02 Июн, 2025, 6 Зулҳижжа, 1446
02 Июн, 2025, 6 Зулҳижжа, 1446
Қуйида келтириладиган фикрлар, ҳикматлар сайтлардан ва ижтимоий тармоқлардаги турли саҳифалардан олиб таржима қилинган.
Дуо
Ё Аллоҳ! Меҳрибон Роббим! Хотимамизни гўзал қилгин! Калимаи Шаҳодатни айтиб жон беришимизни осон айлагин, омин!
*****
Муҳим вазифа
- Ассалому алайкум, устоз. Сизга шогирд бўлиб, илм ўрганмоқчиман, қалбим пок бўлишини, ахлоқим гўзал бўлишини хоҳлайман.
- Ва алайкум ассалом. Гуноҳларинг камайганда келасан.
Орадан тахминан уч йил ўтиб, ҳалиги йигит яна келди.
- Ассалому алайкум. Устоз, мен келдим. Шу ўтган йиллар мобайнида гуноҳдан тийилдим. Энди шогирдликка қабул қиласизми? Менга ҳам вазифа берасизми?
- Ва алайкум ассалом. Сенга уч йил олдин берганман вазифани. Гуноҳлардан тийилиш. Шу ишда бардавом бўлгин!
*****
Етмиш йилдан ортиқроқ ўқидим. Мана бундан чиройлироқ ҳикмат топмадим:
«Албатта, тоатнинг машаққати кетади ва савоби қолади. Албатта, гуноҳларнинг лаззати кетади ва иқоби қолади».
Али Тантовий раҳимаҳуллоҳ
*****
Агар ака-укалар биргалашиб ишласалар, тоғлар ҳам олтин конларига айланади.
“Тарих муҳрлаган сўзлар”
*****
Тилдан бошқа барча аъзоларга чарчоқ, қарилик етади.
“Тарих муҳрлаган сўзлар”
*****
Юраётган йўлингга тикон сочма, тиконли ўсимлик экма. Эҳтимол ўша йўлдан ялангоёқ ҳолда ўтишинг мумкин.
“Тарих муҳрлаган сўзлар”
*****
Ҳақиқат, гарчи унга ҳамма қарши бўлса ҳам, ҳақиқатлигича қолаверади!
“Тарих муҳрлаган сўзлар”
*****
Тарихдаги энг катта иккиюзламачилик ва лаганбардорликлардан бири
Мамлуклар ҳукмронлиги даврида Мисрда зилзила бўлди. Шунда шоирлардан бири подшоҳга: “Мисрда зилзила бўлмаяпти. Балки (Миср) сизнинг адолатингиздан хурсанд бўлиб, рақсга тушяпти” деди.
“Тарих муҳрлаган сўзлар”
*****
Агар бир инсоннинг ахлоқини билмоқчи бўлсангиз, бошлиқлари билан эмас, балки ўзидан қуйироқ кишилар билан қандай муомала қилишига қаранг!
“Тарих муҳрлаган сўзлар”
Интернет материалларидан тўплаб, таржима қилувчи
Нозимжон Иминжонов
Бисмиллаҳир Роҳманир Роҳийм.
Аллоҳ таолога битмас-туганмас ҳамду санолар бўлсин.
Пайғамбаримизга мукаммал ва батамом салавоту дурудлар бўлсин.
Аллоҳ таоло Қуръони каримда бундай марҳамат қилади:
«... Маълум кунларда Аллоҳнинг номини зикр қилинглар», (Ҳаж сураси, 28-оят).
Ибн Аббос розияллоҳу анҳу «Маълум кунлар»ни зулҳижжанинг аввалги ўн куни, деганлар.
Ибн Аббос розияллоҳу анҳу ривоят қиладилар: «Расулуллоҳ соллаллоҳу алайҳи васаллам: «Мана бунда (яъни, зулҳижжа ойининг аввалги ўн кунида) қилинганидан-да афзалроқ амал йўқ», дедилар. Шунда саҳобалар: «Аллоҳ йўлидаги жиҳоддан ҳамми?» дейишди. Расулуллоҳ соллаллоҳу алайҳи васаллам: «Ҳа, деб, «лекин бир киши моли ва нафсини хатарга қўйиб кўчага чиқсаю, ҳеч бир нарса билан қайтмаса, ана ўша афзалдир», дедилар (Имом Бухорий ривояти).
Имом Термизийнинг ривоятида: «Солиҳ амаллар қилинган кунлар ичида зулҳижжа ойини ўн кунидан кўра Аллоҳга маҳбуброқ кун йўқдир», дедилар, деб келади.
Абдуллоҳ ибн Абдураҳмон Дорамийнинг «Муснад»ларида ривоят қилинади: Набий соллаллоҳу алайҳи васаллам «Зулҳижжа ойининг ўн кунидаги амалдан кўра афзалроқ амал йўқдир», деганларида, «Жиҳоддан ҳамми?» дейишди. (Ровий ҳадисни охиригача зикр қилган.)
Амр ибн Шуайб оталаридан, оталари боболаридан ривоят қиладилар: «Расулуллоҳ соллаллоҳу алайҳи васаллам: «Дуоларнинг яхшиси арафа кунидаги дуодир. Мен ва мендан олдинги пайғамбарлар айтган калималарнинг яхшиси
«Лаа илаҳа иллаллоҳу ваҳдаху лаа шарийка лаҳ, лаҳул мулку ва лаҳул ҳамду ва ҳува ъала кулли шайин қодир», деб айтишдир», дедилар».
Термизий заиф иснод билан ривоят қилганлар.
Имом Моликнинг «Муватто»ларида эса: «Дуоларнинг афзали арафа кунидаги дуодир. Мен ва мендан олдинги пайғамбарларнинг айтган калималарининг афзали «Лаа илаҳа иллаллоҳу ваҳдаҳу лаа шарийка лаҳ» дир», деб келган.
Имом Молик бу ҳадисни мурсал ҳолатда лафзида ноқислик билан ривоят қилганлар.
Солим ибн Абдуллоҳ ибн Умар розияллоҳу анҳу арафа куни бир тиланчи одамлардан тиланиб юргани кўриб: «Эй ожиз, бу кунда Аллоҳдан бошқадан ҳам сўраладими?» дедилар.
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа