Yelkalarida qorilarni ko‘tarib yuruvchi davlat haqida eshitganmisiz?
25.03.2025
5955
3 min.
Tailand aholisining 4,6 foizi Islom diniga e’tiqod qiladi. Islom dini Tailandga arab va fors savdogarlari sababli kirib kelgan. Naratxivat, Yala, Pattani va Satun shaharlarida aksariyat musulmonlar yashaydi. Ular jami musulmon aholining 82 foizini tashkil etadi. Tailandda jami 3494 ta masjid rasmiy ro‘yxatdan o‘tkazilgan. Shundan 170 ga yaqini mamlakat poytaxti Bangkok shahrida, Sharqiy viloyatlarida 117 ta, yuqori janubiy qismida esa 699 ta, janubiy qismida eng ko‘p 2257 ta masjid joylashgan. Ushbu masjidlarning aksariyati mahalliy aholi tomonidan hashar yo‘li bilan qurilgan. Yana yangi masjid hamda madrasalar qurilmoqda.
Tailandagi musulmonlarning aksariyatini Eron, Xitoy, Pokiston, Bangladesh va Birma kabi davlatlardan kelganlar tashkil etadi. Islom dinining ijtimoiy tenglik tamoyili ushbu dinga ergashuvchilarning soni orttishiga sabab bo‘lmoqda.
Tailand musulmonlari sunniylikning hanafiy mazhabida. Mamlakatning markaziy va sharqiy qismlarida Islom ilmlaridan saboq beruvchi maktablar bor. O‘quvchilar masjidlar qoshidagi madrasalarda amaliyot o‘tash uchun yuboriladilar. Madrasaga 14 yoshdan qabul qilinadi. Dars mashg‘ulotlarida Qur’on ilmlari, arab va malay tillari hamda Islomdagi ibodatlarni chuqur o‘rganishadi. Madrasada o‘rta va oliy ma’lumotli talabalar tayyorlanadi. Jami 395 ta diniy ta’lim muassasalari mavjud. Tailand “Naradiwas” universiteti qoshida Islom tadqiqotlari akademiyasi faoliyat yuritadi.
Tailandda 150 ga yaqin musulmonlar jamiyati va xayriya tashkilotlari faoliyat yuritadi. Davlat qonunlariga ko‘ra, mamlakatdagi har bir fuqaro e’tiqod erkinligiga ega. 26 ta Islomiy banklarning turli bo‘limlari aholiga xizmat ko‘rsatib kelmoqda.
Musulmonlar idorasi aholi diniy ehtiyojlari va u bilan bog‘liq masalalarni hal etuvchi markaziy tashkilot hisoblanadi. Idoraga Shayxul Islom rahbarlik qiladi. Shuningdek, davlat xizmatchisi sifatida shariat ko‘rsatmalari asosida fuqarolik masalalari bilan shug‘ullanuvchi qozi lavozimi ham joriy etilgan.
Ko‘plab sayyohlarni o‘ziga jalb etuvchi, mamlakatdagi eng muhtasham “Dorul ibodat” jome masjidi 1943 yilda barpo etilgan. Dastlab yog‘ochdan qurilgan muzkur masjid 2006 yil to‘rt qavatli qilib qayta qurildi. Har bir masjid huzurida Islom boshqaruvi qo‘mitasi faoliyat yuritadi. Unga masjid imomi, muazzin hamda aholi orasidan 12 ta kishi a’zo bo‘lib, ular masjid faoliyati uchun javobgardirlar.
Mamlakatda Qur’on hofizlariga yuksak e’tibor qaratiladi. Qur’on oyi – Ramazon oyida musulmonlar minnatdorchilik va xursandchilik ma’nosida qorilarni yelkalarida olib yuradilar. Sha’bon oyida qorilar Qur’ondan imtihon topshirishadi va natijalari Ramazon oyida e’lon qilinadi. Imtihondan ijobiy o‘tganlar Ramazon oyida masjidda Qur’oni karim xatmiga o‘tish imkoniga ega bo‘ladilar. Tailandlik musulmonlar Ramazon oyining birinchi kuni muborak oy tashrifi munosabati bilan biror jonliq so‘yadilar.
Davron NURMUHAMMAD
MА`LUMOTNI IJTIMOIY TАRMOQLАRDА ULАSHING
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 