Yaxshiyam borsan, qizim
Qizim bolaligida men bilan yaqin munosabatda bo'lganiga qaramay, o'smirlik davriga kelib oramiz xiyla uzoqlashganini his qildim. Ora-orada bir-birimizni tushunmay, gapimiz kelishmay qoladigan bo'ldi. Keyin men buning sababi haqida o'ylab ko'rdim. Bildimki, qizim bilan etarlicha muloqotda bo'lib unga etarlicha vaqt ajratyapman-u, lekin unga etarlicha mehr bermayotgan ekanman.
Qizim bilan o'tirib gaplashib olmoqchi bo'ldim. Lekin yaxshilab o'ylab ko'rib bu fikrimdan qaytdim. Yaxshisi unga aytmasdan turib mehr beraman. Unga oldingidan ko'ra samimiyroq, iliqroq munosabatda bo'laman deb qaror qildim.
Har safar uydan chiqib ketishimdan oldin yoki uyga qaytib kelganimda qizimga tabassum qilib peshonasidan, yuzlaridan o'pib qo'yadigan bo'ldim. Qizim maktabidan qaytib kelganida kayfiyatim qanday bo'lishidan qat'i nazar tabassum bilan kutib olishni odat qildim. Qizimga “Sensiz uyimiz huvullab qoldi”, “Seni sog'inib qoldim, qizim” degan gaplarni aytishni kanda qilmadim. Ikkimiz oshxonada ish qilsak “Yaxshiyam sen borsan, qizim, sensiz qiynalib qolardim” deb uni xursand qilardim. Shu arzimagan ishlar qizimni menga tobora yaqinlashtirib bordi.
Bora-bora qizimga yaqinligim shu darajaga etdiki, hatto unga maktublar yozib kitob-daftarlarining orasiga yoki tushligi solingan idishga qistirib qo'yadigan bo'ldim. Bu ishni qizim maktabga borganida uni yaxshi ko'rishim bitilgan maktubimni o'qib xursand bo'lsin, kayfiyati ko'tarilsin deb qilardim.
Oradan bir oy o'tar-o'tmas qizimning menga munosabati tubdan o'zgardi. Endi u mening har bir gapimni jon qulog'i bilan eshitar, menga hadeb qarshilik qilavermas, jerkimas edi. Qolaversa, o'zining ichidagi gaplarini, dugonalariga ham aytmaydigan sirlarini yashirmasdan o'zimga aytadigan bo'ldi. Men esa bir tarafdan shuncha paytdan beri g'aflatda qolib, qizim bilan uzoqlashganim uchun u bilan muloqot qilish rohatidan bebahra qolganimdan afsus cheksam, boshqa tarafdan farzandim bilan oramizdagi masofani yaqinlashtirgan, oramizdagi to'siqlarni ko'targan Allohga hamd aytardim.
Doktor Abdulloh Muhammad Abdulmu'tining
“Farzand tarbiyasida 700 ta saboq” kitobidan
G'iyosiddin Habibulloh, Kamronbek Islom tarjimasi.
Soha rahbarlari mahallalardagi targ‘ibot va obodonlashtirish ishlari bilan tanishdi
Mamlakatimizda mustaqillik bayramining 35 yilligi munosabati bilan “Mahallada obodlik va mehr-saxovat oyligi” hamda “Dolzarb 40 kunlik” tadbirlari doirasida hududlarda keng ko‘lamli targ‘ibot-tashviqot, obodonlashtirish, xayriya va mehr-oqibat ishlari amalga oshirilmoqda.
Mazkur jarayon bilan yaqindan tanishish maqsadida 4 avgust kuni O‘zbekiston Respublikasi Prezidentining diniy-ma’rifiy masalalar bo‘yicha maslahatchisi Muzaffar Komilov, Din ishlari bo‘yicha qo‘mita raisi Sodiq Toshboyev hamda O‘zbekiston musulmonlari idorasi raisi, muftiy Shayx Nuriddin Xoliqnazar hazratlari boshchiligidagi mutasaddilar Toshkent shahri Sergeli tumanidagi “No‘g‘ayqo‘rg‘on”, “Qumariq” va “Ittifoq” mahallalarida bo‘lishdi.
Tashrif davomida soha rahbarlari mahallalardagi ijtimoiy-ma’naviy muhitni yanada sog‘lomlashtirish, xayriya va saxovat ishlarini kengaytirish, obodonlashtirish hamda bunyodkorlik ishlarining borishi bilan tanishdi. Shuningdek, mahalliy hokimiyat vakillari, “mahalla yettiligi”, nuroniylar hamda diniy soha xodimlari ishtirokida ushbu yo‘nalishlarda amalga oshirilayotgan ishlar muhokama qilindi.
Mahallalarda o‘tkazilgan sayyor yig‘inlarda “Jaholatga qarshi ma’rifat bilan kurashish”, oilalarda totuvlikni mustahkamlash, yoshlarni ilm-ma’rifatga yo‘naltirish, ehtiyojmand oilalarni qo‘llab-quvvatlash, farzand tarbiyasi hamda aholi muammolarini hal etishda hamjihatlikni kuchaytirish masalalariga alohida e’tibor qaratildi.
Shu bilan birga, xonadonlar atrofi, ko‘chalar, ariqlar va qabristonlarni obod qilish, ularning ozodaligini ta’minlash bo‘yicha olib borilayotgan ishlar yuzasidan ham tegishli tavsiya va ko‘rsatmalar berildi.
Darhaqiqat, Prezidentimiz ta’kidlaganlaridek, amalga oshirilayotgan islohotlar samarasi, eng avvalo, mahallalar hayotida yaqqol namoyon bo‘lishi va aholi kayfiyatida o‘z aksini topishi lozim. Shu ma’noda, joriy yil yakunida mamlakatimiz bo‘ylab “Eng orasta xonadon”, “Eng fayzli hovli”, “Eng obod ko‘cha” va “Eng namunali mahalla” nominatsiyalari bo‘yicha g‘oliblarning aniqlanishi mazkur ezgu tashabbuslarning mantiqiy davomi bo‘ladi.
O‘zbekiston musulmonlari idorasi Matbuot xizmati
