Bismillahir Rohmanir Rohiym
Avvalambor, saraton kasalligi bosqichini va da’volash ketma-ketligini bilib olish kerak. Saraton kasalligining birlamchi davo muolajasini olayotgan yoki operatsiya o‘tkazilganidan keyin hali ikki oy to‘lmagan bo‘lsa yoki kimyo va nur terapiyalari olinib, oradan ikki oy o‘tmagan bo‘lsa ro‘za tutish tavsiya qilinmaydi.
Qachon ro‘za tutish mumkin?
Har qanday saratonga qarshi olingan muolajalardan keyin, ikki oydan oshgan bo‘lsa ya’ni biz bu kasallikni yakuniga yetgan, remissiya (uyqu holatiga o‘tgan kasallik) holati deb baholanadi. Shunday holatlarda ro‘za tutish mumkin.
Kichik eslatma
Aynan oshqozon-ichak trakti saratoni bilan kasallangan bemorlarda operatsiyalar, misol uchun: oshqozon, oshqozon osti bezi olib tashlangan holatlar, o‘t yo‘llari, jigar saratoni bilan og‘rigan bemorlarda remissiya holatida ham ro‘za tutish, kasallikni uyg‘otishga yoki organizmni keyingi kutiladigan davo muolajalarini olishga tayyorgarlik qismini to‘xtatib qo‘yishiga olib keladi. Bu bilan bizning davolash natijalarimiz normal holatdan ko‘ra pasayib ketishi mumkin.
Unutmang
Har qanday qarorga kelishdan avval shifokor bilan maslahatlashing!
Maqsud Mallayev,
Onkolog shifokor.
Zulhijja oyining 8 kuni “Tarviya kuni” deyiladi.
“Tarviya” deyilishiga sabab o‘sha kuni hojilar zam-zam suvidan qonib-qonib ichadilar.
“Tarviya” – “tafakkur” ma’nosida ham qo‘llaniladi. Chunki zulhijjaning sakkizinchi kechasida Ibrohim alayhissalom tushlarida o‘g‘illari Ismoil alayhissalomni qurbonlik qilayotganlarini ko‘radilar va bu tush shaytoniymi yoki rahmoniy deya o‘sha kunni tafakkur bilan o‘tkazadilar. Shunga ko‘ra, bu kun “Tarviya – tafakkur kuni” deyiladi.
Mino lug‘atda – “orzu, istak” degan ma’nolarni bildiradi. Makka va Muzdalifa oralig‘idagi qishloqning nomi. Arablar odamlar to‘plangan joyni “mino” deb atashadi. Mino Masjidul-harom shimolidan 7 km. uzoqlikda joylashgan.
Bu yerda Ibrohim alayhissalom shaytonga tosh otganlar, qurbonlik qilganlar. Nabiy sollallohu alayhi vasallam ham aynan shu joyda tosh otib, qurbonliklarini ado etganlar. Bu muqaddas makonda Nasr va Mursalot suralari nozil bo‘lgan.
Hojilar zulhijjaning sakkizinchi kuni bomdod namozidan so‘ng Minoga qarab yo‘l olishadi. Minoda tarviya kunining peshin, asr, shom, xufton hamda arafa kunining bomdod namozlari o‘qiladi. Keyin arafotga jo‘nab, o‘ninchi kuni yana Minoga qaytishadi va ikki kun shaytonga tosh otishni davom ettirishadi.
Minoda bajarilishi zarur bo‘lgan amallar haqida Qur’oni karimda bunday marhamat qilinadi: «Va o‘zlariga bo‘ladigan manfaatlarga shohid bo‘lsinlar. Ma’lum kunlarda ularga rizq qilib bergan chorva hayvonlarini (so‘yishda) Allohning ismini zikr qilsinlar. Bas, ulardan yenglar va bechora va faqirlarga ham yediringlar. So‘ngra o‘zlaridagi kirlarni ketkazsinlar, nazrlariga vafo qilsinlar va “Qadimgi uy”ni tavof qilsinlar”, deganimizni esla» (Haj surasi, 28-29-oyatlar).
Ushbu oyatda Mino kunlari jamarotda tosh otish, qurbonlik qilish va soch oldirib ehromdan chiqish kabi amallarni ado etish ta’kidlanmoqda. Mino kunlari ushbu uchta amalni mukammal tarzda bajarish vojibdir.
Alloh taolo qilayotgan va qiladigan barcha solih amallaringizni O‘z dargohida qabul etsin. O‘zi kuch-quvvat bersin..
Davron NURMUHAMMAD