Барча мужтаҳид уламоларимиз наздида фотиҳадан кейин “Омин” лафзини айтиш суннат ҳисобланади. Ханафий, Моликий мазҳабида “Омин” лафзи овоз чиқармай айтилади. Далиллар қуйидагилардир:
1-чидан “Омин” лафзи дуодир, маъноси ижобат қил, дуони қабул қил деганидир шундайки, қандай дуо қилишни Аллоҳ Таъоло бизга ўргатиб оятда айтади:
У ҳаддан ошувчиларни севмас. Аъроф 55.
Ҳадисда:
Ичида махфий қилинган дуо, ташқарисида қилинган 70 та дуога тенг келади.
Муҳаддис Ибн Хиббон ўзларининг саҳиҳларида марфуъ холда қилган ривоятида “Дуонинг яхшиси - махфийсидир” дейилган. Демак Фотиҳадан сўнг “Омин” ичимизда айтсак юқоридаги оят ва ҳадисга амал қилган бўламиз.
2-чидан Абу Вайл розияллоҳу анҳудан ривоят қилинади у зот айтадилар:
Али ва Ибн Масъуд розияллоҳу анҳумлар, намоз ичидаги бисмиллаҳни, аъузуни ва “Омин”ни ҳам овоз чиқариб айтмасдилар. Жанобимиз билан доимо бирга юрган бу иккалови саҳобани “Омин”ни овоз чиқариб айтмаганлари кучли далил ҳисобланади. Бошқа ривоят Ҳазрат Умарни “Омин”ни ичида айтганлари таъкидланган.
Ханафий уламолари шу маънодаги бошқа саҳобалардан ривоятлар келтирганлар.
3-чидан “Омин” лафзи Қуръондан эмаслиги ҳаммамизга маълум, бунинг устига ушбу лафз арабча ҳам эмас. Аъузу биллаҳи минаш-шайтонир рожийм Қуръонда келган, бизга тиловат қилишдан олдин таъаввузни вожиб қилган. Ўшандай бўлсада Аъузуни намоз ичида махфий айтилади. Нима учун “Омин”ни овоз чиқариб айтиш керак.
4-чидан намоз жуда машҳур ибодат ҳисобланади. Жанобимиз намоз фарз бўлгандан бошлаб ҳар куни 5 вақт намозни жамоат билан ўқиганлар. Расулимизни ҳар ўқиган намозлари минглаб кишилар томонидан синчковлик билан кузатиб борилган. Агар “Омин”ни овоз чиқариб айтиш афзал бўлганида, у – зот буни баён қилган бўлардилар. Орада ҳеч қандай шубҳа қолмаган бўларди. Баъзан биринчи сафдагилар эшитадиган қилиб, таълим учун паст овозда “Омин” деганларидан бошқа ҳеч бир далил йўқ. Айниқаса имомга иқтидо қилиб намоз ўқиётганларнинг “Омин”ни овоз чиқариб айтганлари ҳақда ҳеч қандай ривоят маълум эмас. Демак ихтилофга берилмаслик учун юртимиз мусулмонлари ота-боболаримиз юрган ханафий мазҳабига амал қилишлари лозим ва лобуддир...

Наманган тумани "Мирзабой Холтўрабой"

жоме масжиди Акромов Козимхон

https://www.youtube.com/@Muslimuzz 

Бугун, 7 февраль чоршанба куни Ўзбекистон мусулмонлари идораси раисининг биринчи ўринбосари Ҳомиджон домла Ишматбеков фуқароларни қабул қилиб, уларнинг арз ва таклифларини эшитди.

Қабул чоғида улар томонидан кўтарилган масжидлар ҳолати, имом-хатиблар фаолияти, оилавий масалалар, диний таълим, ҳажга бориш, моддий ёрдам сингари мурожаатлар тингланиб, масъулларга мазкур масалаларни ўрганиб, қисқа муддатларда ҳал этиш юзасидан топшириқ берилди.

Жумладан, оилавий муносабатлар бўйича келганларга муаммолар ечим бўлувчи маслаҳатлар, шаръий масалалар юзасидан тавсиялар, ўқиш ва ҳаж борасида тушунчалар ва моддий ёрдам сўраганларга белгиланган тартибда кўмак берилди.

Бугунги қабул давомида Андижон, Тошкент, Хоразм, Қашқадарё, Сурхондарё, Самарқанд, Навоий вилоятлари ҳамда Тошкент шаҳридан келган ҳар бир фуқаронинг муаммо ва таклифлари эшитилиб, уларнинг ечими бўйича амалий чоралар кўрилди.

Бу каби қабул жараёнлари Ўзбекистон мусулмонлари идорасининг ҳудудлардаги вакилликлари ва барча жоме масжидларида ҳам ҳафтанинг ҳар чоршанба куни имом-домлалар томонидан амалга оширилмоқда.

Ўзбекистон мусулмонлари идораси
Матбуот хизмати

https://t.me/iiau_official/16760 

Тўғри йўлдаги халифалар давридан кейин Ислом динидан турли адашган мазҳаб, оқим ва фирқалар пайдо бўлдики, булардан хаворижлар, мўътазилийлар, муржиалар кабилар Ислом бирлиги ва бирдамлигига жиддий зарар келтирди, турли фитна ва тафриқаларга (бўлинишларга) сабаб бўлди. Ана шундай оғир бир пайтда соф Ислом ақидасини сақлаб қолиш учун ҳаракат қиладиган уламолар етишиб чиқдилар. Улар Қуръони Карим ва Суннат таълимотлари асосида, Набий соллаллоҳу алайҳи васалламнинг саҳобалари услубида ақида масалаларини ёрита бошладилар. Уларга «Аҳли сунна вал жамоа» номи берилди. 

Кейинроқ, одамларга тушунарли бўлиши учун, матнларни таъвил қилишга ҳам мажбур бўлинди. Турли китоблар битилди. Аҳли сунна вал жамоанинг ақида бобидаги таълимотлари тўпланиб, тартибга солинди. Ниҳоят, ақидавий мазҳаб бўлиб шаклланди ва ўз имомларига ҳам эга бўлди. 

«Аҳли сунна вал жамоа» исми бундан аввал ҳам бор эди. Аммо кейинроқ, юқорида номлари айтиб ўтилган турли фирқаларга муқобил ўлароқ, айни шу исмни ишлатила бошланди. «Аҳли сунна» деганда «суннатга юрганларнинг йўли ва ҳадисга амал қиладиганлар» деган маънолар кўзда тутилган. Бу борада имом ал-Ашъарий ва ал-Мотуридий Аҳли сунна вал жамоанинг ақида бўйича имомлари деб тан олиндилар. Бу икки имом Ислом оламининг икки тарафида – Ашъарий басралик, Мотуридий самарқандлик бўлса ҳам ва бир-бирлари билан кўришмаган бўлсалар ҳам, бир хил ишни бир хил вақтда, бир хил тарзда адо этганлари ҳамда икковларининг бирданига Аҳли сунна вал жамоа мазҳабининг имоми деб эътироф қилиниши бу мазҳабнинг ақидаси доимо барча юртларда маълум ва машҳур эканига ёрқин далилдир. 

Ислом уммати ичида Ҳақни топган ва унга эргашган фирқа Пайғамбаримиз алайҳиссалом ва у зотнинг саҳобалари амал қилган йўлда собит қолган мусулмонлардир. Қолган етмиш икки фирқа Ҳақни топмаган бўлса-да, Ислом динининг қатъий ҳукмларини инкор қилмагани учун Ислом доирасида ҳисобланади. Ислом уммати ичида Ҳақни топган ва унга эргашган фирқа «Аҳли сунна вал жамоа» деб аталади. Аҳли сунна вал жамоа фирқаси амалиётда тўрт мазҳабга бўлинган: 

1. Ҳанафий мазҳаби. Имом Абу Ҳанифа Нўъмон ибн Собит. 

2. Моликий мазҳаби. Имом Молик ибн Анас. 

3. Шофеъий мазҳаби. Имом Муҳаммад ибн Идрис аш-Шофеъий. 

4. Ҳанбалий мазҳаби. Имом Аҳмад ибн Ҳанбал. 

Бугунги кунда дунёдаги мусулмонларнинг 92,5 фоизи Аҳли сунна вал жамоа мазҳабидадир. Улардан ҳанафийлар 47 фоизни, шофеъийлар – 27, моликийлар – 17, ҳанбалийлар – 1,5 фоизни ташкил этади. 

Манба