muslim.uz
Эътибордан масрур кўнгиллар
Аввал Ўзбекистон мусулмонлари идораси, Тошкент шаҳар ҳокимияти, "Аёллар маслаҳат марказ"и билан ҳамкорликда гапириш ва эшитиш қобилиятлари чекланган шахслар учун хайрия тадбири ташкил этилгани ҳақида хабар берган эдик. Кар-соқовлар жамиятининг аъзоси Моҳира Кубаева ушбу тадбир ҳақида ўзининг дил изҳорларини шундай баён қилди:
– Яратганга шукр, бугунги кунда ҳеч бир соҳа эътибордан четда қолмаяпти, барча соҳаларга алоҳида эътибор қаратилмоқда. Яқин кунларгача кар, соқовлар жамиятига аъзо ҳар бир инсонга эътиқод масаласида, соф Ислом динини ўрганиш борасида етарли билим олишга эътибор қаратилмагани ҳам сир эмас. Шунинг учун ҳам ўзи мусулмон бўлиб, миссионерликка кириб кетганлар сони кўпчиликни ташкил қилган эди. Отаси мусулмон ҳолида вафот этсада, масиҳийликда бўлган ўғли насронийларни қабристонига олиб бораман, деб қаршилик қилади. Қизлари черковга бораётганини билган ёлғиз она тўғри йўлга сололмай оилавий низолар келиб чиқади. Миссионерликни танлаганлар орасида оилавий низолар кўпайиб, кўпчилиги эса ачинарли ҳолдадир.
Миссионерликка кириб кетганларга Аллоҳнинг улуғлигини, Исо алайҳиссалом ҳам бир пайғамбар эканини, Ислом дини охирги илоҳий дин экани, Пайғамбаримиз Муҳаммад алайҳиссалом сўнгги пайғамбар эканлари ҳақида тушунтирилса, улар “Бизга ислом дини ҳақида тушунтирадиган жойлар йўқ, ота-оналаримиз ҳам тушунтириб бера олмайди. Черковда эса масиҳийлик ҳақида тушунтирадиган сурдо таржимонлар бор. Бизларга махсус байрамлар, сайёҳатлар ташкиллаштиришади”, деб жавоб қайтаришарди.
Бугун Ўзбекистон мусулмонлари идораси ва жамияти ҳамкорлигида олиб борилаётган хайрли ишлар кар-соқов мусулмонлар қалбида ҳам ҳаётга ижобий ёндашиш, Ислом динини ўрганиш, намоз, рўза, закот ва ҳаж амалларини бажаришга иштиёқ ва ғайрат пайдо қилмоқда.
Бошқа динга кирганлар эса тавба қилишиб, исломга киришмоқда. Оилаларда, болалар тарбиясида, қариндош-уруғчиликда, эр-хотин муносабатларида ижобий томонга ўзгаришлар бўлиб, бир-бирига ҳурмат, меҳр-шафқат ҳисси пайдо бўлмоқда.
Бизга кўрсатилаётган бундай ғамхўрликлар, эътибор ва меҳрдан кўнглимиз кўтарилиб, динимизга бўлган муҳаббатимиз яна ортиб боряпти. Неча йиллардан бери биз орзу қилган ниятларимизни амалга оширган, ҳар биримизга ҳидоят ва тавфиқ берган Аллоҳ таолога ҳамду-санолар бўлсин! Ушбу эзгу ишларимиз қиёматга қадар давомли бўлсин! Дуоларимиз ва ибодатларимизни Ўзи даргоҳида қабул қилсин! Мана шу каби хайрли тадбир ва зиёратларни ташкил этаётганларга алоҳида миннатдорлик билдирамиз. Улар бизни ҳам шу юртда яшаётган бошқа мусулмонлар сингари ўзимизни мусулмонлик вазифаларимиз, дуо-ю ибодатларимиз, зиёратларимизни мукаммал бўлишида йўл-йўриқ, маслаҳат ва тавсияларини бериб келишмоқда.
Хулоса қилиб айтганда, кўрсатилаётган эътибордан қалблар сурурга тўлиб, имонлар мустаҳкам бўлиб хайрли ишлар тепасида турган муҳтарам Президентимиз, барча мутасаддилар, диний идора раҳбариятининг ҳақига кўпдан-кўп дуолар қилинмоқда.
ЎМИ Матбуот хизмати
Диний идора имконияти чекланган кишилар учун зиёрат уюштирди
Бугун гапириш ва эшитиш қобилиятлари чекланган шахслар учун Диний идора томонидан навбатдаги хайрия тадбири ташкил этилди. Мана шундай кишиларимизни Тошкент вилояти Зангиота тумани “Зангиота” зиёратгоҳига ташрифлари амалга оширилди. Ушбу тадбирда 300 нафарга яқин имконияти чекланган шахслар ва уларнинг оила аъзолари қамраб олинди.
Зиёратчилар бугун эрталабдан Тошкент шаҳридан жамланиб, Зангиота зиёратгоҳи сари йўл олишди. Зиёратчилар учун алоҳида транспорт воситалари, гид ва сурдо таржимони хизматлари жалб этилди.
Имом-хатибларимиз томонидан зиёратчиларга Зангиота мажмуаси тарихи ҳақида маълумотлар берилди. Жумладан, ўз даврида ҳикматга тўла сўзлари ила кишиларни энг тўғри йўлга бошлаб, ўзидан кейин ўчмас из қолдириб кетган зотлар ушбу заминда жуда кўплаб ўтгани, уларнинг ортидан эргашган инсонлар ҳидоят топишгани ҳақида маълумотлар беришди.
Мана шундай зотлардан бири Сулаймон Боқирғонийнинг шогирди ва издоши Занги ота Ҳимматий ҳазратларининг камтарона ҳаёти, кўп кишиларнинг ҳидоят топишида, ахлоқий камолга етишида буюк хизматлари ҳақида гапириш ва эшитиш қобилиятлари чекланган шахсларга имом-домлалар томонидан сурдо таржимони орқали тушунтирилди.
Зиёратчилар учун тушлик вақтида эҳсон дастурхони ёзилди ва якунда Қуръон карим оятларидан тиловат қилиниб, ўтганларнинг руҳи покларига бахшида қилинди.
Гапириш ва эшитиш қобилиятлари чекланган шахслар ташкил этилган мана шундай табаррук жойларга файзли зиёрат ва маърифий суҳбат учун миннатдорлик билдиришди.
Ўзбекистон мусулмонлари идораси Матбуот хизмати
Париж туристик компаниялари ассоциациясининг йиллик йиғилиши Самарқандда ўтказилади
Шу мақсадда 31 март куни эрта тонгда Франциянинг Париж шаҳридаги туристик компаниялар ассоциацияси (Ilе de Franc) аъзолари “Ўзбекистон ҳаво йўллари” миллий авиакомпаниясининг махсус рейси орқали Самарқандга келди.
Жорий йил 22 февраль куни Президентимиз раислигида мамлакатимизда туризмни ривожлантириш масалаларига бағишлаб ўтказилган видеоселектор йиғилишида берилган топшириқлар ижроси доирасида Ўзбекистон Республикасининг Франциядаги элчихонаси Париждаги туристик компаниялар ассоциацияси билан ҳамкорликда ассоциациянинг навбатдаги йиллик йиғилишини Самарқанд шаҳрида ўтказиш бўйича келишувга эришган эди. Ушбу келишув асосида Париждаги туристик компанияларнинг 100 нафардан ортиқ раҳбар ва масъул ходимларининг юртимизга ташрифи уюштирилди.
ЎзА хабарига кўра, Самарқанд халқаро аэропортида меҳмонларни Самарқанд шаҳар ҳокими Ф.Раҳимов бошчилигидаги расмийлар тантанали кутиб олди.
Шаҳар ҳокими меҳмонларни юртимизга ташрифи билан қутлаб, ассоциациянинг навбатдаги йиғилиши Самарқандда ўтказилишини қўллаб-қувватлаши ва бунинг учун барча имкониятлар яратилганини таъкидлади. Самарқанд шаҳар ҳокимлиги ва шаҳардаги сайёҳлик фирмалари Париж шаҳри билан туризм соҳасида ҳамкорлик қилишга тайёр эканини билдирди.
Ilе de Franc ассоциацияси президенти Лионел де Робие Франциядаги сайёҳлик компанияларининг Ўзбекистонга мазкур ташрифи давлатларимиз ўртасида туризм соҳасида ҳамкорликни янада ривожлантириш ва бу борада янги истиқболлар очишга хизмат қилишини таъкидлади. Кутиб олиш маросимининг юқори савияда ташкил этилгани учун миннатдорлик билдирди.
–Самарқанд қадимий Буюк ипак йўлининг маркази, мўъжизавий шаҳар, – деди Лионел де Робие. – Бу шаҳарга келиш ва унинг гўзаллигидан баҳраманд бўлиш ҳар бир французнинг орзуси ҳисобланади. Шунинг учун бугун Самарқандга Франциядаги энг йирик сайёҳлик компаниялари вакиллари ташриф буюриб, бу ердаги туризм индустрияси иштирокчилари билан ҳамкорлик қилиш ниятида. Ассоциациямизнинг навбатдаги йиғилишини ушбу тарихий шаҳарда ўтказиш эса, биз учун улкан шараф.
Ташриф давомида ассоциациянинг йиғилиши ўтказилиши борабарида Самарқанд шаҳридаги туристик объектларга саёҳат, Самарқанд ва Жиззах вилоятларининг туризм имкониятлари бўйича тақдимотлари, маҳаллий туристик фирма ва компаниялар вакилларининг француз ҳамкасблари билан учрашувларини ташкил этиш кўзда тутилган.
Меҳмонлар 2 апрель куни Бухоро шаҳрига саёҳат қилади.
Ўзбекистон мусулмонлар идораси матбуот хизмати
Идорада авф этилганлар иштирокида тадбир ўтказилди
Бугун, 30 март куни Ўзбекистон мусулмонлари идорасида Ўзбекистон ёшлар иттифоқининг Марказий Кенгаши билан ҳамкорликда “Мўътадил ислом – икки дунё саодати гарови” мавзусида учрашув бўлиб ўтди. Унда диний идора раҳбар ходимлари, Ёшлар иттифоқининг Ижтимоий-ҳуқуқий масалалар ва ҳуқуқбузарлик профилактикаси бўлими вакиллари, тарбияси оғир ўқувчилар, носоғлом оилаларда вояга етаётган болалар ҳамда Ёшлар иттифоқи кафиллигида суд залидан озод қилинган ёшлар иштирок этди.
Тадбирни Ўзбекистон мусулмонлари идораси раиси ўринбосари Шайх Абдулазиз Мансур очиб, одоб-ахлоқ инсоннинг энг гўзал хулқларидан бири экани, ахлоқ Аллоҳ таоло томонидан берилган энг азиз неъматлиги, кишининг ахлоқи унинг зийнати бўлиши, ахлоқи чиройли инсонлар ҳар доим ҳар жойда ўз ўрнига ва ўз мавқеига эга бўлиши ҳақида панду насиҳатлар қилдилар.
Шундан сўнг Ўзбекистон мусулмонлари идораси масжидлар билан ишлаш бўлими масъул ходими Исҳоқжон домла Бегматов сўзга чиқиб, ёшлар ислом маърифатидан хабардор бўлишга интилиб яшаши, одоб-ахлоқли бўлишга, жамият ва она-Ватанга фойда келтиришга ҳаракат қилиши лозимлигини тушунтирди. Жумладан, “Яхши амалларнинг энг яхшиси чиройли хулқ” каби мазмундаги ҳадисларни шарҳлаб берди.
Учрашувда Ислом дини мўътадил дин экани, у инсонларни бунёдкорликка чорлаши, жамиятни бирлаштиришга даъват этиши, инсонларни меҳр-мурувват кўрсатишга чақириши ҳақида тушунтирилди. Шунингдек, Ислом дини мўътадилликни қўллаб-қувватлаши ҳақида сўз юритилиб, бу тўғрисида йиғилганларга атрофлича маълумотлар берилди. Жумладан, Пайғамбаримиз соллаллоҳу алайҳи ва салламнинг “Бойликда ҳам, фақирликда ҳам, ибодатда ҳам мўътадиллик қандай ҳам яхши”, деган ҳадисларининг мазмун-моҳияти изоҳлаб берилди (Имом Баззор ривояти).
Тадбир якунида иштирокчиларни қизиқтирган саволларга Диний идора уламолари ва Ёшлар иттифоқи вакиллари томонидан жавоб берилди. Шунингдек, ёшларнинг Ислом асослари, одоб-ахлоққа оид маълумотлар олиш, мавзуга доир китоблар билан таъминлаш масаласида, уларга диний идора, ёшлар иттифоқининг эшиклари доимо очиқ экани, ҳар қандай савол ёки масала юзасидан Диний идоранинг muslim.uz сайти, Ёшлар иттифоқининг yi.uz портали орқали ҳам мурожаат этишлари мумкинлиги эслатиб ўтилди.
Ушбу тадбир Ўзбекистон мусулмонлари идораси ва Ўзбекистон ёшлар иттифоқи Марказий Кенгаши ўртасида тузилган ҳамкорлик қилиш тўғрисидаги Меморандум доирасида ўтказилди.
Тадбир якунида иштирокчи ёшларга “Динимизда инсон манфаатлари”, “Халқ дарди билан яшайлик”, “Элсеварлик гўзал фазилат” номли китоблар тарқатилди. Шундан сўнг иштирокчилар “Ҳазрати Имом” мажмуасидаги тарихий обидалар, осори атиқалар ва маънавий меросларимизни зиёрат қилиб, руҳий қувват олишди.
Ўзбекистон мусулмонлари идораси Матбуот хизмати
Мусулмон олимлари дунёга совға қилган ихтиролар (Биринчи географик харита)
Ўрта асрларда мусулмонлар савдо ишлари билан жуда қаттиқ шуғуланган. Улар денгизлардан сузиб ўтган, карвонларда саҳроларни, тоғу тошларни кезиб юрган. Табиийки, улар ўзлари юриб ўтган манзилларни яхши ўрганган, чунки ортга қайтаётганда адашиб кетмаслиги керак бўлган-да. Шунингдек, улар борган жойларида яшайдиган халқнинг тилини ўзлаштирган, табиатини ўрганган. Негаки, айнан ана шу нарсалар савдонинг муваффақиятини таъмин этган.
Европаликларга Хитой, Индонезия, Африка ва Евроосиё ҳақида қимматли маълумотларни ҳам мусулмон савдогарлари ва сайёҳлари етказган.
XII асрда араб сайёҳи ал-Идрисий Сицилия қироли Рожер II илтимосига кўра, Европа, Осиё ва Африка тарихи ва географияси ҳақида муҳим манба бўлган – дунёнинг харитасини чизади ва уни “Рожер китоби” деб атайди.
ЎМИ Матбуот хизмати
Мақолалар
