ЭЪТИҚОД ЭРКИНЛИГИ ЙЎЛИДАГИ ДИНИЙ-МАЪРИФИЙ ИСЛОҲОТЛАР

Ўзбекистонда амалга оширилаётган ислоҳотлар халқ фаровонлигига хизмат қилиши баробарида миллий-диний қадриятлар — бағрикенглик, саховат ва эзгулик тамойилларига ҳам асосланган. Бу борада сўнгги йилларда амалга оширилган ишлар шунинг амалдаги исботидир.

• 2017 йилда Мир Араб олий мадрасаси, 2018 йилда Ҳадис илми мактаби, 2020 йилда Имом Термизий ўрта махсус ислом таълим муассасаси ва 2024 йилда Имом Термизий ислом институти ташкил этилди.
• 2017 йилда Имом Бухорий ва Имом Термизий, 2020 йилда Имом Мотуридий халқаро илмий-тадқиқот марказлари ҳамда 2025 йилда Баҳоуддин Нақшбанд илмий-тадқиқот маркази иш бошлади.
• 2022 йилда минтақада ягона бўлган Фатво маркази очилди.
• 2018 йилда Масжид ва зиёратгоҳларни обод қилиш, муҳтожларга ёрдам бериш мақсадида “Вақф” хайрия жамоат фонди ташкил этилди.
• Охирги 7 йилда 150 дан ортиқ янги масжид очилди, 900 таси таъмирланиб, қайта қурилди.
• Диний идора қошида 29 та “Қуръони карим ва тажвид” ўқув курсларининг фаолияти йўлга қўйилиб, уларда тўқсон мингдан зиёд ҳамюртларимиз таҳсил олди.
• Умра сафаридаги квоталар бутунлай олиб ташланди, Ҳаж квотаси эса 15 000 тага оширилди.
• Ўзбекистон мусулмонлари идораси раиси, Шайх Нуриддин Холиқназар ҳазратлари Президент фармонига биноан “Олий Даражали Имом Бухорий” ордени билан мукофотланди.
• 7 нафар фидойи имом-хатиб “Имом Бухорий” орденига муносиб кўрилди.
• Янгидан бунёд этилган Ислом цивилизацияси маркази ва Имом Бухорий мажмуаси Ўзбекистонни жаҳон ислом маърифати марказига айлантириб, “Учинчи Ренессанс” пойдевори бўлиб хизмат қилади.

Президент Шавкат Мирзиёевнинг диний-маърифий соҳани такомиллаштиришга қаратилган фармонлари, қарорлари жамиятда виждон эркинлигини та’минлаш ва диний-маърифий ислоҳотларни янги босқичга олиб чиқишда асосий омил бўлди:

• 2018-йил 16-апрелдаги “Диний-маърифий соҳа фаолиятини тубдан такомиллаштириш чора-тадбирлари тўғрисида”ги Президент Фармони диний-маърифий соҳа фаолиятини тубдан такомиллаштириш ва ислоҳ қилишни бошлаб берди.
• 2019-йил 4-сентябрдаги “Диний-маърифий соҳа фаолиятини такомиллаштириш бўйича қўшимча чора-тадбирлар тўғрисида” Президент Қарори соҳа барқарорлигини таъминлаш бўйича қўшимча чора-тадбирларни белгилаб, диний-маърифий муҳитни янада яхшиланишига хизмат қилди.
• Президент Шавкат Мирзиёев ташаббуси билан БМТ томонидан “Маърифат ва диний бағрикенглик” махсус резолюцияси қабул қилинди.

Давлатимиз сиёсатининг марказида инсон қадри ва уларнинг дарди билан яшаш тамойили турибди:

• Низоли ҳудудлардан 531 нафар аёл ва болалар Ватанга қайтарилди. 2024 йилда эса Ғазодан 100 нафар фаластинлик аёл ва болалар юртимизга олиб келиниб, тиббий ёрдам кўрсатилди.
• “Рамазон – меҳр-мурувват, аҳиллик ва шукроналик ойи” деган эзгу ғоя асосида муборак ойни муносиб тарзда ўтказиш бўйича амалий чора-тадбирлар кўрилмоқда. Бу йил “Вақф” хайрия жамоат фондига давлат томонидан 750 миллиард ҳамда Ижтимой ҳимоя миллий агентлиги орқали 300 миллиард, жами 1 трлн 50 млрд сўм ажратилиб, кам та’минланган, эҳтиёжманд, ижтимоий ҳимояга муҳтож инсонлар ҳар томонлама қўллаб-қувватланмоқда.

Сўнгги йилларда мамлакатимиз йирик тадбирлар марказига айланди:

• Бухоро шаҳрида дунёга машҳур Мир Араб мадрасасининг 500 йиллиги кенг нишонланди.
• Тошкентда Туркий давлатлар ташкилотига аъзо мамлакатлар диний идора раҳбарларининг IV йиғилиши ўтказилди.
• “Ислом – тинчлик ва эзгулик дини” мавзусида халқаро илмий-анжуман ташкил этилди.
• Термизда Имом Термизийнинг 1200 йиллигига бағишланган халқаро илмий конференция бўлиб ўтди.
• Самарқандда “Мотуридийлик – бағрикенглик, мўътадиллик ва маърифат таълимоти” мавзусидаги нуфузли анжуман ўтказилди.