Давлатимиз Раҳбарининг «Рамазон – саховат, бирдамлик ва бағрикенглик ойи» ғояси асосида айни кунларда вилоятимизда саховат тадбирлари изчил давом этяпти.
Бу жараёнда ўзга миллат, бошқа дин вакилларига ҳам алоҳида эътибор қаратилмоқда.
Шу йил 16 март куни Рамазоннинг 16-куни (16 март) Оҳангарон тумани бош имом-хатиби Ҳусниддин домла Бойниёзов бошчилигида тумандаги имом-хатиблар иштирокида кам таъминланган, боқувчисини йўқотган, ногирон парваришланаётган 36 та оила ҳолидан хабар олинди.
Ҳомийлар кўмагида уларнинг ҳар бирига 300 минг сўмлик, жами 11 миллион сўмлик озиқ-овқат маҳсулотлари етказиб берилди.
Улар орасида рус, татар, корейс миллатига мансуб хонадон вакиллари ҳам бор.
Аллоҳ таоло марҳамат қилади: «Бирор нарсани (муҳтожларга холис) эҳсон қилсангиз, бас, (Аллоҳ) унинг ўрнини тўлдирур. У ризқлантирувчиларнинг яхшисидир» (Сабаъ сураси, 39 оят).
Пайғамбаримиз соллаллоҳу алайҳи васаллам эса: «Жоним измида бўлган Зотга қасам, садақа билан мол камаймайди», деганлар (Имом Термизий ривояти).
Аллоҳ таоло эҳсонларни қабул қилсин!
Ўзбекистон мусулмонлари идораси
Тошкент вилояти вакиллиги
Матбуот хизмати
“Ал-Азҳар” шайхи доктор Аҳмад Тоййиб Бирлашган Миллатлар Ташкилоти Бош Ассамблеясининг Исломофобияга қарши курашиш халқаро куни муносабати билан ўтказилган йиғилишида жаҳон ҳамжамиятини исломофобияга қарши курашишга чақирди. У ушбу тадбирда сўзлаган нутқида шайх ат-Тоййиб исломофобияни ақлга зид ва мантиқсиз мафкура сифатида таърифлаб, уни жаҳон тинчлигига ҳақиқий таҳдид келтиради, дея баҳолади.
“Ал-Азҳар” шайхи доктор Аҳмад Тоййиб маърузаси давомида БМТ Бош котиби Антониа Гутерришнинг Ислом ҳақидаги холис ва жасоратли сўзларини юқори баҳолаб, бундай баёнотлар исломофобияга қарши курашда муҳим аҳамиятга эга эканини таъкидлади. У, шунингдек, айрим ўнг қанот экстремистик гуруҳларнинг Исломга нисбатан нотўғри тасаввурларни популистик мақсадларда суистеъмол қилишга уринишларини қоралади.
Шайх ат-Тоййибнинг ушбу чақириқлари исломофобияга қарши халқаро миқёсдаги саъй-ҳаракатларни кучайтириш ва динлараро ҳурмат ҳамда ҳамжиҳатликни мустаҳкамлашга қаратилган.
Ўз навбатида Миср муфтийси ва Жаҳон фатво муассасалари Бош котиби, доктор Назир Айёднинг таъкидлашича, исломофобияга қарши кураш жамият тинчлигини сақлаш ва халқлар ўртасида ҳамжиҳатлик ҳамда бағрикенглик қадриятларини мустаҳкамлаш учун долзарб масаладир. Мазкур оқимга қарши курашиш мусулмонлар зиддига нафрат қўзғатувчи ҳар қандай сўзлар ва фикрларга қарши халқаро ҳамкорликдаги саъй-ҳаракатлар олиб боришни талаб қилади.
Ҳар йили 15 март куни нишонланадиган “Исломофобияга қарши кураш халқаро куни” муносабати билан сўзлаган нутқида, доктор Назир Айёд исломдан қўрқиш ҳодисасининг тарқалиши ва мусулмонларга қарши бўлган ёлғон маълумотлар ҳамда нафрат қўзғатувчи кампанияларнинг кучайиши катта муаммо эканини таъкидлади. Бу эса нотўғри тушунчаларни тўғрилаш, динлар ва маданиятлар ўртасида мулоқотни кучайтириш, раҳм-шафқат, тинчлик ва осойишталикда яшашга чақирувчи исломий қадриятларни тарқатиш устида ишлашни талаб этади.
Доктор Назир Айёднинг таъкидлашича, Миср Фатво ҳайъати ва Жаҳон фатво муассасалари бош котибияти бу борада фаол иш олиб бормоқда. Улар ичида экстремизм ва исломофобияга қарши курашиш бўйича “Салам” тадқиқотлар маркази орқали махсус тадқиқотлар ва изланишлар олиб бориш, халқаро конференциялар ва семинарлар ўтказиш, халқлар ўртасида тушуниш ва ҳамкорлик кўприкларини қуришга қаратилган ташаббусларни амалга ошириш каби ишлар мавжуд.
Манбалар асосида
Илёсхон Аҳмедов тайёрлади.