“Haj – 2026” ishchi guruhi rahbari – Din ishlari bo‘yicha qo‘mita raisi Sodiqjon Toshboyev, Muftiy Shayx Nuriddin Xoliqnazar, “Haj” va “Umra” ishlari bo‘yicha attashe Shuhrat Amoniy hamda mahalliy mutasaddilar Mino va Arafot vodiylarida yaratilgan sharoitlar bilan yaqindan tanishdilar.
Guvohi bo‘lindiki, ushbu muborak maskanlardagi ziyoratchilar uchun yaratilgan sharoitlar, qulayliklar va infratuzilmalar o‘tgan yillarga nisbatan bir necha baravar sifat jihatidan yangi bosqichga ko‘tarilgan.
O‘zbekiston tomonining talablariga ko‘ra, ziyoratchilar haj kunlarida ko‘p vaqt toat-ibodatda bo‘ladigan Mino vodiysidagi chodirlar to‘liq gipsokarton bilan o‘raldi, har biriga zamonaviy freonli konditsioner o‘rnatildi va yuklar uchun alohida tokchalar qilingan. Yangi chodirlar gilamlar, yumshoq o‘rinlar, yostiq-choyshablar, kommunal xizmatlar bilan ta’minlangan va ikki qavatli qo‘shimcha yuvinish xonalari ham qurilgan. Avvalgi chodirlar matosi va markazlashgan sovutish tizimi jazirama kunlarda yetarli haroratni saqlolmas edi.
Arafot hududidagi har bir chodir issiq o‘tkazmaydigan zamonaviy sendvich panellar bilan to‘liq o‘ralgan va yorug‘lik uchun oynalar o‘rnatilgan. Mazkurlarda to‘shak, yostiq-choyshablar va har bir hoji uchun soyabon, sanitariya-gigiyena vositalari jamlanmasi tayyorlab qo‘yilgan. Shuningdek, mazkur hududlarda uch mahal issiq ovqat tarqatish, muntazam choy va salqin ichimliklar bilan ta’minlash va tibbiy xizmat ko‘rsatish uchun ham barcha sharoitlar hozirlangan.
Joriy mavsumda chodirlar videokuzatuv kameralari bilan jihozlangan bo‘lib, zarur hollarda hojilarga tezkor xizmat ko‘rsatish, xavfsizlikni ta’minlash va begona shaxslarning xatti-harakatlarining oldini olishga xizmat qiladi.
Hojilar chodirlarda vaqtlarini g‘animat bilib ko‘proq toat-ibodatda bo‘lishlari uchun taniqli ulamolarning suhbatlari, mashhur qorilarning qiroatlarini yetkazish maqsadida mikrofon va ovoz kuchaytirgichlar bilan yetarli darajada ta’minlandi.
Ta’kidlash joizki, mo‘min-musulmonlarga yanada qulay shart-sharoit hozirlanib, bu yilgi haj mavsumi sifat, mazmun va xizmatlar jihatidan eng yuqori darajada bo‘lishiga harakat qilinmoqda.
O‘zbekiston musulmonlari idorasi
Matbuot xizmati
Mustaqillik tuhfasi: Jizzaxda uchta masjidning yangi binosi foydalanishga topshirildi
Mustaqilligimizning 35 yilligi munosabati bilan Jizzax viloyati Sharof Rashidov tumanidagi “Jizzaxlik”, “Yakkatut” va “Ardaxshon” jome masjidlarining yangi binolari foydalanishga topshirildi.
Tantanali ochilish marosimida soha mutasaddilari, Jizzax viloyati bosh imom-xatibi Mehmonxon domla Jabborov, mahalliy hokimlik vakillari hamda namozxonlar ishtirok etdi.
Tadbirda so‘z olganlar Allohning uylarini obod etishning ulug‘ fazilati, masjid qurilishiga hissa qo‘shgan insonlarning ajru mukofotlari haqida to‘xtalib o‘tdilar. Shuningdek, masjidlarni nafaqat moddiy, balki jamoat bilan ibodatlarni ado etib, ma’naviy jihatdan obod qilish har bir mo‘min uchun muhim ekani ta’kidlandi.
Yurtimizda istiqlol ayyomi munosabati bilan eshiklarini ochgan ushbu yangi masjidlar namozxonlar uchun zamonaviy va qulay sharoitlarda ibodatlarini ado etishga xizmat qiladi.
O‘zbekiston musulmonlari idorasi
Jizzax viloyati
Matbuot xizmati