4 январь куни Наманган вилояти бош имом-хатиби Абдуллоҳхон домла Саматов ва Косонсой туманида фаолият юритаётган имомлар иштирокида диний таълим муассасаларида таҳсил олаётган косонсойлик талаба-ёшлар билан учрашув бўлиб ўтди.

Мулоқот давомида илм-маърифатнинг аҳамияти, шунингдек, юртимизда ёшларни қўллаб-қувватлаш ва билимли авлодни тарбиялаш борасида давлатимиз раҳбари томонидан олиб борилаётган ислоҳотлар хусусида фикр алмашилди. Талабаларга таълимни якунлагандан сўнг ўз туманларида масжид ва маҳаллаларда имом-хатиб, имом-ноиб ҳамда отинойи сифатида хизмат қилишлари муҳим экани таъкидланди.

Абдуллоҳхон домла ёшларни ота-она ва устозлар ишончини оқлаб, юрт ва халқ манфаати йўлида фидокорона хизмат қилишга чорлади. Учрашув якунида талабаларга ўқишларида муваффақият тилаб дуолар қилинди.

Шунингдек, ҳомийлар кўмагида 3 нафар талабага ўқув шартнома учун сертификатлар топширилди. Барча иштирокчиларга эсдалик совғалари ва ҳадиялар тақдим этилди.

Ўзбекистон мусулмонлари идораси
Наманган вилояти вакиллиги
Матбуот хизмати