Шу йил январь ойининг биринчи ярмида юртимиздан умра зиёратини адо қилиш учун кетган 48 нафар ҳамюртимиз умра амалларини бажариб, юртимизга келди. Уларни Нукус халқаро аэропортидан Қорақалпоғистон Республикаси Вазирлар Кенгаши, Қорақалпоғистон мусулмонлари қозиёти, Муҳаммад ибн Аҳмад ал-Беруний мадрасаси, имом-хатиблар, зиёратчиларнинг яқин қариндошлари ва оммавий ахборот воситалари ходимлари кутиб олишди.
ؘ– Умра амалларини адо этишга улкан имконият ва қулайликларни ҳозирлаб берган муҳтарам Юртбошимиз ва мутасадди раҳбарларга ташаккур. Мадина ва Макка шаҳарларида зиёратчилар учун кўрсатилаётган хизматлар ҳаммаси кўнгилдагидек. Ҳамсафарларимиз ҳам миннатдор. Сафар давомида ибодат амалларини адо этиш чоғида юртимиз тинчлиги ва хотиржамлиги учун дуолар қилдик», – дейди зиёратчилардан бири.
Дарҳақиқат, барча мўмин-мусулмонлар катта савобларга эришиш ва гуноҳлардан покланишдан умид қилган ҳолда Умра ибодатини бажаришга интилади.
Аллоҳ таоло Қуръони каримда: “Ҳаж ва умрани Аллоҳ учун мукаммал бажаринг”, – дейди. Шунингдек, умра амали учун катта мукофотлар ваъда қилинган. Пайғамбар алайҳиссалом ўз ҳадиси шарифда: “Умра (олдин қилинган) умрагача (бўлган) иккаласининг ўртасидаги (сағира гуноҳлар)га каффорот бўлади” (Имом Муслим ривояти).
Мирас АББАЗОВ,
Қорақалпоғистон мусулмонлари
қозиёти ходими
Абдуллоҳ ибн Амр розияллоҳу анҳумодан ривоят қилинади. Набий соллаллоҳу алайҳи васаллам: “Икки хислат бор. Ким унга амал қилса, албатта жаннатга киради. Иккиси осон, аммо унга амал қиладиган оздир.
БИРИНЧИСИ, ҳар бир намоздан сўнг 10 марта тасбеҳ (Субҳаналлоҳ) айтади, 10 марта Аллоҳга ҳамд (Алҳамдулиллаҳ) айтади ва 10 марта такбир (Аллоҳу акбар) айтади. Бир кунда 150 та, тарозида эса 1500 та бўлади.
ИККИНЧИСИ, қачон ухлашга ётса, 34 марта такбир (Аллоҳу акбар), 33 марта ҳамд (Алҳамдулиллаҳ) ва 33 марта тасбеҳ (Субҳаналлоҳ) айтади. Жами 100 та, тарозида 1000 та бўлади”, дедилар.
Шунда саҳобалар розияллоҳу анҳум: “Ё Аллоҳнинг Расули! Нега осон бўлган бу амалларга амал қиладиганлар оз?” деб сўрашди.
Расулуллоҳ соллаллоҳу алайҳи васаллам: “Бу амални қилмоқчи бўлганнинг олдига шайтон намозда келиб, уни айтишидан олдин ҳожатини эсига солади. Уйқуга ётганида эса, уни айтишидан олдин ухлатиб қўяди”, деб жавоб бердилар (Имом Термизий, Имом Насоий ривояти).
Аллоҳ таоло барчамизга Расулуллоҳ соллаллоҳу алайҳи васалламнинг суннатларига эргашишимизга тавфиқ ато этсин!
Даврон НУРМУҲАММАД
тайёрлади