Жорий йилнинг 19 июнь куни Ўзбекистон мусулмонлари идораси раиси, муфтий Усмонхон Алимов ҳазратлари Қозоғистон мусулмонлари идораси раиси Серикбай ҳожи Ўраз билан учрашди. Ушбу учрашув Чимкент шаҳрида «Қозоғистон—Ўзбекистон: диний алоқаларининг янги босқичи» мавзусидаги халқаро форум доирасида бўлиб ўтди.
Икки мамлакат муфтийлари ўзбек-қозоқ биродарлигини янада мустаҳкамлаш борасида фикр алмашдилар.
Қозоғистон муфтийси Серикбай ҳожи Ўраз ушбу йилда Марказий Осиё уламоларининг Рамазон ойи бошланиши ва Рамазон ҳайити саналарини биргаликда кенгашган ҳолда белгилаганлари муҳим аҳамиятга эга эканини таъкидлади.
"Бу тарихий қарор - бизнинг диний бирдамлигимизнинг ёрқин намунасидир. Қозоғистонда Ўзбекистон йили муносабати билан ҳамкорликнинг янги қирраларини кашф этишимиз, мавжуд йўналишларда ҳаракатларни фаоллаштиришимиз ва тизимли равишда амалга оширишимиз зарур", деди Серикбай ҳожи Ўраз.
Ўз навбатида Ўзбекистон мусулмонлари идораси раиси, муфтий Усмонхон Алимов ҳазратлари ҳам юқори даражада ташкил этилган анжуманга таклиф этгани учун миннатдорлик билдирди. Диний соҳада ҳамкорликни мустаҳкамлаш, ҳамкорликда ўзбек ва қозоқ тилларидаги диний китоблар нашр қилиш, ёшларни тарбиялаш борасида тажриба алмашиш, икки мамлакат муқаддас қадамжоларига зиёратни ташкил этиш бўйича алоқаларни мустаҳкамлаш борасида ўз фикрларини билдириб ўтдилар.
ЎМИ Матбуот хизмати
Жорий йил 24-25 февраль кунлари Ўзбекистон мусулмонлари идораси Фатво маркази директор ўринбосари Ғуломиддин Холбоев ва марказ бош мутахассиси Ҳикматилла Тоштемиров Туркия давлатида бўлиб, Турк давлатлари ташкилоти (ТДТ) Мусулмон диний идоралари Фатво ҳайъати тадбирида иштирок этишди.
“Мия ўлимига оид ҳукмлар”, “Аёлнинг маҳрамсиз сафар қилиши”, “Норасмий никоҳни бекор қилиш” каби масалаларнинг ечими мавзусида ўтказилган мазкур йиғилишда Ўзбекистон, Қозоғистон, Қирғизистон, Озарбайжон, Туркия уламолари, диншунослар, исломшунослар ҳамда журналистлар қатнашди.
“Аёлнинг маҳрамсиз сафар қилиши” мавзусида бошқа иштирокчилар қаторида Ўзбекистон мусулмонлари идораси Фатво маркази вакили Ғуломжон Холбоев ҳам сўзга чиқди.
Куннинг иккинчи ярмида “Норасмий никоҳни бекор қилиш” мавзуси кўриб чиқилиб, Ҳикматилла Тоштемиров бу мавзунинг кун тартибига келиш сабаблари, муаммолар ҳақида гапириб, сўзи охирида манбаларга таянган ҳолда унинг ечимини таклиф этди.
Шунингдек, “Мия ўлими билан боғлиқ масалалар” мавзусида ҳам вакилларимиз фаол иштирок этишди.
Ўзбекистон мусулмонлари идораси
Матбуот хизмати