2019 йил 28 ноябрь куни “Хожа Бухорий” ўрта махсус ислом билим юртида суюкли пайғамбаримиз Муҳаммад мустафо соллаллоҳу алайҳи васалламнинг таваллуд ойлари муносабати билан “Пайғамбаримиз сийрати – ибрат мактаби” мавзусида тадбир ва сийрат мусобақаси бўлиб ўтди.
Тадбирни билим юрти мудири Ў. Ғузаров кириш сўзи билан очиб, Пайғамбаримиз алайҳиссалом ҳаётларининг ҳар бир нуқтаси биз мусулмонлар учун ибрат бўлмоқлиги, у зотнинг суннатларига амал қилиш билан биз ўз муҳаббатимизни изҳор қилишимиз мумкинлиги ҳақида гапириб, тадбирнинг аҳамиятини тушунтириб ўтди.
Шундан сўнг сийрат мусобақаси иштирокчилари белгиланган шартлар бўйича чиқиш қилдилар. Ҳакамлар томонидан ғолиб деб топилганларга қимматбаҳо совғалар ва фахрий ёрлиқлари топширилди.
Шунингдек жорий ой давомида билим юрти талабалари ўртасида Расулуллоҳ соллаллоҳу алайҳи васалламнинг ҳаётларини ўрганишга доир мақолалар ва иншолар танлови эълон қилинган эди. Мазкур танлов ғолиблари ҳам эълон қилиниб, билим юрти ҳомийлари кўмагида муносиб тақдирланди.
“Хожа Бухорий” ўрта махсус ислом билим юрти
матбуот хизмати
