Давлатимиз раҳбари жорий йилнинг 17 февраль куни Бухоро вилоятига сафарида Ўзбекистон мусулмонлари идораси раиси, муфтий Нуриддин Холиқназаровнинг кам таъминланган оилалар вакилларини Умра зиёратига юборишда давлат томонидан ёрдам бериш борасидаги илтимосини қаноатлантириб, қўллаб-қувватлаган эди.

Шу муносабат билан Хоразм вилоятидан ҳам 100 нафар юртдошимиз умра зиёратини амалга ошириб қайтди.  Уларни Ўзбекистон мусулмонлари идораси Хоразм вилояти вакили Хайрулла домла Абдуллаев бошчилигида Ҳаж ва Умра бўйича мутасаддилар ва зиёратчиларнинг яқинлари  кутиб олди.

— Бугун мамлакатимизда инсон қадрини улуғлаш давлат сиёсати даражасига кўтарилди, – дейди  Урганч шаҳар бош имом-ҳатиби Ҳасанбой Кенжаев. – Айниқса, ижтимоий ҳимояга муҳтож, кам таминланган, кам даромадли оилаларга ёрдам кўрсатиш, иқтисодий, тиббий, таълим борасидаги кўмаклар натижасида юртдошларимиз ҳаёт тарази тубдан ўзгармоқда. Давлатимиз раҳбарининг саъй ҳаракатлари билан Саудия Арабистонига ҳозирда ҳар куни Жидда ва Мадина шаҳарларига икки марта авиапарвоз мунтазам амалга оширилмоқда. Бу эса зиёратчиларимиз сони тобора кўпайиб бораётганидан дарак беради.  Муборак зиёратга отланган юртдошларимиз учун иккала шаҳарда барча шарт-шароитлар яратилган. Бунинг учун Яратганга шукроналар айтмоғимиз, шароитларни қилиб бераётган ҳукуматимиздан миннатдор бўлмоғимиз лозим.  

Дарҳақиқат, ҳар бир мусулмоннинг орзуси бўлган Ҳаж зиёратини адо қилиш кўпчилик учун йиллар давомида фақат орзулигича қолмоқда эди. Улар орасида мана бу юртдошларимиз ҳам бор. Нафақа ёшига етган бўлсалар ҳам бу истаклари амалга ошмаганди. Ушалмас орзу деб ўйланган бу истак давлатимиз раҳбари томонидан амалга оширилди.  

— Ҳеч қачон шундай амал менга насиб этади, деб ўйламагандим, – дейди зиёратчи Шукуржон Юнусова. – Аллоҳ таоло юртбошимизнинг кўнглига солиб бизга шундай ғамхўрлик қилиб, савобга қолдилар. Сафар давомида барча шароитлар юксак даражада яратиб берилди. Бариб келишимизда умуман қйналмадик. Муқаддас амалларни эмин-эркин бажардик. Юртимиз ҳамиша тинч-осуда бўлишини, мамлакатимизнинг янада ривожланишини, давлатимиз раҳбарининг соғ-омон бўлишларини, дастурхонларимиз ҳамиша тўкин бўлишини тилаб қайтдик.  

Нуронийларни яқинлари катта хурсандчилик билан қарши олди. Орзулари ушалаб, фарзандлари, набиралари бағрига қайтган элдошларимиз дили ва тилида шукроналик.  

Маҳалласида йиллар давомида ҳалол меҳнат қилиб, имон-эътиқоди, хулқ-атвори билан ҳурмат қозонган отахон ва онахонларимиз бугун муборак зиёратни адо этиб уйига қайтишлари эришган ҳурмат ва эҳтиромини янада юксалтирди. Муҳими улар Янги Ўзбекистонда ҳеч ким эътибордан четда эмаслигини яна бир бор ҳис қилишди.

Аҳмаджон ШОКИРОВ, ЎзА

Рамазон ойида мусулмонлар кўплаб руҳий, маънавий манфаатлар оладилар. Бу ойнинг яна бир фазилати шуки, саховатпеша мусулмонлар яқинларига, бева-бечора, етим-есирларга қўлларидан келганча эҳсону садақа ва ифторликлар улашадилар. Рўзадорларга ташкил этиладиган ифторлик дастурхонларининг файзи бўлакча. Албатта, ифторликдан сўнг хонадон соҳиби ҳаққига хайрли дуолар қилинади.
Анас розияллоҳу анҳудан ривоят қилинади. Расулуллоҳ солаллоҳу алайҳи ва саллам Саъд ибн Убоданикига ифторлик қилгани борганларида, у нон ва ёғ қўйди. Пайғамбар алайҳиссалом улардан тановул қилиб:
أفطر عندكم الصَّائمون، وأكل طعامكم الأبرار، وصلَّت عليكم الملائكة
"Афтора ъиндакум сооимуна ва акала тоъамакумул аброро ва соллат ъалайкумул малааикаҳ", яъни: "Рўзадорлар сизларнинг ҳузурингизда ифтор қилишди. Яхшилар овқатларингиздан тановул қилишди. Фаришталар сизларга салавот айтишди", деб дуо қилдилар (Имом Абу Довуд ривояти).
Анас розияллоҳу анхудан ривоят қилинади. Расулуллоҳ солаллоҳу алайҳи ва саллам бирор қавм ҳузурида ифторлик қилиб, оғизларини очсалар: "Афтора ъиндакумум соимун..." деб юқоридаги дуони айтар эдилар.
Биз ҳам Пайғамбаримизнинг суннатларига амал қилиб, ифторликларга борганимизда, мазкур дуоларни айтсак, манфаатли бўлади, иншоаллоҳ.

Мустақим ИСОЕВ,
Шофиркон тумани «Қори Фазлиддин» жоме масжиди имом-хатиби

Саудия Aрабистонида бундан XIII аср муқаддам қурилган қадимий “ас-Сафа” масжиди қайта тикланади, деб хабар бермоқда “The National” нашри.

Масжидни таъмирлаш ишлари 2018 йили валиаҳд шаҳзода Муҳаммад бин Салмон ҳазрати олийлари томонидан тарихий масжидларни тиклаш бўйича бошланган лойиҳанинг бир қисмидир. Лойиҳа доирасида қироллик бўйлаб жами 130 та тарихий ва диний аҳамиятга эга масжид ва обидаларни таъмирлаш режалаштирилган.

Мазкур Балжураши вилоятидаги “ас-Сафа” масжиди Саудия Aрабистонидаги энг қадимий масжидлардан бири ҳисобланади.

ЎМИ Матбуот хизмати

Хайруллоҳ домла Саттаров - вилоят бош имом-хатиби ўрнибосари

Сурхондарё вилоятидан 100 нафар кам таъминланган, ижтимоий дафтарларда рўйхатда турган хонадонлар, ибратли оилалар вакиллари, фахрийлар муборак Рамазон ойида давлатимиз берган йўлланма асосида Саудия Арабистонида Умра зиёратини амалга ошириш бахтига муяссар бўлди.

— Моҳи Рамазон ойида эҳтиёжманд оилалар вакилларининг муқаддас Умра зиёратига давлат кўмагида юборилиши ажру савоби беҳисоб тарихий воқеа бўлди,–дейди Сурхондарё вилояти бош имом хатиби Алиакбар Сайфуддинов. – Президентимиз Шавкат Мирзиёевнинг 17 февраль куни Бухоро вилоятига ташрифи чоғида Ўзбекистон мусулмонлари идораси раиси, муфтий Нуриддин Холиқназаров давлатимиз раҳбаридан кам таъминланган оилалар вакилларини Умрага юборишда давлат томонидан ёрдам беришни сўраган эди. Бу илтимос қаноатлантирилгани Умра зиёратига боришни ният қилиб, имконини топалмай турган кўплаб эҳтиёжманд юртдошларимизнинг орзусини руёбга чиқармоқда. Хайрли ташаббуснинг эзгулик, раҳмат ва мағфират, меҳр-мурувват ойида амалга оширилаётгани барчага бирдек қувонч улашмоқда.  

Сурхондарё вилоятида ҳам шу ташаббусга мувофиқ Термиз шаҳри ва туманлардан аҳоли сонига қараб, маҳалла-куй ва эл орасида ҳурмат-эътибор қозонган, муқаддас сафарга боришга моддий имконияти етмаётган ва бошқа жиҳатлари ҳисобга олинган 100 нафар зиёратчи руйхати шакллантирилди. Умра зиёрати ҳаражатлари давлат томонидан қоплаб берилди.

Рамазони шариф кунларида муқаддас сафарга йўл олган сурхондарёликларнинг бир гуруҳи Умра зиёрати амалларини адо этиб, бир олам қувонч билан қайтиб келди. Улар сафида Шеробод туманидаги Олтин воҳа маҳалласида яшайдиган 65 ёшдаги Роза Ниёзова ҳам бор.  

Роза ая 38 йил таълим ва адлия тизимларида раҳбарлик лавозимларида хизмат қилди. Ёш авлодни Ватанга муҳаббат, юртга садоқат руҳида тарбиялаш ҳамда халқимизнинг ҳуқуқ ва қонуний манфаатларини таъминлашга муносиб ҳисса қўшди. Фидойилиги билан эл-юртда ҳурмат-эътибор қозонган меҳнат фахрийси хонадони маҳалладаги энг ибратли оилалардан биридир.

— Умра ибодатини адо этиш ушалмас ниятим эди. Лекин, имкониятимиз етмай турганди, – дейди Роза ая Ниёзова. – Ҳаж ва Умра сафарига бориб келаётганларни зиёрат қилганимда менга ҳам ғойибдан шундай ҳузурбахш неъмат ато этилишини сўрардим. Бу йилги Рамазон ойида бу ниятим ижобат бўлиб, давлат ҳисобидан Умра зиёратига бориб келдим. Жидда халқаро аэропортида бизларни махсус ишчи гуруҳ кутиб олиб, зарур қулайликларга эга замонавий меҳмонхонага жойлаштирди. Умра зиёратини тўла-тўкис бажаришимиз учун барча шароитларни яратиб берди. Биз Макка ва Мадина шаҳарларида ибодат амалларимизни бажараётиб, шу кунларга етказгани учун бундай эзгу ишнинг ташаббускори бўлган Президентимизга узоқ умр, олиб бораётган эзгу ишларининг бардавом бўлишини тилаб, дуо қилдик. Аллоҳга ҳамду санолар айтиб, осуда, обод Ватанимиз ҳамиша тинч, фаровон бўлишини сўрадик. Ҳаётимизнинг куч-қувватга тўла йилларида кўрмаган шундай саодатли кунларни ином этаётган давлатимизга шукрона айтиб яшаш биз учун шарафли амал бўлаётганидан қувончимиз чексиз.  

Макка ва Мадина шаҳарларида Умра зиёратини тўла-тўкис адо этган навбатдаги гуруҳ эртага Сурхондарё вилоятига етиб келади.  

Холмўмин МАМАТРАЙИМОВ, ЎзА