Allohni seving!
Odamlardan biri Zunnundan “Kimni do‘st tutay?” – deb so‘radi. U: “Kasal bo‘lsang shifo beradigan, gunohga qo‘l ursang uni kechirib yuboradigan, so‘rasang beradigan va uning yordamiga muhtoj bo‘lsang senga yordam beradigan Zotni do‘st tut!” – dedi.
Alloh taolodan o‘zga do‘st bormi?! Sajdaga borgan paytingiz ishlaringizni maxfiy tarzda Robbingizga ayting. Zero, U Zot maxfiy narsalardan ham xabardordir. Atrofdagilardan uni maxfiy tuting, chunki muhabbat oshkor aytilmaydi. Muhabbatingizni kechalari tahajjudlarda, sahar vaqtlari namozlaringizda izhor eting.
Ayrim odamlar dinni “Buni qil!”, “Buni qilma!” kabi buyruqlar va taqiqlardan yoki halol va harom tushunchalarining jamlanmasi deb bilishadi va barisining ustida Alloh va Rasuliga bo‘lgan muhabbat turishini unutib qo‘yishadi. Ishning boshi – muhabbatdir. Muhabbat yo‘qolsa, toatu ibodatlarning bari kishini dindor musulmonga aylantira olmaydi.
Agar siz Allohga muhabbat da’vosida bo‘lsangiz, bu muhabbatingizni hayotingiz davomida ko‘rsating. Gap-so‘zingiz, yurish-turishingiz va amallaringizda ham Allohga bo‘lgan muhabbatingiz aks etib tursin.
Rivoyat qilinishicha, bir kishi safarda sohibjamol ayolga yo‘liqib qolibdi. Va unga qarata: “Sen meni butunlay o‘zingga rom etding. Mening butun xayolim sen bilan band”, debdi. Ayol ham: “Agar aytganingiz rost bo‘lsa, borim sizga fido bo‘lsin. Ammo mening bir ofatijon singlim bor. Mendan anchayin chiroyli. U ortingizda turibdi. Agar istasangiz ikkimizdan birimizni tanlashingiz mumkin”, debdi. Kishi darhol ortiga o‘girilibdi. Shunda ayol uning yuziga bir tarsaki tushiribdi va: “Qorangni ko‘rmay! Firibgar, aldoqchi! Meni sevaman deb, boshqasiga ko‘z olaytirasanmi?! Mening oldimga yalinib kelib, oshiqligingni aytding. Seni sinovdan o‘tkazgandim. Uchiga chiqqan yolg‘onchi ekansan!” – debdi. Shunda u ko‘zlariga yosh olib, o‘ziga-o‘zi shunday debdi: “Bir yaratiqning muhabbatini da’vo qilib, undan yuz o‘girganim uchun yuzimga tarsaki tushdi... Necha martalab Yaratgan Zotga oshiqlik da’vosini qilib, undan yuz burdim. Undan boshqasi bilan ovorayu sarson bo‘ldim. Qalbimga urilgan shapaloqni payqamay qolibman... Nahotki, men qalbi qoplanib qoladigan darajaga yetgan bo‘lsam-a?!” degan ekan. Zero, Alloh taolo aytadi: «Yo‘q (unday emas)! Balki, ularning dillarini o‘zlarining qilmishlari (gunohlari) qoplab olgandir»[1].
Hasson Shamsiy Poshoning
“Jannat bo‘stonidagi oilaviy oqshomlar” nomli kitobidan
G‘iyosiddin Habibulloh, Ilhom Ohund, Abdulbosit Abdulvohid tarjimasi.
[1] Mutoffifun surasi, 14-oyat.
Muftiy hazrat turli hududlardan kelgan yurtdoshlarimizni qabul qildilar
Inson dardiga sherik bo‘lish, og‘irini yengillatib, ko‘ngliga shodlik ulashish — islom dinining eng go‘zal qadriyatlaridan biridir. Payg‘ambarimiz sollallohu alayhi va sallam: «Kim birodarining hojatini ravo qilsa, Alloh uning hojatini ravo qiladi. Kim bir musulmonning tashvishini aritsa, Alloh uning Qiyomat kunidagi tashvishlaridan birini aritadi», deya marhamat qilganlar.
Ana shu ezgu ta’limotga muvofiq, bugun, 30 sentyabr kuni O‘zbekiston musulmonlari idorasi raisi, muftiy Shayx Nuriddin Xoliqnazar hazratlari navbatdagi fuqarolar qabulini o‘tkazdilar. Unda Toshkent shahri, Surxondaryo, Andijon, Farg‘ona, Namangan, Buxoro, Samarqand viloyatlari hamda Qoraqalpog‘istondan kelgan 70 ga yaqin yurtdoshlarimizning arz, taklif va murojaatlari tinglandi.
Qabulda fuqarolarning har bir masalasiga alohida e’tibor qaratildi: ijtimoiy ko‘mak va davolanish uchun moddiy yordam so‘rab kelgan ehtiyojmandlarga tegishli tartibda yordam choralari belgilandi, hududlardagi masjidlar holati va diniy xizmat bilan bog‘liq masalalar nazoratga olindi, ta’lim olish, oilaviy murosa hamda shar’iy hukmlar bo‘yicha kelgan yurtdoshlarimizga zarur yo‘l-yo‘riq va tavsiyalar berildi. Shuningdek, qabulga shukronalik izhor etib, duo olish niyatida kelgan nuroniy otaxon-onaxonlarning ezgu tilaklari qabul qilindi.
O‘z muammolariga amaliy yechim va ko‘ngliga taskin topgan yurtdoshlarimiz diniy soha mutasaddilaridan mamnun bo‘lib, yuzida tabassum va qalbida duolar bilan qaytdilar.
Eslatib o‘tamiz, xalq bilan yaqindan muloqot qilish va ularning murojaatlariga yechim topish jarayonlari yurtimizdagi barcha jome masjidlarda har chorshanba kuni imom-domlalar tomonidan muntazam olib borilmoqda.
O‘zbekiston musulmonlari idorasi Matbuot xizmati
