.

Rasululloh sollallohu alayhi vasallam sahobalarini Ramazon oyi uchun tayyorgarlik ko‘rishga undar va bu ishni Ramazon oyi ro‘zasining xususiyatlari, unga beriladigan ulkan savoblar haqidagi hadislar bilan amalga oshirar edilar. Bunga dalolat qiladigan hadislar ko‘p. Quyida ularning ayrimlari bilan tanishamiz:

"Agar Ramazon oyi kirib kelsa, osmon eshiklari ochilib, jahannam eshiklari yopiladi va shaytonlar kishanlanadi" (Imom Buxoriy rivoyati, 1899-hadis).

«Ramazon oyining ilk kechasi kirib kelganida, shaytonlar va jinlar kishanlanadi, jahannam eshiklari yopiladi, uning birorta eshigi ochilmaydi, jannat eshiklari ochiladi, uning birorta eshigi yopilmaydi. Bir nido qiluvchi bunday nido kiladi: "Ey yaxshilik istovchi! Kutib ol! Ey yomonlik istovchi! O‘zingni tiy!". Alloh bu oyda bandalarni jahannam olovidan ozod qiladi. Bu har bir kechada bo‘ladi» (Imom Termiziy rivoyati, 682-hadis).

"Sizlarga Alloh taoloning farzi va muborak oy – Ramazon keldi. Uning ro‘zasini tutinglar. Bu oyda osmon eshiklari ochilib, jahannam eshiklari yopiladi va shaytonlar kishanlanadi. Unda Allohning ming oydan yaxshiroq bo‘lgan bir kechasi bor. Kim u kechaning yaxshiligidan mahrum bo‘lsa, (hamma yaxshiliklardan) mahrum bo‘ladi" (Nasoiy rivoyati, 2106-hadis).

«Jannatda «"Rayyon" nomli bir eshik bor. Undan qiyomat kuni ro‘zadorlar kiradi. Ulardan boshqa hech kim kirmaydi. U kunda: "Ro‘zadorlar qayerda?" deb nido qilinadi. Shunda ro‘zadorlar o‘rinlaridan turadilar. Ulardan boshqa hech kim Rayyon eshigidan kira olmaydi. Ro‘zadorlar kirib bo‘lgach, eshik yopiladi, shundan keyin u eshikdan hech kim kirmaydi» (Imom Buxoriy rivoyati, 1797-hadis).

Bu ulug‘ sunnatni targ‘ib qilish, bu chaqiriq va xushxabarlarni ovoza qilish, odamlarga Ramazon fazilati va barakotini yetkazish, bu oyda fursatni g‘animat bilib, ulkan savoblarga erishish va saodat sari chorlash barchamizning munosib vazifamiz sanaladi. Mo‘min-musulmon bandalar Ramazon kirib kelishidan qalbidan mamnuniyat tuyishi, Ramazonga alohida tayyorgarlik ko‘rishga, Ramazon oyidagi savob va ajrlardan to‘liq istifoda etishga, turli lazzat va taomlarga mahliyo bo‘lmasdan, ibodatga ko‘proq e’tibor qaratishga undashi ayni muddaodir. Afsuski, ko‘plab insonlar Ramazon kirib kelganini bilmay qolishadi, ro‘za tutsa-da, ro‘zaning maqsadini to‘liq anglamaydi. Shu bois Alloh taolodan hidoyat va to‘g‘ri yo‘ldan adashtirmasligini so‘raymiz!

«Rasululloh sollallohu alayhi vasallam Ramazonda» kitobi asosida tayyorlandi.