Bismillahir Rohmanir Rohiym
“Agar bilsangiz, ro‘za tutishlaringiz o‘zingiz uchun yaxshirokdir” deb marhamat qilgan Alloh taologa hamdu sanolar bo‘lsin!
Ro‘za tutish ovqat hazm qilish tizimidagi bir qancha kasalliklarga shifo bo‘ladi. Ro‘za –miya va yurak qon hujayralarini faollashtiradi va tartibga soladi. Ro‘za ortiqcha vazndan xalos etadi va tanadan zaharli moddalarni chiqarib yuboradi.
Tibbiyot xodimlari aytadilar: “Ro‘za qon hujayralarini birinchi kundan boshlab yangilaydi. Qon hujayralari va dangasa hujayralar faol ishlay boshlaydi. Ro‘za tutish butun tanani tozalash amaliyotidir. Badanga yiliga bir marta shunday parvarish juda muhim”.
Olib borilgan tadqiqotlarda ro‘za qon bosimining ko‘tarilishi bilan bog‘liq 100 dan ortiq kasalliklarga davo bo‘lishi aniqlangan. Xususan, ro‘za qon bosimining ortishi, qandli diabet, surunkali astma, nafas olish, yurak, jigar, allergiya, surunkali ekzema, teri kasalliklari kabi juda ko‘plab kasalliklarga shifo bo‘ladi. Ayniqsa, ro‘za – yurak saratoni, miya xurujiga qarshi samarali sanaladi.
Olimlar “ro‘za xujayralarda to‘plangan zaharlarni davolashning eng foydali usuli” degan xulosaga kelishgan. Hatto G‘arb davlatlarida zamonaviy tibbiyot muvaffaqiyatsizlikka uchragan ayrim kasalliklarni davolashda ro‘za orqali davolaydigan markazlar samarali faoliyat yuritmoqda.
Iftorlikda xurmo iste’mol qilish jigar faoliyatini tartibga soladi. Xurmo – jigarda to‘planib qolgan zaharlarni yo‘qotuvchi eng yaxshi tabiiy dori hisoblanadi.
2016 yilda Nobel mukofotiga sazovor bo‘lgan yaponiyalik olim Yosinori Osumi aniqlagan eng qiziq holatlardan biri – organizmning eng faol ishlaydigan vaqti – ochlik paytida bo‘larkan. Ya’ni, ochlik orqali odam organizmi birinchi o‘rinda o‘zidagi turli darajada zararlangan, kasallangan, keraksiz hujayralardan qutulib, ularni energiyaga aylantirib iste’mol qilib yuborar ekan.
Natijada, ro‘za tutish orqali organizm turli xiltlar, chiqitlar va toksinlardan tozalanadi.
Shuningdek, bu jarayonda yo‘q qilingan zararli hujayralar o‘rni yangi yosh hujayralar bilan qoplanadi, tana yosharadi. Ro‘za orqali ruh gunohlardan poklanib yengil bo‘ladi, organizm ham tozalanib, yangilanadi.
Bir so‘z bilan aytganda, ro‘za tutish orqali hech qanday dori-darmon va salbiy oqibatlarsiz bir necha yillar davomida erishish mumkin bo‘lgan ijobiy natijalar bir oy davomida qo‘lga kiritiladi. Ro‘za butun tananing faoliyatini oshiradi va ortiqcha yog‘larni kamaytiradi. Ayniqsa, ro‘zador masjidga ko‘proq yurib borsa, sog‘liq uchun yanada foydali bo‘ladi.
Muborak ramazon oyini foydasiz ishlar bilan isrof qilmasdan, uni g‘animat bilib, ibodatlar bilan o‘tkazishga harakat qiling. Alloh taolo tutayotgan ro‘zamizni, o‘qiyotgan namoz va qilayotgan barcha ibodatlarimizni qabul etsin.
Davron NURMUHAMMAD
Bismillahir Rohmanir Rohiym.
Alloh taologa bitmas-tuganmas hamdu sanolar bo‘lsin.
Payg‘ambarimizga mukammal va batamom salavotu durudlar bo‘lsin.
Sayyid Sulaymon Nadaviy rahmatullohi alayhning ilm va fazllari mashhur bo‘layotgan va shuhrat qozonayotgan edi. U kishi o‘zlarining voqealarini quyidagicha so‘zlab beradilar: «Men «Siyratun-Nabiy sollallohu alayhi vasallam» kitobini olti jild qilib tamomladim. «Muhtaram Zotning siyratlaridagi biror jilva yoki ko‘rinish mening hayotimda ham bo‘lganmi yoki yo‘q? Agar bo‘lmagan bo‘lsa, u holda qanday bo‘ladi?» degan o‘y qayta-qayta qalbimda tinchlik bermas edi. Shu maqsad uchun Allohning biror valiysini qidirdim.
Thana Bhavandagi xonaqohda yashaydigan va Alloh taolo fayzlarini taratib qo‘ygan Mavlono Ashraf Ali Tahonaviy hazratlari haqida eshitgan edim. Shunday qilib, bir kuni Thana Bhavanga borishni niyat qildim va safarga chiqdim. Borib, hazrat bilan ko‘rishdim va bir necha kun u yerda turdim. Ortga qaytayotganimda hazrat Tahonaviy rahmatullohi alayhga: «Hazrat! Biror nasihat qiling», dedim. U zotning xayollariga o‘sha payt: «Shunday katta allomaga nima nasihat qilaman? Ilm va fazli butun dunyoga mashhur bo‘lsa», degan o‘y kelibdi. Keyin: «Ey Alloh! Qalbimga uning uchun ham foydali bo‘lgan va mening uchun ham foydali bo‘lgan narsani sol», deb duo qilibdi. Shundan keyin hazrat Tahonaviy rahmatullohi alayh Sayyid Sulaymon Nadaviy rahmatullohi alayhga xitob qilib: «Ey birodar! Bizning yo‘limizda boshidan oxirigacha o‘zingizni xokisor tutishingiz kerak», debdilar.
Sayyid Sulaymon Nadaviy rahmatullohi alayh aytadilar: «Hazrat Tahonaviy rahmatullohi alayh bu so‘zlarni aytayotganlarida qo‘llarini ko‘ksilariga olib borib, past tarafiga bir zarba berdilar, zarba xuddi mening qalbimga tushgandek bo‘ldi».
Hazratimiz Doktor Abdulhay rahmatullohi alayh aytadilar: «Bu voqeadan keyin Sayyid Sulaymon Nadaviy rahmatullohi alayh o‘zlarini shunday xokisor tutdilarki, uning misli topilishi qiyin edi. Bir kuni qarasam, xonaqohning tashqarisida hazrat Sayyid Sulaymon Nadaviy rahmatullohi alayh majlisga kelganlarning oyoq kiyimlarini tartiblayotgan ekanlar. Shunday tavoze’ va muhabbatni Alloh taolo u kishining qalbida paydo qildi va keyin yuksak darajalarga ko‘tarib qo‘ydi».
«Nasihatlar guldastasi» kitobidan