1. Dard ham, shifo ham Allohdan ekaniga qalbdan taslim bo‘lish, bunga qat’iy ishonish. Har bir yaxshilik ham, yomonlik ham Alloh taoloning huzuridandir. Bunga qalb ila taslim va rozi bo‘lish lozim. Har qanday sinovlarni rozilik bilan qabul qilish musibatlarni yengishning go‘zal muolajasidir. Aksincha, sinovlarga noshukrlik qilish, jazavaga tushish musibat ustiga musibatdir.

Alloh taolo bunday marhamat qiladi: “Xoh yerga va xoh o‘zlaringizga biror musibat yetsa, Biz uni paydo qilishimizdan ilgari Kitobda (Lavhul-mahfuzda bitilgan) bo‘lur. Albatta, bu Allohga osondir” (Hadid surasi, 22-oyat).

Abu Dardo roziyallohu anhu aytadilar: “Imonning yuksak darajasi Allohning hukmiga sabr qilish va taqdirga rozi bo‘lishdir”.

2. Dardga shifo izlash. Shifo Allohdan ekaniga imon keltirgan holda, shifoga olib boruvchi halol yo‘l va sabablarni izlash lozim. Rasululloh sollallohu alayhi vasallam: “Davolaninglar! Alloh azza va jalla qaysi bir dardni bergan bo‘lsa, uning shifosini ham bergan”, dedilar (Imom Buxoriy rivoyati).

Albatta, shifoni yolg‘iz Alloh beradi. Qur’oni karimda bunday deyiladi: “Kasal bo‘lganimda, Uning O‘zi menga shifo berur” (Shuaro surasi, 80-oyat).

Ammo iste’mol qiladigan dori-darmonimiz bir sabab, xolos. Sababni tark etish bandani halokatga duchor etadi.

3. Bemorlik sababli gunohlar mag‘firat etilishiga umid qilish.

Rasululloh sollallohu alayhi vasallam: “Musulmonga qay bir musibat – horg‘inlikmi, bemorlikmi, tashvishmi, mahzunlikmi, ozormi, g‘am – g‘ussami, hattoki tikan kirishimi yetadigan bo‘lsa, albatta, Alloh ular ila uning xatolarini kafforat qilur”, deganlar.

4. Duo qilish.

Alloh taolodan nafaqat o‘zingiz yoki oilangiz, balki butun musulmonlarning haqqiga sihat-salomatlik so‘rab duo qiling.

Sevikli Payg‘ambarimiz sollallohu alayhi vasallam qachonki biror yerlari og‘risa muborak qo‘llarini og‘riyotgan joyga qo‘yib uch marotaba “Bismillah” deb, yetti marotaba bunday der edilar: “A’uzu billahi va qudratihi min sharri ma ajidu va uhoziru” (Imom Ahmad, Imom Muslim rivoyati).

Ibn Abbos roziyallohu anhudan rivoyat qilingan hadisda Rasululloh alayhissalom barcha kasalliklarga va isitma chiqqanida:

“Bismillahil Kariym, a’uzu billahil a’ziym, min sharri kulli hirqin nahhar va min sharri harrin nar”, deb aytishni o‘rgatganlar (Imom Ibn Sunniy rivoyati).

Shuni alohida ta’kidlash lozimki, kimki kasal bo‘ladimi, yo sog‘ bo‘ladimi hamisha Allohning roziligiga intilish lozim. Albatta, Alloh har narsaga Qodir, ne’matlarini beminnat beruvchi va har narsadan xabardor Zotdir.

Davron NURMUHAMMAD