Жанубий Корея пойтахти Сеул шаҳрида мусулмон сайёҳларни жалб қилиш бўйича саъй-ҳаракатлар доирасида кўпроқ ҳалол ресторан ва намозхоналар қуриш режалаштирилган, - дея хабар беради пойтахт маъмурияти. 

“Ислом пойтахти” интернет ресурси хабарига кўра, Сеул туризм ташкилоти шу ойда мусулмон туризмини жонлантириш чора-тадбирларини ишлаб чиқиш бўйича тадқиқот лойиҳасини бошлайди. 

  2023 йилда Кореяга келган 1 миллиондан ортиқ чет эллик саёҳатчининг 273 мингга яқини Яқин Шарқдан, 218 минг нафари Жануби-Шарқий Осиё давлатларидан, жумладан, мусулмонлар кўп бўлган Малайзия ва Индонезиядан келганлар ташкил қилади. 

Ўзбекистон мусулмонлари идораси

Матбуот хизмати

Ўзбекистон Республикасининг Ар-Риёддаги Фавқулодда ва Мухтор элчиси Нодиржон Турғунов Қироллик вазирлар маҳкамаси маслаҳатчиси, Қирол Салмон номли гуманитар ёрдам маркази бош директори Aбдулла бин Aбдулазиз ар-Рабияни қабул қилди, деб хабар бермоқда “Дунё” ахборот агентлиги.

Учрашувда ҳамкорлик, жумладан, таълим ва соғлиқни сақлаш соҳалари, шунингдек, Оролбўйи минтақасини ривожлантиришни қўллаб-қувватлаш масалалари муҳокама қилинди.

Ўзбекистон Президентининг 2022 йилда Саудия Aрабистонига расмий ташрифидан сўнг икки давлат ўртасидаги ҳамкорлик янги суратга эга бўлгани таъкидланди. Саудия Aрабистонининг Ўзбекистон билан муносабатларни ҳар томонлама ривожлантириш истаги таъкидланди. Бу борада марказ мамлакатимизда ишлаб чиқилаётган лойиҳаларни молиялаштириш масаласини кўриб чиқиш ва ҳамкорлик алоқаларини ривожлантиришга тайёр эканини маълум қилди. Саудия томони бошқа соҳаларда ҳам ҳамкорликни йўлга қўйишдан манфаатдорлигини билдирди.

Учрашув якунлари бўйича ҳамкорликни мувофиқлаштириш мақсадида Ўзбекистоннинг Aр-Риёддаги элчихонаси вакиллари билан мунтазам музокаралар олиб бориш бўйича келишувга эришилди.

Ўзбекистон мусулмонлари идораси

Матбуот хизмати

Шу йил 27 май куни Сурхондарë вилоятидаги Имом Термизий халқаро илмий-тадқиқот марказида 54 нафар имконияти чекланган ногиронлиги бўлган инсонлар билан “Сиз бизга кераксиз!” шиори остида хайрия тадбири ўтказилди. Унда Ўзбекистон мусулмонлари идораси Хотин-қизлар бўлими масъул ходими Мунира Абубакирова, вилоят бош отинойиси Х.Қосимова, отинойилар иштирок этди. 

Маърифий тадбирда мутасадди вакиллар иштирокчиларга юртимизда мазкур ҳамюртларимизга кўрсатилаётган ғамхўрлик, миссионерликдан огоҳ бўлиш ва “Сиз бизга кераксиз” мавзусидаги кўргазмали материаллар асосида маъруза қилиб беришди. 

Шунингдек, иштирокчилар ўзларини қизиқтирган саволларга жавоб олиш баробарида фикр-мулоҳазаларини баён қилди. 

Тадбир якунида “Вақф” фондининг иштирокчиларга озиқ-овқат маҳсулотлари ва совға-саломлар берилди. 

Ўзбекистон мусулмонлари идораси

Матбуот хизмати

Масжидлар нафақат ҳайратланарли даражадаги гўзал меъморий ёдгорликлар, балки улар мусулмон дунёсида муҳим диний, ижтимоий ва маданий маскандир. Ушбу мақолада дунёдаги энг катта 5 та масжид ҳақида маълумот берамиз.

1. Маккадаги “Масжиди Ҳаром”

 Ислом оламининг марказида – Макка шаҳрида жойлашган Масжиди Ҳаром дунёдаги энг катта масжид ҳисобланади. Масжид ер юзидаги энг биринчи ибодатгоҳ — Каъбани ўз ичига олади. Манбаларга кўра, Каъбани илк қурувчилари фаришталар бўлган. Ўзининг узоқ асрлик тарихи давомида масжид имкон қадар кўпроқ зиёратчиларни қабул қилиш учун бир неча бор қайта қурилган. Эндиликда Масжиди Ҳаром 1 миллионга яқин кишини сиғдира олади. Агар масжид атрофидаги ҳудудларни ҳисобга оладиган бўлсак, ибодат қилувчилар сони 2 миллиондан ошиши мумкин. Масжиднинг майдони 357 минг квадрат метрни ташкил қилади. Лекин масжид доимий равишда кенгайиб бормоқда. 

2. Мадинадаги Пайғамбаримиз соллаллоҳу алайҳи васаллам масжиди –Масжиди Набавий

 Пайғамбар алаҳиссалом масжиди дунёдаги иккинчи йирик масжиддир. Унинг қурилиши 622 йилда бошланган ва унда Расулуллоҳ соллаллоҳу алайҳи васалламнинг ўзлари иштирок этган. Пайғамбаримиз Муҳаммад соллаллоҳу алайҳи васалламнинг қабрлари мажмуа ичида жойлашган бўлиб, деворлар билан ўралган. Дафн қилинган жой устида яшил гумбаз қад ростлаган. Масжиднинг ҳозирги ўлчами илк бор қурилган масжид биносидан юз баробар катта. Дарҳақиқат, масжид ҳозир бутун Мадинанинг эски шаҳар қисмини деярли қамраб олади. Одатий кунлари Масжиди Набавийда 600 мингга яқин одам сиғади. Ҳаж ва Рамазон умраси вақтида 1 миллионгача зиёратчиларни қабул қилиши мумкин. Масжиднинг майдони тахминан 400 минг квадрат метрни эгаллайди.

3. Исломободдаги Файсал масжиди

 Покистон пойтахти Исломободда жойлашган Файсал масжиди дунёдаги энг катта учта масжиддан биридир. Масжид қурилишига Қирол Файсал ва Саудия Арабистони ҳукумат ҳомийлик қилган. Масжид биноси гўзал ҳудудда жойлашган. Шуниси эътиборга лойиқки, унинг дизайни мусулмонларнинг анъанавий архитектурасидан кескин фарқ қилади. Энг муҳими, бинонинг шакли кўчманчиларнинг чодирига ўхшайди. Масжиднинг дизайни қурилиш бошланган вақтда катта норозиликларга сабаб бўлди, аммо қурилиш тугагандан сўнг, танқидчилар нотўғри фикрда бўлганликларини тан олдилар. Файсал масжиди тахминан 300 минг кишини сиғдира олади. 

4. Жакартадаги Истиқлол масжиди

 Индонезия Мустақиллик масжиди ёки Истиқлол масжиди Жануби-Шарқий Осиёдаги энг катта масжиддир. 1949 йилда Индонезия мустақилликка эришди ва бу воқеани абадийлаштириш учун давлат пойтахтида катта масжид қуришга қарор қилинди. Масжид қурилиши 1961 йилда бошланган ва 120 мингга яқин намозхонларни қабул қилади.

5. Касабланкадаги Ҳасан II масжиди

Марокашнинг энг йирик шаҳри Касабланкада жойлашган Ҳасан II масжиди нафақат улкан ҳажми, балки гўзаллиги билан ҳам ҳайратга солади. Атлантика океани қирғоғида жойлашган масжид атрофида ажойиб манзара касб этган. Масжид 105 минг кишини сиғдира олади, майдони тахминан 9 гектарни ташкил қилади. Масжид қурилишига сарфланган 800 миллион долларнинг барчаси одамларнинг хайр-эҳсонлари ҳисобланади.

 Жиззах вилояти, Ғаллаорол тумани

бош имом-хатиби Ғулом Жуманов