Аҳли сунна вал жамоанинг ақидасига кўра, Аллоҳ таоло макондан ҳолидир. Бирор жойдан бошқа жойга кўчиш, умуман, маконга муҳтожлик Аллоҳ таолога асло хос эмасдир. У зот Осмонлар-у Ернинг яратувчиси бўлса, қандай ҳам Ўзи яратган нарсага жойлашиб олсин?!

لا يشبه شيئا من الاشياء من خلقه و لا يشبهه شئ من خلقه

Аллоҳ Ўзи яратган нарсалардан бирортасига ўхшамайди, яратганларидан бирортаси ҳам Унга ўхшамайди. (Абу ҳанифа. Фиқҳул акбар. Ақоид матнлари. Тошкент 2006. Б- 21)

Ақида уломалари шундан келиб чиқиб: Аллоҳ таоло бирир маконда бўлишдан ҳолидир, чунки маконда бўлиш яралмишларнинг сифатидир, деганлар.

Яна бир ҳанафий олим Сирожиддин ал-Ўший роҳимаҳуллоҳ ўзларининг “Бадул амолий” манзумаларида

و ربّ العرش فوق العرش لكن، بلا وصف التمكّن و اتصال

Аршнинг Роббиси Аршдан юқори, бироқ,

Жойлашиш, ўрнашиш васфидан йироқ

Дея бу борадаги эътиқодимиз қандай бўлишини баён қилган.

Афсуски, баъзи илм аҳллари аҳли суннат ва жамоатнинг кўпгина иттифоқий гапларидан ва бутун Ислом умматининг ижмў қилган масалаларидан кўпчилигига қарши чиқиб бугунги кунда ваҳҳобий, салафий ва зоҳирий каби номлар билан номланаётган Ибн жамоасини иккиланишларга мусулмонларнинг эса адашувига сабабчи бўлди. Аслида, бундай нотўғри эътиқоднинг асоси мужассималик ва мушаббиҳалик фикрлари билан тўлиб-тошган, аҳли суннат ва жамоат таълимотидан мутлақо узоқ ривоятлар билан тўлдирилган асарлардан олинган.

Ваҳҳобийлар бу асарни Имом Аҳмад ибн Ҳанбал раҳматуллоҳи алайҳининг ўғли Абдуллоҳ раҳимаҳуллоҳ ёзган, деб даъво қилиб ҳам нашр этганлар.

أنا أشعرى أعتقد أنّ القرآن معنى قائم بذات الله و هو صفة من صفات ذاته القديم و هو غير مخلوق و ليس بحرف و لا صوت و أنّ قوله الرحمن على العرش استوى ليس على ظاهره و لا أعلم كنه المراد به بل لا يعلمه الا الله و القول فى النزول كالقول فى الإستواء Мен ашъарийман! Қуръонни Аллоҳ таолонинг зотида қоим ва Унинг қадимий сифатларидан бири деб эътиқод қиламан. Қуръон яратилган эмас. У ҳарф ҳам, овоз ҳам эмас. Аллоҳнинг: “Раҳмон Аршга “истиво” қилди”, деган гапи зоҳирига қараб ҳукм қилинмайди. Унинг асл маъносини билмайман. Балки уни Аллоҳ таолодан ўзга ҳеч ким билмайди. “Нузул” (“Тушиш”) ҳақидаги гап ҳам худди “истиво”да айтилгани кабидир!”. (Ибн Ҳажар ал-Асқалоний. ад-Дурар ал-комина фий аён ал-миат ас-сомина. 1-жилд. – Байрут: Дор ал-Жийл, 1993. – Б. 148).

Аллоҳ таоло инсонга тавфиқ берсин экан. Акс ҳолда, илм-ирфон, тақво ва парҳезгорлик, ихлосли амал инсонни нотўғри ақидадан қутқара олмас экан.

Афсуски, мазкур ақидага нисбат берилган кишининг асоссиз ва ботил ақидасидан ҳамда мужассималик ғавғосидан қайтганлиги ва тавба қилганига эътибор бермасдан, аниқроғи, унинг ана шу гап-сўзларини ҳам, тавбасини ҳам оммадан яширган ҳолда ана шу асоссиз ва ботил ақидаси ҳамда мужассималик ғавғосини кўтариб юрганлар кейинги даврларда пайдо бўлаверди. Аҳли суннат ва жамоатнинг ҳаққоний олимлари: “Аллоҳ таоло бирор макондан ўрин олмайди ва Унда бирор замон ҳам жорий бўлмайди”, деган қатъий ақидада барқарордирлар!

Бу эътиқоднинг тўғри эканига “Саҳиҳ ал-Бухорий”да келган:

كان الله تعالى و لم يكن شئ غيره

“Аллоҳ таоло бор эди, ундан бошқа ҳеч нарса бўлмаганди”, деган ҳадиси шарифни келтириш мумкин (Бухорий ривоят қилган, 4/3191).

ТИИ талабаси 403- гуруҳ

Анварова Моҳигул

Муборак Рамазон ойи муносабати билан Сурхондарё вилоятидаги кам таъминланган, эҳтиёжманд оилалар учун “Бир мусулмоннинг оғирини енгил қилиш — бизга ҳам қарз, ҳам фарз", деган эзгу ғоя асосида ифторлик дастурхонлари ёзилмоқда.

Президентимиз жорий йилнинг 13 март куни Сурхондарё вилоятига ташрифи чоғида мутасаддилар ва дин уламоларига ўттиз кунлик муборак Рамазон ойида энг оғир маҳаллалардаги кам таъминланган оилалар учун ифторлик ташкил этиб, кўнгли ўксик мўмин-мусулмонлар оғирини енгил қилиш ташаббусини илгари сурган эди. Бу ташаббус ойлар ичидаги энг улуғ Рамазон ойида кенг қулоч ёзиб, воҳада кам таъминланган эҳтиёжманд оилалар учун ифторлик дастурхонларини ёзиш ажойиб анъанага айланди.  

Давлатимиз раҳбарининг бу ғояларида чуқур маъно бор. Зеро, мўмин-мусулмон киши муборак бу ойни бошқа ойларга нисбатан кўпроқ яхши кўради. Рамазонни мағфират, ҳидоят, раҳмат, тақво, меҳр-мурувват, саховат, гўзал хулқлар билан безаниш, солиҳ ишлар қилиш ойи сифатида улуғлайди. Бу ойда бошқа ойларга нисбатан мўлроқ раҳмат ёғилиши ва теварак-атрофга сочилган файзу-барокат нуридан баҳраманд бўлишга интилиб яшайди. Бу йилги Рамазонда вилоят маҳаллаларидаги кам таъминланганлар учун ташкил этилаётган ифторликлар ана шундай гўзал ойни янада файзли, тароватли ўтказишга хизмат қилмоқда.  

Айни кунларда секторлар раҳбарлари, имомлар жойларда ифторлик ташкил этиб, ҳикматли сабр ойида меҳр-мурувват ва саховат каби юксак фазилатларни кенг намоён этмоқда. Жумладан, Музработ туманидаги Юртим жамоли маҳалласининг кам таъминланган оилалари учун “Муҳаммади бобо” ошхонасида ташкил этилган ифторлик дастурхонига дин вакиллари, ёши улуғ отахон ва онахонлар ҳам таклиф этилиб, тўкин дастурхон атрофида Ватанимизга тинчлик, жойларда амалга оширилаётган улкан ислоҳотларга бардавомлик, ҳар бир хонадонга файзу барокат тилаб, дуо қилинди. Мамлакатимизда юз бераётган беқиёс ўзгаришлар, халқимиз фаровонлигини таъминлаш йўлида кўрсатилаётган ғамхўрликлар, жойларда кенг қулоч ёзаётган миллий қадрият ва анъаналаримизнинг ёш авлод тарбиясидаги ўрни сингари мавзуларда дилдан суҳбатлашди.  

Бандихон туманидаги Чинор маҳалласида яшайдиган Нодира Жўраева хонадонида ўтказилган ифторликка ҳудуддаги кам таъминланган оилалар ва диний идора вакиллари, маҳалла оқсоқоллари ҳам таклиф этилди.    

Шеробод туманидаги кам таъминланган оилаларда ҳам Рамазон муносабати билан ифторлик дастурхонлари ёзилиб, ҳидоят ойини хушкайфиятда ўтказишга кўмаклашилмоқда. Шунга кўра, муборак ойнинг ўтган даврида сектор раҳбарлари Хўжги, Мажнунтол, Ғуржак-1, Ғамбур, Қизилолма, Нуртепа каби ўндан ортиқ маҳалладаги кам таъминланган оилаларда бўлиб, имомлар, маҳаллалар оқсоқоллари иштирокида ифторлик ўтказди.    

Вилоятнинг барча маҳалла ва қишлоқларида секторлар раҳбарлари, диний идоралар вакиллари ҳамда оқсоқоллар иштирокидаги серфайз ифторликлар давом этмоқда.  

Холмўмин МАМАТРАЙИМОВ,  

ЎзА мухбири

Ўзбекистон мусулмонлари идораси ҳамда «Шамсуддинхон Бобохонов» нашриёт-матбаа ижодий уйи жамоаси нашриёт муҳаррири Абдулатиф Абдуллаевга муҳтарама волидаси Майрам БЕРДИШУКР қизининг вафоти муносабати билан чуқур таъзия билдиради.
Аллоҳ таоло марҳума онахонни раҳматига олсин, маконларини жаннат айласин. Фарзандларига, оиласига қилган хизматларига яраша Парвардигор онахонни Фирдавс жаннатлари билан сийласин.
Ортда қолган барча яқинлари, фарзандлари, қавму қариндошларига Аллоҳ таоло гўзал сабр берсин!

Иннã лиллãҳи ва иннã илайҳи рожиъƴн.

Ўзбекистон мусулмонлари идораси Матбуот хизмати

Мусулмонлар учун муқаддас ҳисобланган Рамазон ойида инсон қадрини улуғлаш, саховат кўрсатиш, меҳр-оқибат каби халқимизга хос фазилатлар янада намоён бўлади. Айниқса бу ойда кўнгли ўксик инсонларга қувонч улашишнинг ажри савоби ниҳоятда кўп.
Шу кунларда барча ҳудудларда ташкил этилаётган саховат тадбирлари Наманган вилоятида ҳам уюшқоқлик билан ташкил этилмоқда. Хусусан, Наманган шаҳридаги "Қадамжо" маҳалласида Маҳалла хайрия жамоат фонди томонидан ифторлик дастурхони ёзилди. Унда нуронийлар ҳамда эҳтиёжманд оилалар вакиллари 150 нафардан ортиғи иштирок этди.
Тадбирда сўзга чиққан Наманган шаҳар бош имом хатиби Мусохон Аббосиддинов бугунги кунда мамлакатимиз диний соҳада кенг кўламли ислоҳотлар амалга оширилаётганлигини таъкидлаб, барчани муборак Рамазон ойи билан қутлади.
Ифторлик сўнггида дуога қўл очган нуронийлар юртга тинчлик-омонлик сўрадилар, бундай ҳур, эмин-эркин замоннинг қадрига етиш, шукрона келтириш лозимлигини таъкидладилар.
Бундай хайрли эҳсон тадбирлари Тошкент шаҳрида ҳам бўлиб этмоқда. Куни кеча Тошкент бош имом-хатиби в.б. Абдуқаҳҳор домла Юнусов Шайхонтоҳур туманидаги "Шайх Зайниддин" жоме масжиди атрофидаги маҳаллаларда яшовчи кам таъминланган, боқувчисини йўқотган, эҳтиёжманд оилалар ҳолидан хабар олиб, уларга ифторлик учун зарур бўлган озиқ-овқат маҳсулотларини тарқатди. Шу билан бирга, Абдуқаҳҳор домла хонадон соҳиблари билан бирга ифторлик қилиб, улар билан дилдан суҳбатлашди.
Бундай эҳсонлардан шод бўлган оилалар, бу хайрли ишларнинг бошида турган барча азиз инсонларнинг ҳақларига хайрли дуолар қилишди.

ЎМИ Матбуот хизмати