Bir kishi Ali ibn Abu Tolib roziyallohu anhuning oldiga kelib, rizqining torligidan shikoyat qildi.
Ali roziyallohu anhu:
– Ehtimol sen to'mtoq qalam bilan yozarsan? – dedi. U:
– Yo'q, – dedi. Hazrat Ali:
– Ehtimol siniq taroq bilan soch tararsan? – dedi. Haligi kishi:
– Yo'q, – dedi. Hazrat Ali:
– Ehtimol o'zingdan yoshi katta odamning oldiga tushib yurarsan? – dedi. U:
– Yo'q, – dedi. Ali karramallohu vajhahu: .
– Ehtimol bomdod namozidan keyin kun chiqmasdan uxlarsan? – dedi. U:
– Yo'q, – dedi. Hazrat Ali:
– Ehtimol ota-onangning haqqiga duo qilmay qo'ygandirsan? – dedi. U:
– Ha, – dedi. Shunda Ali roziyallohu anhu:
– Ularni eslab turgin. Men Rasululloh sollallohu alayhi va sallamdan eshitganman. U zot: “Ota-onaga duo qilishni tark etish rizqni kesadi”, deganlar, – dedi.
Har namozdan keyin ikki daqiqangizni ota-onangizga duo qilishdan qizg'anmang.
Homidjon qori IShMATBYeKOV
Muborak haj safari davomida O‘zbekiston musulmonlari idorasi Kutubxona bo‘limi boshlig‘i Kamoliddin Mahkamov, Termiziy xalqaro ilmiy-tadqiqot markazi direktori Muzaffarxon Joniyev, Hadis ilmi maktabi rektori Barot Amonov Madinai munavvaradagi Masjidun Nabaviy kutubxonasi bilan tanishish barobarida muassasa bo‘lim boshlig‘i Ahmad Naim Mulla muloqot qilishdi.
Uchrashuv asnosida ulug‘ allomalarimizning ilmiy meroslari joy olgan “O‘zbekiston burchagi” tashkil etildi. Shu munosabat bilan ushbu kutubxona vakillariga Imom Buxoriyning “Sahihi Buxoriy” va Imom Termiziyning “Sunani Termiziy” va boshqa kitoblar topshirildi.
Muloqot chog‘ida “Sahihi Buxoriy” va “Sunani Termiziy” asarlari “Olti sahih hadislar”dagi o‘rni, islom olamidagi olti buyuk muhaddisdan ikki nafari Movarounnahrdan yetishib chiqqani, buyuk ajdodlarimizning dinimiz taraqqiyotidagi xizmatlari e’tirof etildi.
Shuningdek, bugungi kunda O‘zbekistonda diniy sohada olib borilayotgan siyosat yuqori baholanib, Kutubxonaga taqdim etilgan o‘zbek tilidagi hadislar to‘plamlari sharhlari Haj va Umra ziyoratiga keluvchi ziyoratchilarga muhim manba bo‘lib xizmat qilishi aytib o‘tidi.
O‘zbekiston musulmonlari idorasi
Matbuot xizmati