Жорий йилнинг 23 декабрь куни Тошкент ирригация ва қишлоқ хўжалигини механизациялаш муҳандислари институтида талаба ёшларнинг диний ва дунёвий билимларини янада ошириш, миллий қадриятларга бўлган ҳурматини юксалтириш, инсонлар ўртасида муомала маданияти ва айниқса, институтнинг ўрнатилган тартиб-қоидалари, кийиниш маданияти борасидаги билим, кўникмаларини ошириш ва уни тарғиб қилиш мақсадида худди шу ном остида маърифий-тарбиявий тадбир бўлиб ўтди.
Тадбирда Тошкент шаҳар бош имом-хатиби ўринбосари, “Ислом ота” жоме масжиди имом-хатиби Жасурбек Раупов иштирок этди. Тадбир давомида миллий қадриятлар ва ўзбекона одоб-ахлоқ, шарму ҳаё, миллий менталетитимизга хос бўлган фазилатларни ёшларимиз ўзларида шакллантиришлари лозимлигини, ота-боболаримиздан йиллар силсиласидан ўтиб бизгача етиб келган ўзига хос таълим-тарбия қоидаларига бўйсуниш, уни ҳурмат қилиш, қадрлаш ва фарзандларимизга етказишимиз лозимлигини ва айнан мана шу жиҳатлар Юрт тинчлиги, Ватан тараққиётида дастуруламал бўлиб хизмат қилишини таъкидлади.
Ж.Раупов айниқса, аёл-қизларимизнинг кийинишларида, жамоат жойларида ўзларини тутишларида мусулмон кишининг энг муҳим сифатларидан бўлмиш ҳаё, иффат кўтарилиб кетаётганлигини тилга олиб, бу нафақат ўша қиз ёки аёлнинг балки, ўзгаларнинг ҳам гуноҳга ботишига сабаб бўлишини ҳадиси шарифлар билан таъсирчан тушунтириб берди.
Шариатимизда эркак ва аёлларнинг ўз кийиниш усуллари бор. Эркаклар хотинларнинг кийимини кийиши қанчалик хунук бўлса, эркакларнинг кийимларини кийган хотинлар ҳам шундай бўлади. Рус адиби Лев Толстой таъбири билан айтганда эркакка ўхшамоқчи бўлган аёл, худди хотинсифат эркак каби тасқарадир.
Тадбирда талаба-ёшлар мавзу юзасидан ўзларини қизиқтирган барча саволларга жавоблар олишди.
ЎМИ Матбуот хизмати
Қарийб ўн ойдирки, юртимизнинг барча ҳудудларида “Янги Ўзбекистоннинг фидойиси бўлиб, маънавият тарғиботчисига айланамиз” шиори остида маънавий-маърифий тарғибот тадбирлари ўтказиб келинмоқда.
Ҳожи ота, ҳожи оналар, имом-хатиб ва фаоллар билан бирга маҳаллаларда истиқомат қилувчи ижтимоий ҳимояга муҳтож, боқувчисини йўқотган, нотинч, ажрим ёқасида турган оилалар ҳолидан хабар олиб, қимматли ваъз-насиҳатлар билан уларнинг кўнгилларига илиқлик олиб кириш баробарида хайрия ва эҳсонлар улашмоқда.
Бугунга қадар 84 минг 793 та тадбир ўтказилди. Уларда 518 121 нафар юртдошимиз қамраб олинди. 11 мингдан зиёд ҳожилар иштирок этаётган тадбирлар натижасида жамиятдаги маънавий муҳит янада яхшиланмоқда. Зеро, маънавий-маърифий тарғибот кишилик жамиятида доимий қилиниши лозим бўлган ишлар сирасига киради.
Ўзбекистон мусулмонлари идораси
Матбуот хизмати