muslim.uz
Шошилинг: “Сарҳисоб” танловининг ҳудудий босқичи 10 ноябрь куни якунланади
Муҳтарам диний-маърифий йўналишда қалам тебратиб, ижодини ривожлантираётган қалам аҳли бир неча йиллардан буён анъанавий тарзда ўтказиб келинаётган «Сарҳисоб» танловининг ҳудудий босқичига ҳужжатларни қабул қилиш муддати тугашига оз қолмоқда.
Эслатиб ўтамиз, 2021 йилнинг 1 январидан 2021 йилнинг 1 ноябргача газета ва журналларда босилган, радио орқали эфирга узатилган, телевидениеда кўрсатилган ва Интернет тармоғида эълон қилинган материаллар 2021 йилнинг 10 ноябрига қадар қабул қилинади.
Ҳудудий босқич ғолиблари республика босқичида қатнашиш ҳуқуқини қўлга киритишади.
Танловнинг ҳудудий босқичи 20 ноябргача ўтказилиши кўзда тутилган.
Республика босқичи ғолиблари ҳудудий босқичда ғолиб чиққан иштирокчилар орасидан ҳакамлар ҳайъати томонидан танлов асосида сараланади. Танлов ғолиблари ОАВда эълон қилинади.
Fолиб махсус диплом ва ташкилотчиларнинг қимматбаҳо совғалари билан тақдирланади.
Танловда иштирок этувчиларнинг материаллари ҳар бир ҳудуд бўйича Ўзбекистон мусулмонлари идорасининг ҳудудий вакилликларига топширилади.
Мурожаат учун маълумотлар:
Андижон вилояти (74) 228-01-58
Бухоро вилояти (65) 224-40-51
Жиззах вилояти (72) 223-85-30
Навоий вилояти (36) 225-17-47
Наманган вилояти (69) 226-10-01
Самарқанд вилояти (66) 235-34-18
Сирдарё вилояти (67) 227-23-00
Сурхондарё вилояти (76) 225-52-00
Фарғона вилояти (73) 226-72-44
Хоразм вилояти (62) 228-44-38
Тошкент вилояти (95) 142-14-54
Тошкент шаҳри (71) 235-22-21
Қашқадарё вилояти (75) 225-56-32
Қорақалпоғистон Республикаси (61) 229-02-64
«Сарҳисоб» танловида иштирок этинг ва ғолиб бўлинг!
Ўзбекистон мусулмонлари идораси Матбуот хизмати
Фарғонада Имом Абу Мансур Мотуридийнинг “Таъвилот ал-Қуръон” асарининг таржима қилинган 30-жузи тақдимоти бўлиб ўтди
Шу йил 28 октябрь куни Фарғона вилояти "Тадбиркор уйи" биносининг мажлислар залида Имом Бухорий халқаро илмий-тадқиқот маркази томонидан Имом Абу Мансур Мотуридийнинг Қуръони карим тафсирига бағишланган “Таъвилот ал-Қуръон” асарининг таржима қилинган 30-жузи тақдимоти бўлиб ўтди.
Тақдимотда Ўзбекистон мусулмонлари идорасининг Фарғона вилоятидаги вакили, вилоят бош имом-хатиби Убайдуллоҳ домла Абдуллаев, вилоят ҳокими ўринбосари Жамшид Хатамов, Имом Бухорий халқаро илмий-тадқиқот маркази мутасаддилари ҳамда имом-хатиблар иштирок этди.
Имом Бухорий халқаро илмий-тадқиқот маркази ходими Т.Эвадуллаев юртимизда ислом оламида катта обрў ва эътиборга эга бўлган аждодларимиз Имом Бухорий, Имом Мотуридий, Имом Термизий каби алломалар ҳаёти ва илмий меросини ўрганиш борасида олиб борилаётган ишлар, жумладан, улуғ аждодларимизнинг ҳадис, ақида ва калом илмига оид асарларининг илмий-изоҳли таржима ва қиёсий матнларини нашр этиш юзасидан мазкур марказ томонидан амалга оширилаётган ишлар ҳақида гапириб берди.
Имом Бухорий халқаро илмий-тадқиқот маркази ходими Т.Эвадуллаев ўз нутқида Имом Абу Мансур Мотуридийнинг “Таъвилот ал-Қуръон” китоби Қуръон тафсирига оид асар бўлиб, ислом оламида катта мавқеъга эга бўлган тафсирлар сирасидан экани, бу асар ўз даврида баъзи адашган ақидавий оқимларни Қуръон маъноларини бузиб талқин қилишдек ботил таржималарига раддия ўлароқ, ишончли манба бўлгани, ҳамда асарни таржима қилиш билан боғлиқ жиҳатлар ҳақида маълумот берди.
Шунингдек, вилоят бош имом-хатиби Убайдуллоҳ домла Абдуллаев, Қўқон шаҳар "Саодат" масжиди имом-хатиби Иброҳимжон домла Қодиров, Марғилон шаҳар "Робия ҳожи она" масжиди имом-хатиби Раҳматуллоҳ домла Файзуллаев ва бошқалар сўзга чиқиб, мазкур асарнинг яралиш тарихи, бошқа асарлардан унинг фарқли жиҳатлари ҳамда унинг бугунги кундаги аҳамияти ҳақида сўз юритиб, ушбу асарни она тилимизга таржима қилишда жонбозлик кўрсатганларга миннатдорчилик изҳор қилиб, улар ҳақига дуо қилдилар.
Тақдимот давомида юртимиз ва ислом оламидаги машҳур уламоларнинг асар ҳақидаги мулоҳазалари акс этган видеоролик намойиши ҳам тақдим этилди.
Фарғона вилояти вакиллиги Ахборот хизмати
Ҳамдардлик билдирамиз
Ўзбекистон мусулмонлар идораси Фарғона вилояти вакиллиги, Қўқон шаҳри “Саодат” жоме масжиди имом-хатиби Иброҳимжон домланинг волидаи муҳтарамаларининг вафоти муносабати билан уларнинг оила аъзоларига чуқур таъзия изҳор этамиз
Аллоҳ таоло онахоннинг барча солиҳ амалларини ҳамроҳ айлаб, Ўз мағфиратига олсин.
Ҳақ таоло марҳума онахоннинг яқинлари, фарзанду аржумандларига чиройли сабр бериб, бу мусибатларига ажру мукофотлар ато этсин.
Ўзбекистон мусулмонлари идораси жамоаси, уламолари, имом-домлалари ва ўқитувчи-мударрислари номидан Иброҳимжон домланинг оила аъзолари, фарзандлари, ёр-биродарлари, яқинларига ҳамдардлик билдирамиз.
Иннаа лиллааҳи ва иннаа илайҳи рожиъун!
Янгиликлар
