muslim.uz
Бири иккинчисиз бўлмас
Аллоҳга итоат этиб, Расулуллоҳ соллаллоҳу алайҳи васалламга итоатсизлик қилинмайди. Аллоҳга ва Унинг Расулига итоат этиш лозим.
Аллоҳ таоло бундай буюради: “Агар мўмин бўлсангиз, Аллоҳ ва (Унинг) Расулига итоат этингиз!” (Анфол сураси, 1-оят); “Эй имон келтирганлар! Аллоҳга итоат этингиз ва Пайғамбарга итоат этингиз!” (Муҳаммад сураси, 33-оят).
Аллоҳ таолога итоат Қуръони карим кўрсатмаларига амал қилиш билан, Набий алайҳиссаломга итоат эса у зот алайҳиссаломнинг суннатларига эргашиш билан бўлади.
Аллоҳ таолога ва Унинг Расулига итоат этганлар улкан зафарларга эришади: “Кимки Аллоҳга ва Унинг пайғамбарига итоат этса, бас, у улуғ ютуққа эришибди” (Аҳзоб сураси, 71-оят).
Аллоҳга ва Унинг Расулига итоатгўй бандалар жаннатга мушарраф бўлишади: “Кимки Аллоҳ ва унинг пайғамбарига итоат этса, (У) уни остидан анҳорлар оқиб турадиган (жаннатдаги) боғларга киритур” (Фатҳ сураси, 17-оят).
Аллоҳга ва Унинг Расулига итоат этмаганлар қиёмат куни азобланадилар: «Юзлари оловда айлантириладиган кунда, улар: “Кошки эди, Аллоҳга итоат этганимизда, пайғамбарга итоат этганимизда”, дерлар» (Аҳзоб сураси, 66-оят).
Намозни ўз вақтида адо этиш, моли нисобга етганда закот бериш лозим. Намозни ўқиб, закотга қодир бўла туриб бермаслик, катта гуноҳдир.
Аллоҳ таоло намозни адо этишга ва закот беришга буюради: “...намозни баркамол адо этингиз, закотни берингиз...” (Ҳаж сураси, 78-оят); “(Эй мўминлар!) Намозни баркамол адо этингиз, закотни берингиз” (Нур сураси, 56-оят).
Намозни адо этувчилар ва закотни берувчилар учун Аллоҳ таолонинг улуғ мукофотлари бордир: “Албатта, имон келтирган, яхши ишларни қилган, намозни баркамол ўқиб, закотни берганлар учун Парвардигорларининг ҳузурида (махсус) мукофотлари бордир. Уларга хавф ҳам бўлмас ва улар ташвиш ҳам чекмаслар” (Бақара сураси, 277-оят); «...намозни барпо қилувчилар, закотни адо этувчилар, Аллоҳга ва “Охирги кун” (қиёмат)га имон келтирувчилар ҳам борки, айнан уларга, албатта, улкан мукофот ато этурмиз» (Нисо сураси, 162-оят).
Мол-дунёсини тўплаб, Аллоҳ йўлида сарфламайдиганлар учун аламли азоб бордир: «Олтин ва кумушларни кон (махфий хазина) қилиб олиб, уларни Аллоҳ йўлида сарф қилмайдиганларга аламли азоб ҳақида “хушхабар” беринг! (Мазкур олтин-кумушлар) жаҳаннам ўтида қизитилиб, улар билан пешоналари, ёнлари, орқалари куйдирилган куни: “Бу ўзларингиз учун сақлаган хазинангиздир. Сақлаган хазинангиз (мазасини) тотингиз!” (дейилади)» (Тавба сураси, 34-35 – оятлар).
Расулуллоҳ соллаллоҳу алайҳи васаллам: «Кимга Аллоҳ молу дунё берса-ю, у закотини адо қилмаган бўлса, қиёмат куни у унга кўзойнакли илон бўлиб кўринади. Унинг икки тиши чиқиб туради. У қиёмат куни бўйнидан бўғиб олади. Сўнг икки жағ суягидан тишлаб туриб: “Мен сенинг молингман! Мен сенинг тўплаган хазинангман!” дейди”, дедилар ва: “Аллоҳнинг фазли билан берган нарсаси (бойлиги)дан бахиллик қилувчилар буни ўзларига яхши деб ҳисобламасинлар! Асло! Бу улар учун ёмондир. Қиёмат куни бахиллик қилган нарсалари (ўз бўйинларига) бўйинтуруқ қилиб илиб қўйилади”, оятини тиловат қилдилар» (Оли Имрон сураси, 180-оят).
Аллоҳга итоат этиш ва ота-онага яхшилик қилиш лозим. Аллоҳга ибодат қилиб, ота-онани ҳурмат этмаслик, уларга яхшилик қилмаслик улкан гуноҳ.
Аллоҳ таоло бундай буюради: “Роббингиз Унинг Ўзигагина ибодат қилишингизни ҳамда ота-онага яхшилик қилишни амр этди” (Исро сураси, 23-оят); “Биз инсонга ота-онасини (рози қилишни) буюрдик” (Луқмон сураси, 14-оят); “Биз инсонни ота-онасига яхшилик қилишга буюрдик” (Аҳқоф сураси, 15-оят).
Аллоҳ таоло барчамизни Ўзининг розилигини топадиган амалларда собит қадам қилсин!
Даврон НУРМУҲАММАД
Нозимжон Иминжонов: Қўшнига яхшилик қилиш 3-қисм
ЎМИ Матбуот хизмати
Нишонга урилган гаплар: “Дўстлар кўп экани билан эмас, чин экани билан эътиборлидир.”
Қуйида келтириладиган фикрлар, ҳикматлар ижтимоий тармоқлардаги турли саҳифалардан олиб таржима қилинган.
*****
Мен битта душмандан қўрқаман. Бу – умидсизлик.
Нажиб Маҳфуз
*****
Инсон “ҳис қилиш”дан бошқа ҳамма нарсани ўргана олади.
“Ҳаётнинг нариги юзи”
*****
Ҳар бир йўқотган нарсанг бой бериш, қўлдан чиқариш, зиёнга учраш ҳисобланавермайди. Қадрингни билмайдиган кимсадан узоқлашишинг янги ҳаёт бошлаш демакдир.
“Ҳаётнинг нариги юзи”
*****
Табассум билан нон сотиб олиб бўлмайди, лекин руҳларни сотиб олса бўлади. Динимизда табассумни ибодат қилиб қўйган Зот Покдир.
“Ҳаётнинг нариги юзи”
*****
Хато қилсанг, ўша хатойинг беркилишини истайсан. Бошқалар ҳам хато қилсалар, хатолари беркилишини хоҳлайдилар. Сен уларнинг айбларини фош этиб, шарманда қилма.
“Ҳаётнинг нариги юзи”
*****
Сохта дўст об-ҳаво ёмонлашганда кўчиб кетадиган қушга ўхшайди.
“Ҳаётнинг нариги юзи”
*****
Дўстлар кўп экани билан эмас, чин экани билан эътиборлидир.
Жуброн Халил Жуброн
*****
Заифликнинг чўққиси – одамларни қойил қолдиргани учун оёғингни қисадиган туфлини кийишингдир.
“Кун ҳикмати”
*****
Интернет материалларидан тўплаб, таржима қилувчи
Нозимжон Иминжонов
Хуфтон намозидан аввалги уйқу жоиз(ми?)
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Одатда одам куни бўйи ишхонада бўлиб, фақат кечки пайтдагина уйга қайтади. Табиийки, одам бир оз бўлса-да ўзида толиқиш сезади. Кечки овқат тановулидан кейин беихтиёр кўзга ширин уйқу келади. Қиш кунлари, ҳамманинг уйида ҳам етарли шароит йўқ. Совуқда таҳоратни янгилашга эриниб, ўз-ўзига: “Тун узун бўлса, бир ухлаб туриб кейин хуфтонни ўқирман” – дейди-да, таппа ўрнига ётади. Бу кўпчиликда учрайдиган ҳолат. Бир оз мизғиб, кейин хуфтонни ўқирман деб тўшакка ётасиз-у, кўзингизни очганда эса аллақачон бомдод намозининг вақти кирган бўлади. Хуфтонни бой берган бўласиз…
Фуқаҳоларимиз мана шу ҳолат юзасидан ҳам ўз фиқҳий қарашларини баён қилиб ўтганлар. Имом Таҳовий раҳматуллоҳи алайҳ “Мухтасару ихтилаф ил-улама” асарида шундай ёзади:
«Имом Абу Ҳанифа раҳматуллоҳи алайҳ Исмоил ибн Абдулмаликдан, у Мужоҳиддан ривоят қилади:
«Хуфтондан олдин ухлаб, кейин уйғониб жамоат билан хуфтон ўқигандан кўра, уйқудан олдин ўзим якка ўқиб сўнг ухлаганим афзалдир!»
Имом Муҳаммад ибн Ҳасан Шайбоний раҳматуллоҳи алайҳ: «Биз шу қавлни оламиз. Хуфтондан олдинги уйқу макруҳдир. Бу масалада хилоф борлигини билмайман, деган» («Китоб ул-асор»).
Имом Молик ибн Анас раҳматуллоҳи алайҳ ҳам хуфтондан аввал ухлашни, ундан кейин гаплашишни макруҳ деб биламан, деганлар.
Имом Суфён Саврий ҳам хуфтондан олдинги уйқу менга ёқмайди, деган.
Халифа Умар ибн Хаттоб розияллоҳу анҳу хуфтон ўқимасдан ухлаганлар ҳақида:
«Аллоҳ кўзига уйқу бермасин», деб дуо қилган эканлар.
Имом Лайс ибн Саъд раҳимаҳуллоҳ ҳазрати Умарнинг шу сўзига изоҳ бериб: «Бу туннинг учдан биридан кейин ҳам хуфтон ўқимасдан ғафлат босиб ухлаганларга тегишли», деганлар.
Саййёр ибн Саламанинг Абу Барзадан ривоятига кўра, Расулуллоҳ соллаллоҳу алайҳи васаллам хуфтондан олдин ва хуфтондан кейин гаплашишни хушламас эканлар. Ва яна, хуфтон намозини туннинг биринчи учдан бирига суриб ўқир эканлар.
Баъзи ривоятларда Али розияллоҳу анҳу хуфтондан олдин бир оз ухлаб олишни яхши кўрардилар, деган гап бор.
Абдуллоҳ ибн Умар ҳам хуфтондан олдин ухлашга ётар, аммо бир одамни хуфтон вақти чиқишидан олдин уйғотиб қўйишга тайинлаб қўйиб кейин ухлар эканлар.
Имом Таҳовий раҳимаҳуллоҳ айтадиларки, хуфтон вақти киришидан олдин ухлаш макруҳ, вақти киргач эса мубоҳ. (Имом Таҳовий. Мухтасару ихтилаф ил-улама).
Хулоса шуки, тунда уйғониб хуфтонни ўқий олишига кўзи етган одам хуфтондан олдин ухлаши жоиз. Аммо бир ётишда тонг оттирадиган уйқучиларга эса хуфтонни ўқимасдан ухлаши мутлақо жоиз эмас.
Пайғамбаримиз соллаллоҳу алайҳи васаллам бир ҳадисларида ўз вақтида ўқилган намозни энг яхши амаллар сирасида санаб ўтганлар. Шунга кўра, намозни вақтидан ўтказиб ўқиш оғир гуноҳлар қаторидан жой олади. Қуръони каримда эса намозига бепарво бўлганларга вайл бўлсин, деган оят бор. Аллоҳ таоло ҳар намозимизни ўз вақтида тўла-тўкис адо этишни насиб этсин!
Ботиржон қори,
Элмурод Қўзиев,
Андижон тумани,
«Холдорбой Ҳожи» жоме масжид имом-хатиби
Манба: http://islom.uz
Ҳамма нарсангизни селфи қилиб бўлдингизми?
Ҳозирги кунда интернетдаги турли ижтимоий тармоқларда кўплаб кишилар шахсий ҳаётларига оид расмларни мунтазам қўйиб борадилар. Ана шундай инсонларга мурожаат қилиб айтмоқчимиз:
- Кўрдик, анвойи таомлар ебсиз. Уларнинг суратини саҳифангизга жойлабсиз. Қанча инсонлар бир бурда нонга зор.
- Уйингиз ҳашаматли экан. Қанча инсонларнинг ўз уйи йўқ, қанчаси эса ижара ҳақини тўлолмаяпти.
- Фарзандларингиз бор ва бир-биридан ширин экан. Қанча инсонлар тирноққа зор.
- Оилангиз тинч-тотув экан. Қанчалаб оилаларда хотиржамлик йўқ.
- Оилангиз ва дўстларингиз билан дам олгани Дубайга, Туркияга, Чимёнга борибсиз. Қанча инсонлар етишмовчилик, муаммо ва қарзлари кўплигидан ўз уйида кўзига уйқу келмайди.
- Яхши даромадли ишингиз бор экан. Қанча одамлар меҳнатга, ишга зор.
- Сўнгги русумда машинангиз бор экан. Шундай инсонлар борки, автобус, таксига кетадиган пулни тежаш учун совуқ кунларда ҳам велосипедда юради.
Дўстим ва синглим! Кўз тегишидан қўрқинг! Зеро, Имом Бухорий раҳимаҳуллоҳ ривоят қилган ҳадисда Пайғамбаримиз соллаллоҳу алайҳи васаллам “Кўз тегиши ҳақдир” деганлар. Агар кўз тегишидан қўрқмасангиз, ҳеч бўлмаса, уй, фарзанд ва моддий имконият жиҳатидан сиздан ночорроқ бўлган инсонларнинг қалбларини, туйғуларини ҳисобга олинг! Сизнинг расмларингизни кўрганда қандай аҳволга тушишларини кўз олдингизга келтиринг!
Ҳамма нарсангизни селфи қилиб, тармоққа жойлайверманг!
Нозимжон Иминжонов тайёрлади
Видеолавҳалар
