O‘zbekistondagi Islom sivilizatsiyasi markazi qurilishi yakunlanish bosqichida turibdi. Ayni vaqtda markaz binosida qurilish va ichki bezak ishlari deyarli tugallangan, ekspozitsiya va kontent bilan boyitish ishlari faol ravishda olib borilmoqda.

 
Hozirda mamlakatimiz va xorijdan jalb qilingan 2000 ga yaqin olim, mutaxassis, dizayner, usta va me’morlar 800 dan ortiq loyiha ustida ish olib bormoqda.

Birinchi bosqichda namoyish etilishi rejalashtirilgan taxminan 400 ta loyiha Prezidentimiz tomonidan ilgari surilgan “Sivilizatsiya, shaxs, kashfiyot” konsepsiyasi asosida shakllantirilmoqda. Mazkur konsepsiyaga muvofiq, ekspozitsiyalar tarixiy, ilmiy manbalar va arxeologik dalillarga asoslangan holda mazmun bilan to‘ldirilmoqda.

Jumladan, markaz kontentini boyitish maqsadida 59 ta maket yaratish rejalashtirilgan bo‘lib, ulardan 24 tasi zamonaviy 3D formatida bo‘ladi. Barcha maketlar yuqori sifatli, aniq va ilmiy asoslangan bo‘lishi talab etiladi. Maketlar muzey darajasiga mos bo‘lishi va vaqt omili sifatga ta’sir qilmasligiga alohida e’tibor qaratilmoqda.

Bu sohadagi muhim hamkorlik tashabbuslaridan biri alohida e’tiborga sazovor. O‘zbekistondagi eng ommabop teleplatformalardan biri — “Sevimli” telekanali tarixiy yodgorliklarning maketlarini tayyorlash ishlarini amalga oshirmoqda.

“Sevimli” telekanali tomonidan Islom sivilizatsiyasi markazi muzeyiga 25 ta tarixiy me’moriy yodgorlik maketini bepul taqdim etish rejalashtirilgan. Ushbu maketlar “Artefact” kompaniyasi tomonidan telekanal buyurtmasiga binoan tayyorlanmoqda. Ushbu jarayonda 15 nafar mutaxassis – texnik xodim va modellashtirish dizaynerlari faol ishtirok etmoqda. 

I.Ahmedov tayyorladi.