Айни кунларда Сурхон воҳасида бўлиб турган Ўзбекистон мусулмонлари идораси раиси, муфтий Нуриддин домла ҳазратлари бошчилигидаги уламоларнинг чекка ҳудудлардаги масжидларда қилаётган маърифий суҳбатларидан минглаб мўмин-мусулмонлар баҳраманд бўлишмоқда.

Хусусан, Муфтий ҳазратларининг Термиз шаҳридаги “Ҳаким Термизий” масжидига ташрифидан намозхонлар жуда мамнун бўлишди. Муфтий ҳазратлари суҳбат аввалида мўмин-мусулмонларга Юртбошимизнинг Рамазон табригини етказдилар. Сўнг муборак ойда ажру мукофот кўп амаллар, инсонларга манфаат етказадиган хайрли ишларни кўпайтириш борасида манфаатли суҳбат қилиб бердилар.

Ана шундай илмий-маърифий суҳбатлар Тошкент шаҳар “Абдулҳамид ҳожи” масжиди имом-хатиби Жамолиддин домла Азимов иштирокида Сариосиё туманидаги “Хўжа Муҳаммад Порсо” масжидида, Тошкент шаҳар “Ҳазрати Имом” масжиди имом-хатиби Ҳабибуллоҳ домла Абдураззоқов томонидан Шўрчи туманидаги “Абу Бакр Сиддиқ” жомесида, Тошкент шаҳар “Қўшқўрғон” масжиди имом-хатиби Ўктам домла Маҳкамов иштирокида Денов туманидаги “Чамбил” масжидида ва Тошкент шаҳар “Гўзал” масжиди имом-хатиби Равшанбой домла Раимқулов иштирокида Сариосиё тумани “Хожа Муҳаммад Порсо” масжидида бўлиб ўтди.

Уламолар самимий мулоқот ва маърифий суҳбатлар давомида ҳудуддаги аҳоли вакилларини муборак Рамазон ойи билан қутлаш билан бирга, мазкур ойнинг фазилати, унда қилиш лозим бўлган хайрли амаллар ҳақида мавъиза қилиб беришди.

Мазкур маърифий учрашувларда диёримизда диний-маърифий соҳада бўлаётган сўнгги янгиликлар, амалга оширилаётган хайрли ишлар хусусида ҳам маълумот берилди.

Ўз навбатида мазкур манфаатли суҳбатлардан мўмин-мусулмонлар катта фойдалар олганини таъкидлашиб, уламоларга миннатдорчилигини билдиришди.

Муфтий ҳазрат бошчилигидаги уламоларнинг воҳа вилоятларига ташрифи давом этмоқда.

Ўзбекистон мусулмонлари идораси Матбуот хизмати

Мисрнинг «Ал-Муватин» ахборот агентлигининг ижтимоий тармоқлардаги саҳифаларида Ўзбекистонда Рамазон ойининг нишонланишига оид кўрсатув эфирга узатилди, деб хабар бермоқда «Дунё» АА мухбири.
Унда бошловчи, мисрлик таниқли журналист Фотима Бадавий ўзбек халқининг миллий урф одатлари, муқаддас Рамазон ойини қандай ўтказиши ҳақида томошабинларга батафсил маълумот берди.
«Ўзбекистонда Рамазон ойида ифторлик учун кенг дастурхон ёзилиб турли мевалар ва таомлар тортилиши одат тусига кирган, – дейди бошловчи. – Сомса, шўрва, мастава, манти ва албатта, палов ўзбеклар дастурхонининг шоҳ таомларидир».
Дастур давомида миллий урф-одатларимиз, Рамазон ҳайитини нишонлаш бўйича анъаналар ва мамлакатимизнинг сайёҳлар ўртасида машҳур шаҳарлари ҳақидаги маълумотлар тақдим этилган.
Маълумот учун, «Ал-Муватин» ААнинг «Facebook»да ижтимоий тармоғидаги саҳифасини кунига 1 миллион 200 мингдан ортиқ киши кузатиб боради.

Ўзбекистон мусулмонлари идораси Матбуот хизмати

"Вақф" фонди Сурхондарё вилояти филиали ташаббуси билан ҳомийларни жалб қилган ҳолда Термиз шаҳридаги Имом Термизий халқаро илмий-тадқиқот маркази ходимлари, Имом Термизий ўрта махсус ислом таълим муассасаси ўқитувчи ва талабалари ҳамда диний соҳа ходимлари жами 140 киши учун ифторлик дастурхони ёзилди.

Тадбир сўнгида халқимиз ва юртимиз фаровонлигини тилаб дуолар қилинди.

Вақф фонди сизларни ушбу улуғ ойда, яхшилик йўлида ҳамкорликка чорлаб қолади!

"Вақф" фонди Матбуот хизмати

Муҳаммад Айюб домла Ҳомидов 

“Фурқон” сураси 21-оятидан “Намл” сураси 55-оятигача 

Ўзбекистон элчиси Улуғбек Мақсудов Бутунжаҳон ислом уюшмаси бош котиби Шайх Муҳаммад бин Абдулкарим ал-Исса билан учрашув ўтказди, деб хабар бермоқда «Дунё» АА мухбири.
Мулоқот давомида Имом Бухорий мажмуаси ҳудудида Пайғамбар алайҳиссалом сийрати ва Ислом цивилизацияси инновацион музейини ташкил этиш масалалари муҳокама қилинди.
Шайх Муҳаммад бин Абдулкарим ал-Исса Ўзбекистон Президентининг 2022 йил 17-18 август кунлари Саудия Арабистонига амалга оширган давлат ташрифи ва унинг доирасида Пайғамбар алайҳиссалом сийрати ва Ислом цивилизацияси музейига зиёратини мамнуният билан эсга олди. Унинг айтишича, ушбу ташриф икки давлат ўртасидаги алоқаларни том маънода ривожлантириши билан бирга, қардош халқлар манфаатларига бирдек хизмат қилади.
«Ўзбекистон ҳукумати томонидан кўплаб мусулмон давлатлар фуқароларига мамлакатингизга визасиз кириш тизими жорий этилгани ўзаро муносабатларни кенгайтириш билан бирга Ислом тамаддуни ривожига ҳисса қўшган буюк алломалар мероси ва тарихий обидаларни зиёрат қилишларига катта имконият яратиб беради», деди Бутунжаҳон ислом уюшмаси бош котиби.
Шунингдек, суҳбатдош сўнгги йилларда давлатимиз раҳбари бошчилигида Янги Ўзбекистонни барпо этиш бўйича олиб бораётган оқилона сиёсатни катта қизиқиш билан кузатиб бораётганини таъкидлади.
Ўзбекистон Президентининг Самарқандда Имом Бухорий мажмуасини барпо этиш бўйича билдирган ташаббуси – давлат раҳбари томонидан ислом уламоларига бўлган юксак ҳурмат ва эътибор эканлиги қайд этилди. Бош котиб мазкур ташаббусни қўллаб-қувватлаб, мажмуани барпо этишда Бутунжаҳон ислом уюшмаси барча саъй-ҳаракатларни сафарбар этишини маълум қилди.
Томонлар Янги Ўзбекистонда бошқа давлатлардан фарқли ўлароқ мукаммал ишлаб чиқилган Пайғамбар алайҳиссалом сийрати, Имом Бухорий ҳаёти ва ижоди ҳамда ислом цивилизациясига бағишланган инновацион музейни қисқа муддатларда барпо этишга умид билдирди.
Учрашув якунида томонлар Имом Бухорий мажмуаси ҳудудида Пайғамбар алайҳиссалом сийрати ва Ислом цивилизацияси инновацион музейини ташкил бўйича тажриба алмашишга келишиб олдилар.

Ўзбекистон мусулмонлари идораси Матбуот хизмати